សហព័ន្ធកីឡាបាល់ទាត់កម្ពុជា (ស.ប.ក) បានប្រកាសជូនដំណឹងពីការត្រៀមរៀបចំប្រកួតពានរង្វាន់ជើងឯកយុវជនក្រោមអាយុ១៣ឆ្នាំ (U13) ឆ្នាំ២០១៨ ក្នុងពេលឆាប់ៗ ខណៈគណៈកម្មការនឹងឈប់ទទួលពាក្យនៅថ្ងៃច័ន្ទ ទី១២ ខែវិច្ឆិកា ឆ្នាំ២០១៨ បន្ទាប់ពីចេញសេចក្តីជូនដំណឹងតាំងពីខែតុលា មកម្ល៉េះ។
បើតាមលិខិតផ្លូវការលេខ៥៣៧/១៨ ស.ប.ក/ស.ជ.ណ បានបញ្ជាក់ថា ពានរង្វាន់ជើងឯកយុវជនក្រោមអាយុ១៣ឆ្នាំនេះ នឹងរៀបចំឡើងនៅមជ្ឈមណ្ឌលនិងសាលាបាល់ទាត់ជាតិបាទី ក្នុងខេត្តតាកែវ ដោយកំណត់យកក្រុមចំនួន៣២ក្រុមចូលរួមប្រជែងយកជើងឯក។ ក្រុមដែលមានសិទ្ធិដាក់ពាក្យចូលរួមនោះ គឺជាក្រុមតំណាងឲ្យខេត្តទាំង២៤ខេត្តនិងរាជធានី ឬជាក្រុមដែលស្ថិតក្នុងគម្រោងអភិវឌ្ឍន៍ថ្នាលនិងយុវជនរបស់ស.ប.ក ឬជាក្រុមដែលរៀបចំឡើងដោយសមាគម ស្ថាប័ន អង្គការសង្គមនៅទូទាំងប្រទេស និងជាក្រុមដែលត្រូវបានអញ្ជើញឲ្យចូលរួមប្រកួតដោយស.ប.ក។
ចំណែកកាលបរិច្ឆេទនៃការទទួលពាក្យនឹងបិទនៅវេលាម៉ោង៥ល្ងាចថ្ងៃច័ន្ទ ទី១២ ខែវិច្ឆិកា ឆាប់ៗនេះ។ ចំពោះកាលបរិច្ឆេទនៃការប្រកួត ស.ប.ក ប្រកាសថានឹងជូនដំណឹងនៅពេលក្រោយ។ យ៉ាងណាក្តីក្រុមនីមួយៗអាចចុះបញ្ជីកីឡាករដំបូងចាប់ពី១៥ទៅ៥០នាក់ ក្នុងនោះត្រូវមានមន្ត្រីយ៉ាងតិចចំនួន៤នាក់ និងយ៉ាងច្រើន៧នាក់ បូកទាំងគ្រូទេព្យ១នាក់។ កីឡាករដែលចូលរួមប្រកួតត្រូវមានថ្ងៃកំណើតចាប់ពីឬក្រោយខែមករា ឆ្នាំ២០០៦។
ថ្មីៗនេះសហព័ន្ធកីឡាបាល់ទាត់កម្ពុជា បានបើកវគ្គបណ្តុះបណ្តាលអាជ្ញាកណ្ដាលនិងអ្នកវាយតម្លៃអាជ្ញាកណ្ដាលជាច្រើនរូបដើម្បីកាត់សេចក្តីដឹកនាំក្នុងការប្រកួតនេះផងដែរ។ ស.ប.ក តែងតែរៀបចំកម្មវិធីប្រកួតពានរង្វាន់ U13 នេះរាល់ឆ្នាំដើម្បីជ្រើសរើសនិងពិនិត្យមើលធនធានយុវជនថ្នាល់ក្នុងដំណើរស្វែងរកកីឡាករឆ្នើមដើម្បីត្រៀមទទួលធ្វើជាម្ចាស់ផ្ទះក្នុងព្រឹត្តិការណ៍កីឡាស៊ីហ្គេម ឆ្នាំ២០២៣ ខាងមុខ៕
Source: Kampuchea Thmey Daily
0 Comments