អ្នកចាំទី ហែម ស៊ី​ម៉ៃ របស់​ក្លិប​អង្គ​រថា​យ​ហ្គឺ​រ ត្រូវ​សម្រាក​ព្យាបាល​របួស​រហូតដល់​ដើមខែ​ក្រោយ

អ្នកចាំទី ហែម ស៊ី​ម៉ៃ ក្នុង​ក្លិប​អង្គ​រថា​យ​ហ្គឺ​រ (Angkor Tiger FC) ដែលជា​សមាជិក​ក្នុង​ពានរង្វាន់​លី​គ​កំពូល​កម្ពុជា (Metfone Cambodian League) បាន​រង​របួស​អំឡុង​ពេល​ហ្វឹកហាត់​ជាមួយ​មិត្ត​រួម​ក្រុម​កាលពីពេល​ថ្មីៗ ខណៈ​របួស​នេះ​នឹង​រំខាន​ដល់​ការ​បញ្ចេញ​សមត្ថភាព​មុន​ស្វាគមន៍​រដូវ​កាល​ឆ្នាំ​២០១៩ ខាងមុខ។

កីឡាករ ហែម ស៊ី​ម៉ៃ ដែលជា​កីឡាករ​បាល់ទាត់​ផង​និង​ជា​ថៅកែ​ហាង​លក់​សម្ភារៈ​កីឡា​ឈ្មោះថា «Tiger Sport» នេះ​បាន​លើក​ឡើងថា​ ៖ «​តាមពិត​របួស​នេះ​វា​ជា​ម្តង​ហើយ ប៉ុន្តែ​ខ្ញុំ​ហ្វឹកហាត់​១ អាទិត្យ​ចុងក្រោយ​នេះ​ទៅ​ឈឺ​វិញ។ តាម​ការ​ប្រាប់​ពី​គ្រូពេទ្យ ​ខ្ញុំ​ត្រូវ​ព្យាបាល និង​សម្រាក​រហូតដល់​ដើមខែ​មករា ខាងមុខ​ទើប​អាច​ចូល​ហ្វឹកហាត់​បាន​ឡើងវិញ​»​។ យ៉ាងណាក្តី​កីឡាករ​វ័យ​៣០​ឆ្នាំ​រូបនេះ​ទើបតែ​បន្ត​កិច្ចសន្យា​ជាមួយ​ក្លិប​មួយ​រដូវ​កាល​ទៀត​កាលពីពេល​ថ្មីៗ ហើយ​រូបគេ​តាំងចិត្ត​ធ្វើឱ្យ​បាន​ល្អ​ឱ្យ​អស់ពី​លទ្ធផល​នៅ​រដូវ​កាល​ថ្មី​ខាងមុខ​។

កីឡាករ ហែម ស៊ី​ម៉ៃ បាន​ចាប់​អាជីព​ជា​កីឡាករ​បាល់ទាត់​តាំងពី​ឆ្នាំ​២០០៤ មក​ម្ល៉េះ​ដោយ​កាលនោះ​ជា​សមាជិក​ក្នុង​ក្លិប​បៀ​ល​ប្រាយ​យូ​ណាយ​ធី​ត ហើយ​រហូតដល់​ឆ្នាំ​២០១២ រូបគេ​បាន​ផ្លាស់​ទៅលេង​ក្នុង​ក្លិប​គីរីវង់​សុខ​សែន​ជ័យ មុន​ចាក​ចេញទៅ​ចូលរួម​ជាមួយ​ក្រុម​អាស៊ី​អឺរ៉ុប នៅ​ឆ្នាំ​បន្ទាប់។ នៅ​ឆ្នាំ​២០១៤ រូបគេ​បាន​ចូលរួម​ជាមួយ​ក្រុម​ត្រាយ​អាស៊ី​ភ្នំពេញ មុន​ប្ដូរ​ឈ្មោះ​មក​ជា​ខេ​ម​បូ​ឌា​ន​ថា​យ​ហ្គឺ​រ នៅ​ឆ្នាំ​២០១៥ កន្លងទៅ​។ ក្រៅពី​នេះ​រូបគេ​ធ្លាប់​ជា​សមាជិក​ក្នុង​ក្រុម​ជម្រើស​ជាតិ​កម្ពុជា នា​ពេល​កន្លងទៅ​ផងដែរ​។ កីឡាករ​រូប​នេះ​ ធ្លាប់​ឈ្នះ​ពានរង្វាន់​អ្នកចាំទី​ល្អ​នៅ​ឆ្នាំ​២០០៩ ក្នុង​ពានរង្វាន់​សម្តេច​តេ​ជោ ហ៊ុន សែន (Hun Sen Cup) ផងដែរ។

ទោះបី​ខ្លួន​ជា​កីឡាករ​មែន តែ​កីឡាករ​ ហែម ស៊ី​ម៉ៃ ធ្លាប់​បាន​បញ្ចប់​វគ្គ​សិក្សា​គ្រូ​បង្វឹក​គ្រូបង្វឹក​អ្នកចាំទី​កម្រិត​អន្តរជាតិ (MA FIFA Goalkeeping Coaching Course) នៅ​មជ្ឈមណ្ឌល ​និង​សាលា​បាល់ទាត់​ជាតិ​បាទី ដែល​រៀបចំឡើង​ដោយ​សហព័ន្ធ​កីឡាបាល់ទាត់​កម្ពុជា​ សហការ​ជាមួយ​សហព័ន្ធ​កីឡាបាល់ទាត់​អន្តរជាតិ (FIFA) ក្រោម​ការ​បង្ហាត់​បញ្ហា​ពី​គ្រូ​ឧទ្ទេស​បរទេស​ផង​ដែរ៕
​

Source: Kampuchea Thmey Daily