ឧត្តរមានជ័យ ៖ នាព្រឹកថ្ងៃទី១១ ខែធ្នូ ឆ្នាំ២០១៨ លោក ឌី រ៉ាដូ អភិបាលរងខេត្ត តំណាង លោក ប៉ែន កុសល្យ អភិបាល នៃគណៈអភិបាលខេត្ត អញ្ជើញជាអធិបតីក្នុងកម្មវិធីអបអរសាទរទិវាជាតិលើកកម្ពស់អនាម័យជនបទ លើកទី៩ ឆ្នាំ២០១៨ នៅវត្តគោកខ្ពស់ ភូមិគោកខ្ពស់ ឃុំគោកខ្ពស់ ស្រុកបន្ទាយអំពិល។
ជាកិច្ចចាប់ផ្ដើម លោក ហាំង ម៉េង អភិបាល នៃគណៈអភិបាលស្រុកបន្ទាយអំពិលអញ្ជើញថ្លែងសន្ទរកថាស្វាគមន៍ និង ធ្វើរបាយការណ៍សង្ខេបជូនគណៈអធិបតី និង អង្គពិធី ដោយសំដែងនូវការអរគុណចំពោះមន្ទីរអភិវឌ្ឍន៍ជនបទ ដែលបានសហការគ្នាជាមួយអង្គការច្រា ជួយដល់ប្រជាពលរដ្ឋយើងខ្ញុំនាពេលកន្លងមក ពិសេសផ្តោតទៅលើអនាម័យជនបទដែលបានជួយនូវសម្ភារៈសម្រាប់ប្រជាពលរដ្ឋក្រីក្ររបស់ខ្ញុំ ដែលអាចឲ្យពួកគាត់មានលទ្ធភាពសាងសង់បង្គន់អនាម័យបាន ដើម្បីភាពស្អាតបាតសម្រាប់គ្រួសារ និងសហគមន៍របស់ពួកគាត់ លោក ហាំង ម៉េង ក៏បានជំរុញបន្ថែមឲ្យបងប្អូនប្រជាពលរដ្ឋទាំងអស់ ដែលស្ថិតនៅក្នុងឃុំគោកខ្ពស់ទាំងអស់ចេះប្រើប្រាស់នូវបង្គន់អនាម័យទាំងអស់គ្នា ដើម្បីបញ្ចៀសនូវជំងឺតម្កាត់នានា និងសុខសុវត្ថិភាពកូនចៅរបស់ពួកគាត់។
លោក ហេង គឹមនឿម ប្រធានអង្គការច្រា ប្រចាំខេត្តឧត្តរមានជ័យក៏បានលើកឡើងផងដែរ សុំឲ្យលោកមេភូមិ អនុភូមិរៀបចំឲ្យមានបង្គន់ខ្លួនឯងជាមុនសិន ដើម្បីជាគំរូល្អដល់បងប្អូនប្រជាពលរដ្ឋ ថ្ងៃនេះយើងបានចែកជូនសម្ភារៈសាងសង់បង្គន់អនាម័យដល់ប្រជាពលរដ្ឋដែលទីទាល់ក្រ ដើម្បីឲ្យគាត់មានលទ្ធភាពបានប្រើប្រាស់នឹងគេ និងការបង្កើននូវភាពស៊ីវិល័យសម្រាប់សហគមន៍យើង។
លោក ឈឹម សុវណ្ណា អនុប្រធានមន្ទីរអភិវឌ្ឍន៍ជនបទខេត្ត អញ្ជើញអានសន្ទរកថាសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានសម្រេចយកថ្ងៃទី១៣វិច្ឆិកា ជារៀងរាល់ឆ្នាំ ជាទិវាជាតិលើកកម្ពស់អនាម័យជនបទ នៅក្នុងព្រះរាជាណាចក្រកម្ពុជារួមជាមួយនឹងទិវាអនាម័យពិភពលោក។
លោក ឌី រ៉ាដូ អភិបាលរងខេត្ត មានប្រសាសន៍ថ្លែងអំណរគុណចំពោះអាជ្ញាធរគ្រប់លំដាប់ថ្នាក់ ដែលជួយដល់ប្រជាពលរដ្ឋយើង ហើយជាពិសេស គឺបានសហការជាមួយអង្គការជាដៃគូក្នុងស្រុករបស់យើងបានជួយ៕
Source: Kampuchea Thmey Daily
0 Comments