បាត់ដំបង ៖ បច្ចុប្បន្នពលករខ្មែរភាគច្រើន ដែលបានចេញចូលតាមច្រកអន្តរជាតិ គីឡូ១៣ ( ភ្នំដី ) កំពុងថ្ងួចថ្ងូរយ៉ាងខ្លាំងអំពីការធ្វើសៀវភៅសម្រាប់ឆ្លងដែន ទៅធ្វើការនៅក្នុងប្រទេសថៃ ( BORDER PASS ) ដោយសារតែតម្លៃកប់ពពក ស្មើនឹងអារ ក មូសយកឈាម យ៉ាងដូច្នេះដែរ។
យោងតាមប្រភពមួយចំនួនដែលធ្វើដំណើរឆ្លងកាត់ច្រកអន្តរជាតិគីឡូ១៣ ក្នុងស្រុកសំពៅលូន ខេត្តបាត់ដំបង បានឲ្យដឹងថា ការធ្វើសៀវភៅឆ្លងដែន គឺមានច្រើនកន្លែង ដូចជានៅសាលាស្រុកសំពៅលូន នៅសាលាខេត្តបាត់ដំបង និងនៅប៉ុស្តិ៍ ប៉ូលិសអន្តោប្រវេសន៍ ប្រចាំច្រកតែម្ដង។
ជាទូទៅ តម្លៃស្តង់ដារ ដែលប្រកាស និងចេញដោយលោកអភិបាលខេត្ត ងួន រតនៈ បានបញ្ជាក់យ៉ាងច្បាស់ថា ក្នុងសៀវភៅមួយក្បាលតម្លៃ ៣០.០០០រៀល អាចធ្វើដំណើរចូលបាន៣ខេត្ត ចំពោះខេត្តដែលមានព្រំដែនជាប់នឹងប្រទេសកម្ពុជា ព្រមទាំងមានរយៈពេល១ សប្ដាហ៍ ដោយតម្រូវឲ្យពលករឡើងមកវាយត្រាបន្ត។
ប៉ុន្តែបើតាមប្រភពច្បាស់ការណ៍បានឲ្យដឹងថា ក្នុងតម្លៃ ៣០.០០០រៀលនេះ គឺសម្រាប់តែពលករណាឡើងទៅធ្វើនៅក្នុងសាលាស្រុក ឬសាលាខេត្ត តែប៉ុណ្ណោះ ដោយគ្រាន់តែពួកគាត់មិនអាចរង់ចាំបាន ព្រោះសេវាកម្មវាយូរពេក រហូត១ខែ ឬ១ខែកន្លះឯណោះ ទើបទទួលបានសៀវភៅនោះ ដូច្នេះពួកគាត់ត្រូវរង់ចាំ នេះហើយដែលជាបញ្ហាសម្រាប់ពួកគាត់ដែលមានបំណងចង់ចូលទៅបម្រើការងារនៅក្នុងប្រទេសថៃ។
ដោយឡែក ចំពោះប៉ុស្តិ៍នគរបាលអន្តោប្រវេសន៍ប្រចាំច្រក គឺពលរដ្ឋបានរិះគន់ថា គឺពួកគេមានបំណងកៀបសង្កត់ពលករតែម្ដង ដោយម្នាក់ៗខំប្រឹងអារ ក យកឈាមពីសត្វមូលដ៏តូចល្អិត១ក្បាល នេះក៏អាចថាជាការកំណត់របស់លោកមេប៉ុស្តិ៍ ព្រីណា ហ្សាណូ តែម្ដង ទើបសេនាឆ្វេង ស្តាំ ហ៊ានធ្វើ
ព្រោះតម្លៃលើសៀវភៅ១ក្បាល ចាប់ពី១.២០០បាត ដល់ ១.៩០០បាត ( បូកទាំង សគុណ១០០បាត ផង ) ដោយសារតែធ្វើបានលឿន (៣ថ្ងៃបាន)។
រាល់ទង្វើទាំងនេះ ក៏មានប្រភពមួយចំនួនបានសង្កត់ធ្ងន់ថា វាអាចមានការត្រូវរ៉ូវគ្នា តាមបែបលក្ខណៈប្រព័ន្ធ ដើម្បីបែងចែកផលចំណេញទាំងសងខាង ព្រោះគេបានចោទសួរថា « តើការធ្វើសៀវភៅ ឆ្លងដែរ អាចលឿន ឬ យឺតទៅតាមទឹកលុយមែនដែរឬទេ ? » ព្រោះតម្លៃ ៣០.០០០រៀល ឲ្យពួកគាត់រង់ចាំរាប់ខែ ឯមន្ត្រីអន្តោប្រវេសន៍ដែលយកថ្លៃ ហេតុម្តេចបានជាធ្វើ៣ថ្ងៃរួច? ឯការចុះហត្ថលេខា នៅលើសៀវភៅនោះ សុទ្ធតែលោកអភិបាលខេត្ត ងួន រតនៈ ទាំងអស់ !.. ។
នៅព្រឹកថ្ងៃទី៥ ខែធ្នូ ឆ្នាំ២០១៨ នេះដែរ កម្ពុជាថ្មី បានព្យាយាមទូរស័ព្ទទៅលោកអភិបាលខេត្ត ងួន រតនៈ ក៏ដូចជាលោកវរសេនីយ៍ឯក ព្រីណ ហ្សាណូ ប៉ុន្តែគ្មាននរណាម្នាក់ទទួលខ្សែទូរស័ព្ទឡើយ ព្រោះកម្ពុជាថ្មី ចង់ដឹងថា តើកត្តាអ្វីដែលជំរុញឲ្យនគរបាលអន្តោប្រវេសន៍ តម្លើងថ្លៃសេវាធ្វើសៀវភៅឆ្លងដែនបានយ៉ាងរលូនបែបនេះ ហើយរាល់ទង្វើទាំងនេះ លោក ព្រីណា ហ្សាណូ អាចប្រឈមមុខជាមួយនឹងអង្គភាពប្រឆាំងអំពើពុករលួយដែរឬទេ ?៕
Source: Kampuchea Thmey Daily
0 Comments