អ្នកចាំទីដៃស្អិត ស៊ូ យ៉ាទី សមាជិកក្នុងក្រុមជម្រើសជាតិកម្ពុជា ដែលទើបជួយក្រុមណាហ្គាវើល ឈ្នះជើងឯកពានរង្វាន់លីគកំពូលកម្ពុជា (Metfone Cambodian League 2018) ប្រចាំរដូវកាលឆ្នាំ២០១៨ កំពុងតែមានបញ្ហារបួសប្រេះឆ្ពឹងដៃខាងឆ្វេង ហើយរបួសនេះគំរាមកំហែងដល់កៅអីក្នុងក្រុមជម្រើសជាតិរបស់គេក៏ដូចជាឱកាសក្នុងការជួយក្លិបរបស់ខ្លួននៅដើមឆ្នាំ២០១៩ខាងមុខដែរ។
កីឡាកររូបនេះបានលើកឡើងថា «ខ្ញុំមិនទាន់ច្បាស់ ១០០% ថានឹងអាចជួយណាហ្គាវើលដ៍ ដែលមានភារកិច្ច លេងពានAFC Cup នាចុងខែ កុម្ភៈ ខាងមុខទេ ដោយរង់ចាំការតាមដានរបួសសិន ប៉ុន្តែអ្វីដែលច្បាស់ការ គឺ របួសបានធូរស្រាលច្រើនពីមួយថ្ងៃទៅមួយថ្ងៃ»។ កីឡាករ ស៊ូ យ៉ាទី ទើបតែជាពីរបួសរហែកសាច់ដុំក្រោយធ្វើដំណើរទៅដល់ណាហ្គាវើល កាលពីខែកក្កដា កន្លងទៅ។
ក្រុមណាហ្គាវើលស្ថិតនៅពូល F ក្នុងវគ្គជម្រុះតាមពូលនៃពានរង្វាន់ AFC Cup 2019 ជាមួយក្រុម Hanoi FC ( ម្ចាស់ជើងឯកលីគកំពូលវៀតណាម ) Tampines Rovers ( ជើងឯករងលីគកំពូលសិង្ហបុរី ) និង Yangon United ( ជើងឯកលីគកំពូលមីយ៉ាន់ម៉ា) ឬ Zwekapin United ក្រុមលេខ៣នៅលីគមីយ៉ាន់ម៉ាដូចគ្នា។ តាមគម្រោងការប្រកួតនឹងចាប់ផ្ដើមនាខែ កុម្ភៈ ដើមឆ្នាំក្រោយតាមរូបមន្តវិលជុំសន្សំពិន្ទុ សរុបស្មើ៦ប្រកួត (ក្នុងដីនិងក្រៅដី) ដើម្បីយកតែមួយក្រុមឡើងទៅវគ្គបន្ត ដោយគ្រោងនឹងបញ្ចប់ការប្រកួតទាំងមូលនៅដើមខែតុលា ឆ្នាំ២០១៩។ នេះជាឆ្នាំទី១ សម្រាប់ណាហ្គាវើល ក្នុងការប្រកួតនៅវគ្គបែងចែកពូលបន្ទាប់ពីបានក្លាយជាម្ចាស់ជើងឯកលីគកំពូលកម្ពុជា ឆ្នាំ២០១៨ ខណៈកាលពីឆ្នាំ២០១៧ ធ្លាប់បានចូលរួមប្រកួតម្តងតែត្រូវប្រកួតជម្រុះនៅវគ្គជម្រុះបឋម។
និយាយពី ស៊ូ យ៉ាទី រូបគេបានចាប់អាជីពជាអ្នកចាំទីដំបូងជាមួយក្រុមបៀលប្រាយ នៅឆ្នាំ២០១៦ដល់២០០៧ ខណៈនៅឆ្នាំ២០០៩ ដល់២០១៣ រូបគេចូលរួមជាមួយក្រុមក្រសួងការពារជាតិ និងពីឆ្នាំ២០១៣ ដល់២០១៥ គេផ្លាស់ទៅក្រុមភ្នំពេញក្រោន និងពីឆ្នាំ២០១៥ ដល់បច្ចុប្បន្ន ចូលរួមជាមួយបឹងកេត។ ចាប់ពីឆ្នាំ២០១២ ដល់បច្ចុប្បន្នរូបគេជាប់ឈ្មោះក្នុងក្រុមជម្រើសជាតិកម្ពុជា ពីឈុត U22 ដល់ឈុតធំផងដែរ។
មុនមានការវិវត្តន៍អាជីពរបស់ខ្លួនពីក្លិបមួយទៅក្លិបមួយ ស៊ូ យ៉ាទី ធ្លាប់ឈ្នះពានរង្វាន់សម្តេចតេជោ ហ៊ុន សែន ឆ្នាំ២០១០ ជាមួយក្រសួងការពារជាតិ ហើយនៅឆ្នាំ២០១៤ ឈ្នះជើងឯកពានរង្វាន់លីគកំពូលកម្ពុជា ជាមួយភ្នំពេញក្រោន ខណៈនៅឆ្នាំ២០១៦និង២០១៧ ឈ្នះជើងឯកលីគកំពូលកម្ពុជា ជាមួយបឹងកេតម្តង។ នៅឆ្នាំ២០១៥ គេធ្លាប់ឈ្នះជើងឯករងពានរង្វាន់ 2015 Mekong Club Championship ជាមួយបឹងកេត ក្រោយចាញ់ក្រុមថៃ Buriram United ១ទល់០។ ចំណែកពានរង្វាន់ឯកត្តជនវិញគេធ្លាប់ឈ្នះពានរង្វាន់ស្រោមដៃមានលីគកំពូលកម្ពុជាឆ្នាំ២០១៤ និង២០១៧ ផងដែរ ខណៈក្នុងពាន 2015 Mekong Club Championship ឈ្នះស្រោមដៃមាសដូចគ្នា៕
Source: Kampuchea Thmey Daily
0 Comments