ភ្នំពេញ ៖ ក្រោយពីការព្រមានមិនឲ្យទទួលយកការដកបម្រាមនយោបាយនោះ និងសកម្មភាពមួយចំនួនដែលផ្ទុយពីលក្ខន្តិកៈគណបក្សរបស់លោក សម រង្ស៊ី នោះ ក្រុមអតីតថ្នាក់ដឹកនាំបក្សប្រឆាំងបានចេញសេចក្តីថ្លែងការណ៍មួយសម្តែងការសោកស្តាយចំពោះអាកប្បកិរិយាក្រអឺតក្រទម ហើយថានេះជាការបំពារបំពានម្ដងហើយម្ដងទៀត ទៅលើថ្នាក់ដឹកនាំអតីតគណបក្សសង្គ្រោះជាតិទាំងអស់ ក្រោយពីបានធ្វើបក្សប្រហារ និងប្រកាសខ្លួនឯងថា ជាប្រធានស្តីទីខ្យល់ តាមរយៈសន្និសីទខុសលក្ខន្តិកៈបក្សកាលពីដើមខែធ្នូ។
សេចក្តីថ្លែងការណ៍នេះ បានធ្វើឡើងក្រោយពីលោក សម រង្ស៊ី បានបង្ហោះសារនយោបាយមួយលើបណ្តាញសង្គមហ្វេសប៊ុករបស់ខ្លួនថា បើអតីតមន្ត្រីគណបក្សសង្គ្រោះជាតិណាម្នាក់ ព្រមទទួលយកការដកបំរាមធ្វើនយោបាយ គឺជាជនក្បត់បក្សសង្គ្រោះជាតិ។
សេចក្តីថ្លែងការណ៍ចុះថ្ងៃទី១១ ខែធ្នូ បានលើកឡើងថា គណបក្សមានការសោកស្តាយជាខ្លាំង ចំពោះអាកប្បកិរិយាក្រអឺតក្រទម និងបំពារបំពានម្ដងហើយម្ដងទៀតរបស់លោក សម រង្ស៊ី មកលើគណបក្ស ក៏ដូចជាមកលើថ្នាក់ដឹកនាំអតីតគណបក្សសង្គ្រោះជាតិទាំងអស់នៅក្នុងពេលប៉ុន្មានថ្ងៃចុងក្រោយនេះ ដែលនេះគឺជាទង្វើដ៏អសីលធម៌ និងគ្មានគុណធម៌របស់លោក សម រង្ស៊ី ក្រោយពីខ្លួនបានធ្វើបក្សប្រហារ និងប្រកាសខ្លួនឯងថា ជាប្រធានស្តីទីខ្យល់នៃអតីតគណបក្សសង្គ្រោះជាតិ តាមរយៈសន្និសីទខុសលក្ខន្តិកៈបក្សកាលពីដើមខែធ្នូរួចមក។
តាមអតីតគណបក្សសង្គ្រោះជាតិ លោក កឹម សុខា នៅតែជាប្រធានស្របច្បាប់របស់អតីតគណបក្សសង្គ្រោះជាតិ ហើយគណៈកម្មការចំពោះកិច្ចមិនទទួលស្គាល់លទ្ធផលនៃសន្និសីទរបស់ក្រុមក្បត់បក្សមួយក្រុមតូច ដែលអះអាងថា ជាតំណាងគណបក្សនោះឡើយ។ លោក សម រង្ស៊ី ដែលបានធ្វើសកម្មភាព និងនិយាយក្នុងនាមគណបក្សសង្គ្រោះជាតិ គឺគ្មានតម្លៃតំណាងផ្លូវច្បាប់របស់គណបក្សឡើយ ព្រោះលោក សម រង្ស៊ី បានលាលែងពីប្រធានគណបក្ស និងលះបង់សមាជិកភាពថែមទៀតផង។ ដូច្នេះការវិលត្រឡប់មកដឹកនាំគណបក្សសង្គ្រោះជាតិវិញ របស់លោក សម រង្ស៊ី គឺគ្មានការទទួលស្គាល់ និងមិនត្រឹមត្រូវតាមច្បាប់ឡើយ។
ជាមួយគ្នានោះ សេចក្តីថ្លែងការណ៍បានថ្កោលទោស ហើយបានហៅសម្តីលោក សម រង្ស៊ី ថា ជាសម្តីញុះញង់ និងបង្កបញ្ហា ដោយសាបានហៅអ្នក ដែលនឹងទទួលបានការលើកលែងចំពោះការហាមឃាត់ការធ្វើនយោបាយថា ជាជនក្បត់ជាតិក្បត់បក្ស។ សេចក្តីថ្លែងការណ៍បញ្ជាក់ថា នេះកាន់តែបង្ហាញច្បាស់ថា លោក សម រង្ស៊ី កំពុងតែប្រមាថថ្នាក់ដឹកនាំគណបក្សសង្គ្រោះជាតិ និងប៉ុនប៉ងទប់ស្កាត់មិនឲ្យមានការលើកលែងការហាមឃាត់សិទ្ធិធ្វើនយោបាយរបស់ថ្នាក់ដឹកនាំទាំង១១៨រូបនៃគណបក្សសង្គ្រោះជាតិ ក៏ដូចជាការដោះលែងលោក កឹម សុខា ពីការឃុំខ្លួន ព្រោះខ្លាចថា ខ្លួនគ្មានឱកាសធ្វើជាប្រធានស្ដីទីបក្សសង្គ្រោះជាតិខ្យល់បន្តទៀត។ នេះជាកលល្បិចដ៏ស្មោគគ្រោកបំផុត។
