ក្នុងនាមជាម្ចាស់ជើងឯកនៃពានរង្វាន់លីគកំពូលកម្ពុជា (Metfone Cambodian League 2018) ក្លិបណាហ្គាវើល បានចាប់ឆ្នោតស្ថិតនៅពូល F ជាមួយក្រុមខ្លាំងដល់ទៅ៣ពីតំបន់អាស៊ានផ្សេង ទៀតសម្រាប់ការប្រកួតក្នុងពានរង្វាន់កម្រិតទី២ប្រចាំទ្វីបអាស៊ី គឺAFC Cup 2019 ខណៈក្រុមមួយនេះបានដាក់ផែនការចេញទៅប្រកួតមិត្តភាពកម្តៅសាច់ដុំដកស្រង់បច្ចេកទេសនៅប្រទេសថៃ មុនព្រឹត្តិការណ៍នេះមកដល់។
បើតាមផែនការរបស់ក្លិបគឺលោក មាស ចាន់ណា ដែលជាគ្រូបង្វឹកនឹងដឹកនាំកីឡាករទាំងខ្មែរនិងបរទេសដែលកំពុងធ្វើតេស្តសមត្ថភាពទៅប្រទេសថៃ ចាប់ពីថ្ងៃទី៨ដល់១៥ ខែមករា ឆ្នាំ២០១៨ ខាងមុខ ពោលគឺត្រៀមប្រកួតមិត្តភាព៣ឬ៤ប្រកួតនៅទីនោះ។ ចំណែកក្រុមរបស់ម្ចាស់ផ្ទះដែលបានណាត់ប្រកួតជាមួយណាហ្គាវើល មានដូចជាTrat F.C, BG Pathum United F.Cនិងក្រុមសាកលវិទ្យាល័យមួយទៀត។
សូមបញ្ជាក់ថា យោងតាមការចាប់ឆ្នោតដែលបានធ្វើនៅទីក្រុងកូឡាឡាំពួរ ប្រទេសម៉ាឡេស៊ី ថ្មីៗនេះសង្កេតឃើញថា ក្រុមណាហ្គាវើល ស្ថិតនៅពូល F ជាមួយក្រុម Hanoi FC (ម្ចាស់ជើងឯកលីគកំពូលវៀតណាម) ក្រុមTampines Rovers ( ជើងឯករងលីគកំពូលសិង្ហបុរី ) និង Yangon United ( ជើងឯកលីគកំពូលមីយ៉ាន់ម៉ា) ឬ Zwekapin United ក្រុមលេខ៣នៅលីគមីយ៉ាន់ម៉ាដូចគ្នា។
តាមគម្រោងការប្រកួតនឹងចាប់ផ្ដើមនាខែ កុម្ភៈ ដើមឆ្នាំក្រោយតាមរូបមន្តវិលជុំសន្សំពិន្ទុ សរុបស្មើ៦ប្រកួត (ក្នុងដីនិងក្រៅដី) ដើម្បីយកតែមួយក្រុមឡើងទៅវគ្គបន្ត ដោយគ្រោងនឹងបញ្ចប់ការប្រកួតទាំងមូលនៅដើមខែតុលា ឆ្នាំ២០១៩។ នេះជាឆ្នាំទី១ សម្រាប់ណាហ្គាវើល ក្នុងការប្រកួតនៅវគ្គបែងចែកពូលបន្ទាប់ពីបានក្លាយជាម្ចាស់ជើងឯកលីគកំពូលកម្ពុជា ឆ្នាំ២០១៨ ខណៈកាលពីឆ្នាំ២០១៧ ធ្លាប់បានចូលរួមប្រកួតម្តងតែត្រូវប្រកួតជម្រុះនៅវគ្គជម្រុះបឋម។
ងាកទៅមើលប្រវត្តសាស្ត្រវិញក្រុមណាហ្គាវើល ធ្លាប់ឈ្នះជើងឯកពានរង្វាន់លីគកំពូលកម្ពុជា ចំនួន២លើកដែរគឺនៅឆ្នាំ២០០៧និង២០០៩។ គិតត្រឹមដឹកនាំក្រុមណាហ្គាវើល ពីឆ្នាំ២០១៥ មកលោក មាស ចាន់ណា តែងតែបង្ហាញថាក្រុមខ្លួនជាបេក្ខជនមួយដែលមិនអាចរំលងបានក្នុងការប្រជែងយកជើងឯក។ ជាក់ស្តែងគឺឆ្នាំ២០១៥ ទទួលបានជើងឯករងលីគកំពូលកម្ពុជា ក្រោយចាញ់បឹងកេត នៅវគ្គផ្តាច់ព្រ័ត្រដោយបាល់ប៉េណាំងទីកាត់សេចក្តី៣ទល់២ និងជើងឯករងពានរង្វាន់សម្តេចតេជោ ក្រោយចាញ់ព្រះខ័នរាជស្វាយរៀង។ ឆ្នាំ២០១៦ ណាហ្គាវើល ឈរចំណាត់ថ្នាក់លេខ៣ព្រមទាំងមានឱកាសទៅលេងវគ្គជម្រុះបឋមនៃពានរង្វាន់ AFC Cup 2017 ផងដែរ។ ឆ្នាំ២០១៧ ណាហ្គាវើល បានត្រឹមលេខ៣ក្រោយចាញ់ក្រសួងការពារជាតិ នៅវគ្គជម្រុះលីគកំពូលកម្ពុជា ខណៈពានរង្វាន់សម្តេចតេជោ ក្រុមនេះបានត្រឹមជើងឯករងក្រោយចាញ់ព្រះខ័នរាជស្វាយរៀង នៅវគ្គផ្តាច់ព្រ័ត្រ៕
Source: Kampuchea Thmey Daily
0 Comments