ការបំពុលចារកម្មរុស្ស៊ី
នៅថ្ងៃទី៤ខែមីនា អតីតភ្នាក់ងារចារកម្មរុស្ស៊ីឈ្មោះ Sergei Skripalនិងកូនស្រីពេញវ័យរបស់គាត់ត្រូវបានគេប្រទះឃើញសន្លប់និងពុលនៅលើកៅអីក្នុងទីក្រុងSalisbury ប្រទេសអង់គ្លេស។
ក្រុងឡុងដ៍បានចង្អុលដាក់ក្រុងមូស្គូហើយនៅខែកញ្ញាបានចេញដីកាចាប់ខ្លួនសកម្មជនរុស្ស៊ីពីរនាក់សម្រាប់ការប៉ុនប៉ងសម្លាប់ឪពុកកូនត្រកូលSkripal។ទោះបីជាយ៉ាងណាក៏ដោយ ក្រុងមូស្គូបានបដិសេធការចោទប្រកាន់ទាំងអស់។
អ្នកទាំងពីរបានរួចជីវិតប៉ុន្តែនៅក្នុងខែមិថុនា ស្ត្រីជនជាតិអង់គ្លេសម្នាក់បានស្លាប់បន្ទាប់ពីប៉ះពាល់ជាមួយសារធាតុគីមីNovichokនៅក្នុងភូមិមួយខាងក្រៅទីក្រុង Salisbury។ ដៃគូរបស់នាងបានធ្លាក់ខ្លួនឈឺជាទម្ងន់។
ជ័យជម្នះរបស់របបស៊ីរី
នៅថ្ងៃទី១៤ខែមេសា កងទ័ពស៊ីរីបានប្រកាសថា កងកម្លាំងប្រឆាំងរបបទាំងអស់ត្រូវបានបណ្តេញចេញពីតំបន់ហ្គោតាភាគខាងកើតជាប់នឹងក្រុងដាម៉ាសបន្ទាប់ពីការវាយលុករយៈពេលពីរខែដែលបណ្តាលឲ្យមនុស្សជាង១,៧០០នាក់ស្លាប់។
វាគឺជាជ័យជម្នះដ៏ធំមួយនៅក្នុងកិច្ចខិតខំប្រឹងប្រែងរបស់រដ្ឋាភិបាលដើម្បីពង្រឹងការគ្រប់គ្រងឡើងវិញបន្ទាប់ពីការបះបោរឆ្នាំ២០១១ដែលបានអូសទាញប្រទេសទាំងមូលឲ្យធ្លាក់ចូលទៅក្នុងជម្លោះដ៏កាចសាហាវ។
នៅថ្ងៃដដែលនោះ សហរដ្ឋអាមេរិក អង់គ្លេសនិងបារាំងបានបើកការវាយប្រហារមុនពេលថ្ងៃរះប្រឆាំងនឹងរបបរបស់លោកប្រធានាធិបតី Bashar al-Assad ដើម្បីឆ្លើយតបទៅនឹងការវាយប្រហារគីមីដ៏គួរឲ្យសង្ស័យនៅទីក្រុងឌូម៉ាដែលបានសម្លាប់ជនស៊ីវិលជាច្រើននាក់។ យ៉ាងណាក្តី របបនេះបានបដិសេធការចោទប្រកាន់។
លោកTRUMP ដកខ្លួនចេញពីកិច្ចព្រមព្រៀងនុយក្លេអ៊ែរអ៊ីរ៉ង់
នៅថ្ងៃទី៨ខែឧសភា លោកប្រធានាធិបតី Donald Trump បានដកសហរដ្ឋអាមេរិកចេញពីកិច្ចព្រមព្រៀងឆ្នាំ២០១៥ដែលកំណត់កម្មវិធីអាវុធនុយក្លេអ៊ែររបស់ប្រទេសអ៊ីរ៉ង់ជាថ្នូរនឹងការបន្ធូរបន្ថយទណ្ឌកម្មប្រឆាំងនឹងសាធារណរដ្ឋឥស្លាមមួយនេះ។
លោក Trump និយាយថា “កិច្ចព្រមព្រៀងតែម្ខាង”គឺមិនមានប្រសិទ្ធភាពគ្រប់គ្រាន់ក្នុងការការពារប្រទេសអ៊ីរ៉ង់ពីការបង្កើតគ្រាប់បែកនុយក្លេអ៊ែរនោះទេ។