សូមបញ្ជាក់ថា ស្របពេលរដ្ឋសភារៀបចំដំណើរការសេចក្តីស្នើវិសោធនកម្មច្បាប់ ដែលនឹងផ្តល់សិទ្ធិពេញលេញក្នុងការធ្វើនយោបាយដល់អតីតថ្នាក់ដឹកនាំ អតីតគណបក្សសង្គ្រោះជាតិឡើងវិញនោះ លោក សម រង្ស៉ី មេចលនាសង្គ្រោះជាតិ បានព្រមានដល់អតីតថ្នាក់ដឹកនាំរបស់ខ្លួន មិនឲ្យទទួលយកការដកបម្រាមនេះឡើយ ហើយប្រកាសថា បើសិនជាមាននរណាម្នាក់ទទួលយកការដកបម្រាមនេះ អ្នកនោះគឺជាជនក្បត់បក្សតែម្តង។
រាជរដ្ឋាភិបាលកម្ពុជា តាមរយៈក្រសួងការបរទេស កាលពីថ្ងៃទី០៣ ខែធ្នូ ឆ្នាំ២០១៨ បានប្រកាសពីការសម្រួលស្ថានការណ៍នយោបាយ ក៏ដូចជាសម្រួលដល់ប្រព័ន្ធផ្សព្វផ្សាយបរទេសនៅកម្ពុជា អង្គការសង្គមស៊ីវិល និងសហជីពជាដើម ហើយបើតាមសេចក្តីថ្លែងការណ៍នោះ រាជរដ្ឋាភិបាលកម្ពុជា នឹងសិក្សាផ្លូវច្បាប់ដើម្បីដកបម្រាមធ្វើនយោបាយ ពីអ្នកនយោបាយដែលតុលាការកាត់ទោស ដែលសំដៅបើកផ្លូវឱ្យអតីតថ្នាក់ដឹកនាំរបស់អតីតគណបក្សសង្គ្រោះជាតិបានធ្វើនយោបាយឡើងវិញ។ ចំណែករដ្ឋសភា ក៏បានសម្រេចធ្វើវិសោធនកម្មច្បាប់គណបក្សនយោបាយ ដើម្បីដែលបើកផ្លូវឱ្យអតីតថ្នាក់ដឹកនាំនៃអតីតគណបក្សសង្គ្រោះជាតិ មានសិទ្ធិពេញលេញក្នុងការធ្វើនយោបាយឡើងវិញផងដែរ។
ទាក់ទងបញ្ហានេះ លោក សុខ ឥសាន អ្នកនាំពាក្យគណបក្សប្រជាជនកម្ពុជាបានអះអាងថា លោក សម រង្ស៊ី បានលាលែងពីគណបក្សសង្គ្រោះជាតិអស់ហើយ ដូច្នេះបើលោក សម រង្សីនៅតែនិយាយថា ខ្លួនជាតំណាងមន្ត្រីជាប់បម្រាមនយោបាយទាំង១១៨រូបនោះ គឺជាការនិយាយភូតកុហក និងបោកប្រាស់សុទ្ធសាធ។
លោក សុខ ឥសាន លើកឡើងយ៉ាងនេះថា “ក្រោយពីបានលាលែងពីសមាជិកបក្ស និងពីប្រធានបក្សសាងគ្រោះជាតិតាំងពីឆ្នាំ២០១៧រួចមក ទណ្ឌិតសម រង្សី លែងជាតំណាងអ្នកណាទាំងអស់។ ដូច្នេះការដែលទណ្ឌិត សម រង្សី នៅតែនិយាយថា ខ្លួនជាតំណាងមន្ត្រីជាប់បម្រាមនយោបាយទាំង១១៨រូបនោះ គឺជាការនិយាយភូតកុហក និងបោកប្រាស់ ប្រាស់ចាកពីការពិតសុទ្ធសាធ ។ ឥឡូវនេះ ទោះបីទណ្ឌិត សម រង្សី ត្រូវបានសន្និសីទពិភពលោកខុសច្បាប់លើកដៃឲ្យធ្វើជាប្រធានស្តីទីអតីតបក្សប្រឆាំងយ៉ាងណាក៏ដោយ ក៏ទណ្ឌិត សម រង្សី នៅតែមិនមែនជាតំណាងអ្នកណាទាំងអស់ ពីព្រោះលែងមានទំនាក់ទំនងជាមួយអតីតបក្សប្រឆាំងទៀតហើយ”៕
Source: Kampuchea Thmey Daily
0 Comments