ភ្នំពេញ ៖ ដើម្បីបង្កភាពកក់ក្ដៅបន្ថែមទៀតដល់ការសប្បាយកម្សាន្តរបស់ប្រជាពលរដ្ឋ អ្នកដំណើរ ភ្ញៀវជាតិនិងអន្តរជាតិក្នុងឱកាសអបអរសាទរបុណ្យឆ្លងឆ្នាំថ្មី២០១៩នេះកម្លាំងកងរាជអាវុធហត្ថទូទាំងរាជធានីភ្នំពេញបានបង្កើនកិច្ចការពារទ្វេដងជាប្រចាំ២៤ម៉ោងលើ២៤ម៉ោងតែម្ដង។ នេះបើតាមការបញ្ជាក់ឲ្យដឹងពីមន្ត្រីជាន់ខ្ពស់ របស់អាវុធហត្ថរាជធានីនារសៀលថ្ងៃទី៣១ធ្នូ។
ប្រភពបានបន្តថា សកម្មភាពកម្លាំងកងរាជអាវុធហត្ថរាជធានីភ្នំពេញ ថ្ងៃអាទិត្យ ៨រោច ខែមិគសិរ ឆ្នាំច សំរឹទ្ធិស័ក ព.ស២៥៦២ ត្រូវនឹងថ្ងៃទី៣០ និង៣១ខែធ្នូ ឆ្នាំ២០១៨ នេះបានប្តកិច្ចការពារតាមគោលដៅភូមិសាស្ត្ររៀងៗខ្លួនពិសេសតាមគោលដៅសប្បាយភាពផ្សេងៗ។
ដោយឡែកសកម្មភាពកម្លាំងកងរាជអាវុធហត្ថរាជធានីភ្នំពេញមួយចំនួនទៀតបានបន្ត ចុះការពារ សន្តិសុខ សណ្តាប់ធ្នាប់ និងសង្គ្រោះបន្ទាន់ក្នុងពិធីសម្ពោធវិមានអនុស្សាវរីយ៍ នយោបាយ ឈ្នះ ឈ្នះ និងអបអរសាទរខួបលើកទី២០ នៃការបញ្ចប់សង្គ្រាមស៊ីវិលនៅកម្ពុជា។
កម្លាំង អន្តរាគមន៍កងរាជអាវុធហត្ថរាជធានីភ្នំពេញ ក៏ដូចកម្លាំងមូលដ្ឋានខណ្ឌទាំង១២ បានទទួលបទបញ្ជាចេញបេសកកម្ម ការពារ សន្តិសុខ សុវត្ថិភាព ជួយសម្រួលចរាចរ គណៈប្រតិភូជាតិ និងអន្តរជាតិ តាមភូមិសាស្ត្រសំខាន់ៗ ក្នុងរាជធានីភ្នំពេញ។ ដោយឡែកការិយាល័យផ្គត់ផ្គង់ នៃកងរាជអាវុធហត្ថរាជធានីភ្នំពេញ បានដឹកសំភារៈ មានដូចជា បាយ នំប៉័ង ទឹកសុទ្ធ យកទៅចែកជូនដល់កងកម្លាំងដែលកំពុងឈរជើងការពារ សន្តិសុខ នៅវិមានអនុស្សាវរីយ៍ នយោបាយ ឈ្នះ ឈ្នះ។
ក្រៅពីបេសកកម្មការងាររបស់កម្លាំងក្នុងទីបញ្ជាការ កម្លាំងមូលដ្ឋានអាវុធហត្ថខណ្ឌទាំង១២ នៃរាជធានីភ្នំពេញ ក៏បានបន្តចេញល្បាតការពារ សន្តិសុខ សុវត្ថិភាព ជូនបងប្អូនប្រជាពលរដ្ឋ ទាំងនៅលើដងផ្លូវ និងទាំងកំពុងនៅសម្រាន្តលង់លក់ក្នុងគេហដ្ឋាន តាមភូមិសាស្ត្រខណ្ឌរៀងៗខ្លួន នាពេលរាត្រីដោយពុំខ្លាចភាពនឿយហត់៕
Source: Kampuchea Thmey Daily
0 Comments