ប្រធានាធិបតីអាមេរិកលោក Donald Trump បានបើកការវាយប្រហារថ្មីមួយកាលពីថ្ងៃអង្គារប្រឆាំងនឹងអ្នកស៊ើបអង្កេតអំពីការឃុបឃិតរបស់រុស្សីលោក Robert Mueller ដែលជាហេតុបង្កើនភាពតានតឹងផ្នែកនយោបាយខណៈការស៊ើបអង្កេតកំពុងគំរាមកំហែងដល់សេតវិមាន។
នៅក្នុងភាសាដ៏រឹងមាំបំផុតរបស់គាត់ប្រឆាំងនឹងការស៊ើបអង្កេតដែលគាត់បានរិះគន់ជាយូរមកហើយថាជា “ការព្យាយាមដាក់កំហុសលើគាត់” នោះ, ប្រធានាធិបតីអាមេរិកបានហៅលោក Mueller ថា “រដ្ឋអាជ្ញាពិសេសបានប្រព្រឹត្តអំពើអាក្រក់”។
លោក Trump បានចោទប្រកាន់នៅក្នុងការបង្ហោះ Twitter ជាបន្តបន្ទាប់ថា “គាត់កំពុងធ្វើឲ្យខូចខាតជាបណ្តើរៗដល់ប្រព័ន្ធយុត្តិធម៌ព្រហ្មទណ្ឌរបស់យើង”។
ការវាយប្រហារលើរដ្ឋអាជ្ញាពិសេសរូបនេះបានកើតឡើងមួយថ្ងៃបន្ទាប់ពីលោក Mueller បានផ្អាកកិច្ចព្រមព្រៀងកិច្ចសហប្រតិបត្តិការជាមួយនឹងអតីតប្រធានយុទ្ធនាការរបស់លោក Trump គឺលោក Paul Manafort ដោយចោទប្រកាន់គាត់ពីបទនិយាយកុហកដល់អ្នកស៊ើបអង្កេត។
ការចោទប្រកាន់ប្រឆាំងនឹងលោក Manafort បានកើតឡើងនៅថ្ងៃតែមួយដែលទីប្រឹក្សាកិច្ចការបរទេសនៃយុទ្ធនាការឆ្នាំ២០១៦របស់លោក Trump គឺលោក George Papadopoulos ត្រូវបានដាក់ពន្ធនាគាររយៈពេលពីរសប្តាហ៍ដោយសារតែនិយាយកុហកទៅអ្នកស៊ើបអង្កេតអំពីទំនាក់ទំនងរុស្ស៊ីរបស់គាត់។
រឿងទាំងពីរនេះបានបន្ថែមការរំពឹងទុកថា លោក Mueller កំពុងខិតទៅជិតទីបញ្ចប់នៃការស៊ើបអង្កេតអាយុកាល១៨ខែរបស់គាត់ដែលបាននាំមកនូវការចោទប្រកាន់ពាក់ព័ន្ធនឹងការឃុបឃិតគ្នារវាងយុទ្ធនាការរបស់លោក Trump និងកិច្ចប្រឹងប្រែងរបស់រុស្ស៊ីដើម្បីបង្វែរការបោះឆ្នោតឆ្នាំ២០១៦ឬចំពោះការចោទប្រកាន់ថា លោក Trump បានរារាំងការស៊ើបអង្កេត។
កាលពីសប្តាហ៍មុន សេតវិមានបានបង្ហាញថា លោក Trump បានឆ្លើយតបនឹងសំណួរដ៏ច្រើនដែលត្រូវបានដាក់ស្នើដោយក្រុមរបស់លោក Mueller កាលពីដើមឆ្នាំនេះដោយបញ្ចប់ការពន្យារពេលដ៏យូរដែលជំរុញឲ្យមានការរំពឹងទុកថា លោក Trump អាចត្រូវបានកោះហៅឲ្យទៅផ្តល់ភស្តុតាង៕ AFP
Source: Kampuchea Thmey Daily
0 Comments