ពានរង្វាន់​បាល់ទាត់​លី​គ​យុវជន​និង​កុមារ AIA-ISF Youth League 2018 ដំណើរការ​ប្រកួត​៦​ខែ​

​កម្មវិធី​បាល់ទាត់​បែប​សហគមន៍​ធំ​AIA-ISF Youth League 2018 ដែល​រៀបចំឡើង​ដោយ​អង្គការ​ផ្កាយ​សមុទ្រ បាន​បើក​ការប្រកួត​ផ្លូវការ​កាលពី​ចុង​សប្ដាហ៍​កន្លងទៅ​ដោយមាន​ក្រុម​ចូលរួម​ចំនួន​១០០​ក្រុម មកពី​បណ្ដា​អង្គការ​ទាំងអស់​ទូទាំង​រាជា​ធានី​ភ្នំពេញ ព្រមទាំង​គ្រោង​រៀបចំ​រយៈពេល​ប្រកួត​៦​ខែ​។



​កម្មវិធី​បាល់ទាត់​បាល់ទាត់​បែប​មហា​ជននេះ​ធ្វើឡើង​នៅ​ទីលានកីឡា​បាល់ទាត់​រប​ស់​អង្គការ​ផ្កាយ​សមុទ្រ នៅ​ភូមិ​ព្រះ​ធាតុ​នៃ​រាជធានី​ភ្នំពេញ​។ ការប្រកួត​បាល់ទាត់​វិលជុំ AIA-ISF Youth League គឺជា​កិច្ចការ​រួមគ្នា​មួយ​រវាង​អង្គការ​សប្បុរស​ផ្កាយ​សមុទ្រ ជាមួយ​ដៃគូ​ឧបត្ថម្ភ​ដោយមាន​ការគាំទ្រ​បច្ចេកទេស​ពី​ក្លឹប​បាល់ទាត់ Tottenham Hotspur ("Spurs") នៅ​លី​គ​កំពូល​ប្រទេស​អង់គ្លេស​។

​លោក Leo Brogan សមាជិក​ក្រុមប្រឹក្សាភិបាល​នៃ​អង្គការ​ផ្កាយ​សមុទ្រ បាន​ថ្លែងប្រាប់​អ្នកសារព័ត៌មាន​នៅក្នុង​ពិធី​បើក​កាលពី​ថ្ងៃអាទិត្យ ទី​៩ ខែធ្នូ ឆ្នាំ​២០១៨ ថ្មីៗ​នេះ​ថា «​ភាពជា​ដៃគូ​ជាមួយ​ម្ចាស់​ឧបត្ថម្ភ​បាន​ជួយ​យើង​ឲ្យ​ទទួល​បាន​អ្វី ដែល​យើង​មាន​ថ្ងៃនេះ ដែលមាន​ឥទ្ធិពល​ដល់​ជីវិត​កុមារ​រាប់ពាន់នាក់ និង​ក្រុមគ្រួសារ​របស់​ពួកគេ​ឲ្យ​មាន​ជីវភាព​កាន់តែ​ប្រសើរឡើង​។ យើង​អរគុណ និង​អបអរសាទរ​ដល់ដៃ​គូ​សហការ​របស់​យើង​ក៏ដូចជា​ក្រុមបាល់ទាត់ Spurs សម្រាប់​ការខិតខំ​ប្រឹងប្រែង​ក្នុង​ការលើក​កំពស់​បុព្វហេតុ​របស់​យើង ហើយ​យើង​សង្ឃឹម​យ៉ាង​មុតមាំ​ថា​ការប្រកួត AIA-ISF Youth League នៅ​ឆ្នាំនេះ នឹង​ទទួលបាន​លទ្ធផល​កាន់តែច្រើន​ថែមទៀត​»​។​



លោក Anton Blackwood គ្រូបង្វឹក​ម្នាក់​ក្នុងចំណោម​គ្រូបង្វឹក​តំណាង​ក្លិប Spurs ពីររូប មានការ​ចាប់អារម្មណ៍​យ៉ាងខ្លាំង​ចំពោះ​ការខិតខំ​របស់​គ្រូបង្វឹក និង​ចំណង់​ចំណូលចិត្ត​របស់​កីឡាករ​ទាំងឡាយ​។ លោក​បានផ្តល់​ការហ្វឹកហាត់​គន្លឹះ​មួយចំនួន​ដល់​គ្រូបង្វឹក​អង្គការ​ផ្កាយ​សមុទ្រ​។ ដោយ​ឃើញ​ភាព​រីករាយ​របស់​កុមារ​ជាច្រើន​នៅទីនេះ លោក​មានការ​ជឿជាក់ថា​គ្រូបង្វឹក​ទាំងអស់​កំពុង​ប្រើប្រាស់​ឱកាស​ដែល​ការប្រកួត​នេះ​ផ្តល់​ឲ្យ​ដើម្បី​បង្កើន​ជំនាញ និង​ក្តី​ស្រលាញ់​ចំពោះ​កីឡាបាល់ទាត់​។ នេះ គឺជា​គំរូ​ចីរភាព​មួយ ដែល​ដៃគូ​ឧបត្ថម្ភ​និង Spurs ចង់បាន ហើយ​ស​ង្ឃឹម​ថា​គ្រប់គ្នា​រីករាយ​ណាស់​ដែល​បាន​ឃើញ​វា​នៅ​ក្នុង​ការ​ប្រកួត​នេះ​៕

Source: Kampuchea Thmey Daily