សម្តេចនាយករដ្ឋមន្ត្រី ហ៊ុន សែន បានបង្កើតព្រឹត្តិការណ៍ថ្មីមួយដែលធ្វើឱ្យពលរដ្ឋខ្មែរជាពិសេសស្រទាប់យុវវ័យបែរមករកការអានសៀវភៅ

ភ្នំពេញ ៖ ការតាំងពិព័ណ៌សៀវភៅឆ្នាំនេះ បានកក្រើកដល់សិស្ស និស្សិត និងអ្នកនិយមអានសៀវភៅ ព្រោះ សម្ដេចអគ្គមហាសេនាបតីតេជោ ហ៊ុន សែន បានរៀបចំឲ្យមានព្រឹត្តិការណ៍នេះឡើង ព្រមទាំងចែកជូនសៀវភៅដោយឥតគិតថ្លៃនូវស្នាដៃដ៏ល្អឯករបស់អ្នកប្រាជ្ញវោហារសាស្ត្រខ្មែរ និងទស្សនៈល្អៗ ជួយអប់រំទាំងផ្លូវកាយ និងផ្លូវចិត្ត សេចក្តីពន្យល់នានា ដែលនាំទៅរកសេចក្តីសុខផងដែរ។

សម្ដេចនាយករដ្ឋមន្ត្រី ហ៊ុន សែន បានបង្កើតព្រឹត្តិការណ៍ថ្មីមួយដែលធ្វើឲ្យពលរដ្ឋខ្មែរ ជាពិសេសស្រទាប់យុវវ័យ បែរមករកការអានសៀវភៅភ្លាមៗ ស្ទើរតែមិនគួរឲ្យជឿ។

ព្រោះ សិស្ស និស្សិត ព្រះសង្ឃ និងមហាជនរាប់ម៉ឺននាក់ បានសម្រុកចូលទៅបណ្ណាល័យជាតិ ដែលនៅក្បែរវត្តភ្នំ បានធ្វើឲ្យអ្នកនិពន្ធ និងអ្នកលក់សៀវភៅទាំងអស់ មានក្តីសង្ឃឹមឡើងវិញ ព្រោះឃើញចរន្តអ្នកអានកើនឡើងយ៉ាងគំហុក មិននឹកស្មានដល់។

ជាមួយគ្នានោះដែរ លោកស្រី ខ្លូត វិបុលឡា ប្រធានបណ្ណាល័យជាតិកម្ពុជា បានមានប្រសាសន៍ថា លោកស្រីសប្បាយចិត្តខ្លាំងណាស់ឆ្នាំនេះ ព្រោះ "អំណោយសៀវភៅរបស់សម្ដេចតេជោ ហ៊ុន សែន ធ្វើឲ្យកក្រើកដល់អ្នកសិក្សាស្ទើរពេញមួយនគរ"។

លោកស្រី បានបន្តថា គ្រាន់តែនៅថ្ងៃទីមួយ អ្នកដែលចូលរួមពិព័ណ៌សៀវភៅ មានដល់ទៅជាង៣ម៉ឺននាក់ មិនធ្លាប់មានទេ ក្នុងប្រវត្តិតាំងពិព័ណ៌សៀវភៅ ក្នុងរយៈពេល៧ឆ្នាំកន្លងមកនេះ។

ព្រោះជាច្រើនឆ្នាំមកហើយ ដែលឪពុកម្តាយ អាណាព្យាបាល និងគ្រូបង្រៀន តែងសម្ដែងក្តីបារម្ភអំពីនិន្នាការរបស់ កូនៗ ក្មួយៗ និងយុវជន ដែលមិនសូវព្យាយាម ក្នុងការសិក្សា ជាពិសេស គឺការអាន ប៉ុន្តែយុទ្ធនាការ ឬជាយុទ្ធសាស្ត្រថ្មីមួយដែលគេពុំបានគិតដល់ ឬពុំធ្លាប់បានធ្វើដោយមេដឹកនាំរូបណាមួយក្នុងប្រវត្តិសិក្សាអប់រំរបស់ខ្មែរ នោះគឺការចែកសៀវភៅទ្រង់ទ្រាយធំដោយឥតគិតថ្លៃពីថ្នាក់ដឹកនាំកំពូលរបស់កម្ពុជា សម្ដេច ហ៊ុន សែន។

លោកស្រីបញ្ជាក់ថា សូមឲ្យអំណោយមនុស្សធម៌ និងទឹកចិត្តដ៏ថ្លៃថ្លានេះ នាំទៅដល់ការពញ្ញាក់ស្មារតីឲ្យកាន់តែផុសផុលដល់យុវជនខ្មែរគ្រប់រូបនាំគ្នា "បែរមករកសៀវភៅ អានសៀវភៅ" ដើម្បីយកចំណេះវិជ្ជាពិតប្រាកដ "ទុកសម្រាប់ជួយខ្លួនឯង ជួយគ្រួសារ និងសង្គមជាតិ។

គួរបញ្ជាក់ផងដែរ កម្មវិធីពិព័រណ៍សៀវភៅកម្ពុជាលើកទី៧ ដោយមានស្តង់ចំនួន១១៤ស្តង់ សម្រាប់ដាក់តាំងបង្ហាញសៀវភៅនានាដែលនាំមកពីបណ្ដាគ្រឹះស្ថានបោះពុម្ពជិត៨០០ ធ្វើនៅបរិវេណបណ្ណាល័យជាតិមានរយៈពេល៣ ថ្ងៃគឺចាប់ពីថ្ងៃទី៧ ដល់៩ ខែធ្នូ ឆ្នាំ២០១៨ នេះ។

កម្មវិធីពិព័រណ៍ដែលតែងតែធ្វើឡើងជារៀងរាល់ឆ្នាំ ខណៈការប្រារព្ធដំបូង ឆ្នាំ២០១១ ដោយមានអ្នកចូលរួមតិច និងចំនួនស្តង់តាំងសៀវភៅតិចតួចនោះ ឥឡូវកំពុងតែទាក់ទាញចំណាប់អារម្មណ៍ទាំងអ្នកចូលរួមបណ្ដាគ្រឹះស្ថានបោះពុម្ព ក៏ដូចជាក្រុមហ៊ុនស្តង់ ស្ពនស័រ កាន់តែច្រើនឡើងពីមួយឆ្នាំទៅមួយឆ្នាំគួរឲ្យកត់សម្គាល់ក្រោមប្រធានបទ(សៀវភៅរស់ចំណេះរីក)៕