ភ្នំពេញ ៖ អគ្គិភ័យមួយ កាលពីវេលាម៉ោង២២និង១០នាទីយប់ ថ្ងៃទី៤ធ្នូនេះ បង្កឲ្យម្ចាស់ផ្ទះស្លាប់ចំណែកកូនស្រីត្រូវបានជួយសង្គ្រោះទាន់។ ហេតុការណ៍នេះបានកើតឡើងនៅចំណុចផ្ទះសង់ថ្មី ក្រុមទី៣ ភូមិដំណាក់ធំ១ សង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ។
ជនរងគ្រោះដែលបាត់បង់ជីវិតក្នុងហេតុការណ៍នេះជាម្ចាស់ផ្ទះឈ្មោះរ៉ូ ម៉ា ភេទប្រុសអាយុ៦៧ឆ្នាំមានសតិមិនល្អរស់នៅតែពីរនាក់កូនស្រីឈ្មោះមុំ អាយុ៣៧ឆ្នាំ ជាមនុស្សមានសតិមិនល្អដូចគ្នា។
តាមសាក្សីបានឲ្យដឹងថា អគ្គិភ័យនេះផ្តើមចេញពី លោកតា រ៉ូ ម៉ា ជក់បារី ហើយបោះកន្ទុយបារីចោលក្នុងផ្ទះ បង្កឲ្យមានអគ្គិភ័យឆាបឆេះឡើង ណាមួយផ្ទះជនរងគ្រោះសង់ពីឈើផង ទើបងាយនឹងឆេះ។
ពេលមានហេតុការណ៍នេះកើតឡើង អាជ្ញាធរបានទូរស័ព្ទទៅរថយន្តពន្លត់អគ្គិភ័យមកជួយបាញ់ពន្លត់អស់ចំនួន៥គ្រឿង ទើបរលត់។
ដោយឡែក ម្ចាស់ផ្ទះត្រូវភ្លើងឆេះខ្លោច និងស្លាប់នៅក្នុងផ្ទះតែម្ដង។ រីឯកូនស្រី ដែលមានសតិមិនល្អដូចឪពុក ទៅរស់នៅជាមួយអ្នកណា បើសតិមិនគ្រប់បែបនេះ ខណៈដែលឪពុកស្លាប់ចោលទៅហើយ៕
Source: Kampuchea Thmey Daily
0 Comments