ភ្នំពេញ ៖ ចៅសង្កត់បាក់ខែង ខណ្ឌជ្រោយចង្វា កាលពីរសៀលថ្ងៃទី១១ ធ្នូ ត្រូវបានកម្លាំងសមត្ថកិច្ចនគរបាលការិយាល័យកម្រិតធ្ងន់រាជធានីភ្នំពេញ នាំខ្លួនទៅតុលាការ ដើម្បីសាកសួរពាក់ព័ន្ធពីបទក្លែងបន្លំឯកសាធារណៈ និងលួចលក់អចលនវត្ថុអ្នកដទៃ។
ជនជាប់នេះឈ្មោះ ឆែ សូនី ភេទប្រុស អាយុ៦៧ឆ្នាំ មុខរបរជាចៅសង្កាត់រង សាលាសង្កាត់បាក់ខែង មានទីលំនៅភូមិក្ដីចាស់ឃុំបាក់ខែង ស្រុកមុខកំពូល ខេត្តកណ្តាល (មុនកាត់ចូលរាជធានីភ្នំពេញ) ។
គេបានសង្កេតឃើញថា នៅពេលសមត្ថកិច្ចនគរបាលព្រហ្មទណ្ឌ នាំខ្លួនលោកចៅ សង្កាត់បាក់ខែង ទៅជូនដល់ដៃស៊ើបសួរ បានមួយដង្ហើមចង្រិត លោកចៅសង្កាត់រូបនោះ ចុះពីជាន់ទី៤ នៃអគារសាលាដំបូង ដើរសំដៅយ៉ាងលឿនឡើង ជិះរថយន្តទំនើបចេញទៅវិញបាត់ ដោយមិនរំខានដល់សមត្ថកិច្ចទៀតទេ។
ប្រភពព័ត៌មានបានឲ្យដឹងថា លោក ប៊ុន ធី ចៅក្រមស៊ើបសួរសាលាដំបូងរាជធានីភ្នំពេញ បានចេញដីកាបង្គាប់ឲ្យនាំខ្លួនលោក ឆៃ សូនី ចៅសង្កាត់បាក់ខែង ដើម្បីសាកសួរលើសំណុំរឿង.ក្លែងបន្លំឯកសាធារណៈ និងលួចលក់អចលនវត្ថុអ្នកដទៃ ប្រព្រឹត្តនៅរាជធានីភ្នំពេញ កាលពីថ្ងៃទី១១ សីហា ២០១៧ ។ ដីកាបង្គាប់ឲ្យនាំខ្លួន យល់ឃើញថា ជនត្រូវចោទឈ្មោះ ឆៃ សូនី ត្រូវបានតុលាការចេញដីកាបង្គាប់ឲ្យចូលខ្លួនចំនួន៣លើករួចហើយ ប៉ុន្តែជនត្រូវចោទមិនបានចូលបង្ហាញខ្លួនតាមកាលកំណត់នោះទេ ដោយមានពាក្យសុំពន្យារពេលរហូត ហើយពាក្យសុំពន្យារពេលក៏ពុំមានហេតុផលសមរម្យដែរ ដែលនាំឲ្យនីតិវិធីកាន់តែអូសបន្លាយ។ ដូច្នេះដើម្បីធានាដល់ការស៊ើបសួរឲ្យបានពេញលេញ គប្បីសម្រេចនាំខ្លួនឈ្មោះ ឆែ សូនី មកចំពោះមុខចៅក្រមស៊ើបសួរ ដើម្បីបំភ្លឺការពិត។
ក្រោយពីសាកសួរចៅសង្កាត់បាក់ខែងបាន១ដង្ហើមចង្រិតចប់សព្វគ្រប់ លោកចៅក្រម ប៊ុន ធី បានពន្លយឲ្យដឹងថា គាត់អាយុច្រើនហើយ ឃុំគាត់មិនកើត តែនីតិវិធី យើងបានសួរគាត់ចប់ហើយ តែដោយសារហៅគាត់ច្រើនដងមិនចូល ទើបចេញដីកាបង្គាប់ឲ្យសមត្ថកិច្ចនាំខ្លួនតែម្ដង៕
Source: Kampuchea Thmey Daily
0 Comments