ភ្នំពេញ ៖ សមត្ថកិច្ចនគរបាលខណ្ឌឫស្សីកែវ បានធ្វើការស្រាវជ្រាវរហូតឃាត់ខ្លួនបានជនសង្ស័យម្នាក់ ក្នុងចំណោមបក្ខពួក៣នាក់ បន្ទាប់ពីរូបគេ និងបក្ខពួក២នាក់ទៀត ធ្វើសកម្មភាពលួចយកម៉ូតូមួយគ្រឿង ម៉ាកហុងដា F-T-R ពណ៌ទឹកក្រូច ពាក់ស្លាកលេខភ្នំពេញ 1CK-4130 ពីក្នុងបន្ទប់ជនរងគ្រោះ កាលពីវេលាម៉ោង០០និង៣០នាទីរំលងអធ្រាត្រ ឈានចូលថ្ងៃទី៥ ខែធ្នូ ឆ្នាំ២០១៨ ចំណុចបន្ទប់ជួលលេខ១៧ ផ្លូវលេខ៥ ក្រុមទី៤ ភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ។
បើតាមអធិការនគរបាលខណ្ឌឫស្សីកែវ លោកវរសេនីយ៍ទោ គល់ យី បានឲ្យដឹងថា ជនរងគ្រោះមានឈ្មោះ ទូច ម៉ាថេង ភេទប្រុស អាយុ២២ឆ្នាំ មុខរបរ កម្មករ បច្ចុប្បន្នស្នាក់នៅទីតាំងកើតហេតុខាងលើ។ ចំណែកជនសង្ស័យមាន ឈ្មោះ ញ៉ែម ហៃ ហៅ ហៃ ភេទប្រុស អាយុ១៨ឆ្នាំ មុខរបរ រត់តុការ ស្នាក់នៅផ្ទះភូមិ មិត្តភាព សង្កាត់ឫស្សីកែវ ខណ្ឌឫស្សីកែវ (មានសារធាតុញៀន)។
ប្រភពបន្តថា បន្ទាប់ពីស្រាវជ្រាវកំណត់មុខសញ្ញា សមត្ថកិច្ចធ្វើការឃាត់ខ្លួនបាននៅវេលាម៉ោង១៣និង០០នាទី ថ្ងៃទី១២ ខែធ្នូ ឆ្នាំ២០១៨ នៅភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ។
លោក គល់ យី បានបន្តឲ្យដឹងទៀតថា ក្នុងថ្ងៃទី០៤ធ្នូ ជនរងគ្រោះបានទុកម៉ូតូនៅក្នុងបន្ទប់ជួលលេខ១៧ ដោយបានចាក់សោត្រឹមត្រូវ ហើយជនរងគ្រោះចេញទៅធ្វើការនៅពេលយប់បាត់ លុះរហូតភ្លឺម៉ោង៦និង៣០នាទីព្រឹក ថ្ងៃទី៥ធ្នូ រូបគេបានត្រឡប់ពីធ្វើការវិញ មកបន្ទប់ដែលខ្លួនស្នាក់ ស្រាប់តែឃើញទ្វារបន្ទប់ចំហ ហើយមិនឃើញម៉ូតូ។
ក្រោយកើតហេតុ ជនរងគ្រោះ បានមកដាក់ពាក្យបណ្ដឹងនៅប៉ុស្តិ៍គីឡូម៉ែត្រលេខ៦ ដើម្បីឲ្យសមត្ថកិច្ចជួយអន្តរាគមន៍។ បន្ទាប់ពីទទួលបានបណ្ដឹងពីជនរងគ្រោះហើយនោះ សមត្ថកិច្ចបានស្រាវជ្រាវរហូតឈានដល់ការឃាត់ខ្លួនជនសង្ស័យខាងលើបានម្នាក់យកមកសាកសួរ។
នៅចំពោះមុខសមត្ថកិច្ចជំនាញ ជនសង្ស័យ បានសារភាពថា ខ្លួនពិតជាបានធ្វើសកម្មភាពលួចម៉ូតូខាងលើនោះពិតមែន តែមិនមែនធ្វើតែម្នាក់ឯងទេ គឺមានបក្ខពួកចំនួន២នាក់ផ្សេងទៀត។ បច្ចុប្បន្នជនសង្ស័យ កំពុងត្រូវបានសមត្ថកិច្ចឃាត់ខ្លួននៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញអនុវត្តតាមផ្លូវច្បាប់៕
Source: Kampuchea Thmey Daily
0 Comments