ក្រុមអគ្គីសនីកម្ពុជា បានបង្ហាញក្នុងការបន្ដប្រើប្រាស់ធនធានកីឡាករក្នុងស្រុក សម្រាប់ផែនការយុទ្ធសាស្ដ្ររយៈពេលវែងរបស់ខ្លួន បើទោះបីជារដូវកាលនេះ ក្រុមដែលមានស្ថាប័នរដ្ឋនៅពីក្រោយខ្នងនេះទទួលបានចំណាត់ថ្នាក់មិនសូវល្អទាំងពានរង្វាន់សម្ដេចតេជោ ហ៊ុន សែន និងលីគកំពូលកម្ពុជា នៅឆ្នាំ២០១៨ កន្លងទៅបើធៀបនឹងរដូវកាលដំបូងក្នុងឆ្នាំ២០១៧។
ដោយឃើញស្ថានភាពបែបនេះក្លិប បានដាក់គម្រោងបង្កើនការអភិវឌ្ឍន៍ផ្នែកយុវជនឲ្យកាន់តែខ្លាំងក្នុងយុទ្ធសាស្ដ្ររយៈពេល៥ឆ្នាំ ដើម្បីស៊ីហ្គេម នាឆ្នាំ២០២៣ ទៀតផង។ លោក ប្រាក់ វុទ្ធី គ្រូបង្វឹកក្រុមអគ្គីសនីកម្ពុជា ធ្លាប់បានលើកឡើងថា ថ្នាក់ដឹកនាំអគ្គិសនីកម្ពុជា នឹងមានផែនការបន្ថែមទៀត តែលោកជឿជាក់ថា នឹងមានការនាំយកកីឡាករបរទេសមកពង្រឹងក្រុមឡើយ ពោលគឺរក្សាជំហរប្រើប្រាស់កីឡាករក្នុងស្រុកដដែល ពិសេសគឺការពង្រឹងផ្នែកយុវជនតែម្ដង។
លោកគ្រូបង្វឹករូបនេះបានបន្ថែមថា ៖ «ឥលូវនេះយើងងាកមកចាប់អារម្មណ៍យុទ្ធសាស្ត្រ ៥ឆ្នាំទៅមុខរបស់យើង ដោយផ្ដោតលើការអភិវឌ្ឍយុវជន បានន័យថា យើងអភិវឌ្ឍន៍ពី U17 ទៅ ដែលជាការអភិវឌ្ឍន៍មួយ ឆ្ពោះទៅសម្រេចគោលដៅឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះស៊ីហ្គេម លើកទី៣២។ យ៉ាងហោចណាស់មើលសិនក្រុមយើងបានតែម្នាក់ សម្រាប់ក្រុមជម្រើសជាតិ នាកីឡាស៊ីហ្គេមឆ្នាំ២០២៣ វាគឺជាជោគជ័យរបស់យើងដែរ»។
បច្ចុប្បន្នក្លិបមួយនេះបានរៀបចំកីឡដ្ឋានផ្ទាល់ខ្លួននៅម្ដុំទួលសង្កែ ក្នុងរាជធានីភ្នំពេញ។ ឆ្លងកាត់ការប្រកួតក្នុងពានរង្វាន់លីគកំពូលកម្ពុជា កាលពីរដូវកាលឆ្នាំ២០១៨ កន្លងទៅក្រុមអគ្គីសនីកម្ពុជា បានប្រកួតឈ្នះតែ២លើកហើយស្មើគ្នា៣លើកនិងចាញ់១៧លើកដោយឈរលេខរៀងទី១១ ក្នុងចំណោមក្រុមជាសមាជិកទាំង១២ ពោលគឺនៅពីលើក្រុមបាតតារាងវេស្ទើនភ្នំពេញ។ ចំណែកក្នុងពានរង្វាន់សម្តេចតេជោ ហ៊ុន សែន ក្រុមនេះបានចាញ់ក្រុមភ្នំពេញក្រោន ៦ទល់១ នៅវគ្គ១៦ក្រុមចុងក្រោយ។ កន្លងមកក្លិបមួយនេះធ្លាប់បានដាក់គោលដៅនឹងប្រជែងយកពាន នៅឆ្នាំ២០២០ ខាងមុខ៕
Source: Kampuchea Thmey Daily
0 Comments