ភ្នំពេញ ៖ ក្រោមប្រធានបទ ”ការអភិវឌ្ឍ សមត្ថភាពផ្នែកគោលនយោបាយបរិស្ថាន តាមរយៈការចែករំលែកចំណេះដឹង និងបទពិសោធន៍” ត្រូវបានលើកយកមកបង្ហាញនៅក្នុងសិក្ខាសាលាមួយដែលរៀបចំឡើងនៅរាជបណ្ឌិត្យសភាកម្ពុជា ក្រោមកិច្ចសហការជាមួយវិទ្យាស្ថានបរិស្ថានកូរ៉េ(KEI)នារសៀលថ្ងៃទី១៤ ខែធ្នូ ឆ្នាំ២០១៨។
លោកបណ្ឌិត យង់ ពៅ អគ្គលេខាធិការ នៃរាជបណ្ឌិត្យសភាកម្ពុជាបានមានប្រសាសន៍ឲ្យដឹងថា សិក្ខាសាលាស្ដីពី ”ការអភិវឌ្ឍន៍សមត្ថភាពផ្នែកគោលនយោបាយបរិស្ថានតាមរយៈការចែករំលែកចំណេះដឹង និងបទពិសោធន៍” គឺជាវេទិកាវិទ្យាសាស្ត្រចំហ ដែលនឹងផ្តល់នូវធាតុចូលកាន់តែច្រើនដល់រាជបណ្ឌិត្យសភាកម្ពុជា ដើម្បីចូលរួមចំណែកជាមួយបណ្ដាក្រសួងស្ថាប័នពាក់ព័ន្ធ នានា របស់រាជរដ្ឋាភិបាលកម្ពុជា ក្នុងការកែលំអ និងកិច្ចគាំពារបរិស្ថាន។
ប្រធានបទដ៏សំខាន់ចំនួនពីរ ដែលបានជ្រើសរើសចេញពីប្រធានបទចំនួន៥ នៃកម្មវិធីសិក្សាគោលនយោបាយបរិស្ថាននៅកម្ពុជា ឆ្នាំ២០១៨នេះ គឺ១-ការគ្រប់គ្រងតំបន់ការពារ និងឧទ្យានជាតិ។ ២- ការគ្រប់គ្រងកាកសំណល់រាវ ដែលត្រូវលើកយកមកពិភាក្សា។
លោកបណ្ឌិត យង់ ពៅ បានបញ្ជាក់បន្ថែមថា លទ្ធផលដែលកើតចេញពីអង្គសិក្ខាសាលានេះរួមមានកិច្ចសហការល្អ និងការចូលរួមពីសំណាក់សិក្ខាកាម ដែលបានសិក្សាតាមប្រព័ន្ធអនឡាញ ចាប់ពីថ្ងៃទី១៤វិច្ឆិកា ដល់ថ្ងៃទី១០ ខែធ្នូ ឆ្នាំ២០១៨។
កិច្ចសហការដ៏ល្អរវាងផ្នែកបណ្ណាល័យ និងបោះពុម្ពផ្សាយ និងវិទ្យាស្ថានបរិស្ថានកូរ៉េ ក្នុងការជំរុញនិងលើកទឹកចិត្តដល់សិក្ខាកាម និងអ្នកពាក់ព័ន្ធនានា ដើម្បីយល់ដឹងពីកម្មវិធីបរិស្ថាន។
កិច្ចគាំទ្រពីប្រធានរាជបណ្ឌិត្យសភាកម្ពុជា និងស្ថាប័នពាក់ព័ន្ធរបស់រាជរដ្ឋាភិបាល ក្នុងការចូលរួមលើកកម្ពស់ការងារបរិស្ថាន ជាមួយនឹងឆន្ទៈដ៏មោះមុតរបស់រាជរដ្ឋាភិបាលកម្ពុជា ក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន ដែលតែងតែបានគាំពារយ៉ាងពេញទំហឹងក្នុងកិច្ចការពារបរិស្ថានទាំងក្នុងកម្រិតជាតិ និងអន្តរជាតិ។
គួរបញ្ជាក់បន្ថែមថា រាជបណ្ឌិត្យសភាកម្ពុជា និងវិទ្យាស្ថានបរិស្ថានកូរ៉េ(KEI) បានព្រមព្រៀងគ្នាលើកិច្ចសហប្រតិបត្តិការគ្នាក្នុងការលើកកម្ពស់ការស្រាវជ្រាវរួមគ្នា។
ចាប់តាំងពី ឆ្នាំ២០១២ រហូតដល់បច្ចុប្បន្ន ស្ថាប័នទាំងពីរបានសហការគ្នា លើការស្រាវជ្រាវរួមគ្នា ការរៀបចំសិក្ខាសាលាកសាងសមត្ថភាព សន្និសីទអន្តរជាតិ ការបោះពុម្ព និងកម្មវិធីសិក្សាគោលនយោបាយបរិស្ថានតាមប្រព័ន្ធអនឡាញ។
ជាមួយគ្នានេះ ភាគីទាំងពីរ បានព្រមព្រៀងគ្នាលើកិច្ចសហប្រតិបត្តិការក្នុងការគាំទ្រ ដល់ដំណើរការកម្មវិធីសិក្សាគោលនយោបាយបរិស្ថានតាមប្រព័ន្ធអនឡាញ នៅកម្ពុជាចាប់តាំងពីឆ្នាំ២០១៦ និងបានបន្តរហូតមកដល់ឆ្នាំ២០១៨នេះ៕
Source: Kampuchea Thmey Daily
0 Comments