ភាគីដែលនៅសេសសល់ដូចជាអង់គ្លេស បារាំង អាល្លឺម៉ង់ រុស្ស៊ីនិងចិនបានទទូចថា អ៊ីរ៉ង់បានគោរពតាមការសន្យារបស់ខ្លួនហើយប្តេជ្ញាថានឹងរក្សាកិច្ចព្រមព្រៀងនេះឲ្យនៅដដែល។
សហរដ្ឋអាមេរិករើស្ថានទូតទៅទីក្រុង យេរូសាឡឹម
នៅថ្ងៃទី១៤ខែឧសភា សហរដ្ឋអាមេរិកបានបើកស្ថានទូតថ្មីរបស់ខ្លួននៅក្រុងយេរូសាឡឹមដែលជាហេតុធ្វើឲ្យជនជាតិប៉ាឡេស្ទីនខឹងសម្បាយ៉ាងខ្លាំងហើយបានបំផ្លាញគោលនយោបាយអន្ដរជាតិរយៈពេលជាច្រើនឆ្នាំ។
ការប៉ះទង្គិចគ្នាបានផ្ទុះឡើងនៅតាមព្រំដែនអ៊ីស្រាអែលនិងទឹកដីប៉ាឡេស្ទីននៅហ្គាហ្សា។ ជនជាតិប៉ាឡេស្ទីនប្រហែល៦០នាក់បានស្លាប់ដោយគ្រាប់កាំភ្លើងរបស់អ៊ីស្រាអែល។
ជំនួបរវាងលោក ត្រាំ និងលោក គីម
នៅថ្ងៃទី១២ខែមិថុនា លោក ត្រាំនិងមេដឹកនាំកូរ៉េខាងជើងលោក គីម ជុងអ៊ុន បានជួបប្រជុំគ្នានៅប្រទេសសិង្ហបុរីក្នុងកិច្ចប្រជុំជាលើកដំបូងមិនធ្លាប់មានរវាងមេដឹកនាំកំពុងកាន់តំណែងនៃប្រទេសទាំងពីរ។
អ្នកទាំងពីរបានចុះហត្ថលេខាលើកិច្ចព្រមព្រៀងមួយដែលបញ្ជាក់ឡើងវិញនូវការប្តេជ្ញាចិត្តរបស់ក្រុងព្យុងយ៉ាងចំពោះ “ការលុបបំបាត់នុយក្លេអ៊ែរទាំងស្រុងចេញពីឧបទ្វីបកូរ៉េ”។
ប៉ុន្តែរហូតមកដល់ពេលនេះ កូរ៉េខាងជើងបានចាត់វិធានការជាក់ស្តែងតិចតួចណាស់ដើម្បីបោះបង់អាវុធនុយក្លេអ៊ែររបស់ខ្លួនហើយភាគីទាំងពីរមានជម្លោះលើអត្ថន័យនៃកិច្ចព្រមព្រៀងដែលមិនច្បាស់លាស់នេះ។
សង្គ្រាមយេមែនរាលដាលទៅដល់កំពង់ផែជំនួយ
នៅថ្ងៃទី១៣ខែមិថុនា សង្គ្រាមក្នុងប្រទេសយេមែនកាន់តែខ្លាំងឡើងនៅពេលកងកម្លាំងសម្ព័ន្ធរដ្ឋាភិបាលដែលគាំទ្រដោយអារ៉ាប៊ីសាអ៊ូឌីតនិងអារ៉ាប់រួមបានបើកការវាយប្រហារមួយដើម្បីដណ្តើមការគ្រប់គ្រងកំពង់ផែជំនួយដ៏សំខាន់របស់ទីក្រុងHodeida ពីពួកឧទ្ទាមHuthiដែលគាំទ្រដោយអ៊ីរ៉ង់មកវិញ។
យោងតាមទីភ្នាក់ងារផ្តល់ជំនួយបានឲ្យដឹងថា សង្គ្រាមដែលចាប់ផ្តើមនៅក្នុងឆ្នាំ២០១៤បានសម្លាប់មនុស្សប្រហែល១០,០០០នាក់ខណៈ២០លាននាក់មានហានិភ័យនៃភាពអត់ឃ្លាន។
ភាគីទាំងពីរបានជួបគ្នាសម្រាប់កិច្ចចរចាសន្តិភាពដែលសម្របសម្រួលដោយអង្គការសហប្រជាជាតិក្នុងប្រទេសស៊ុយអែតនៅដើមខែធ្នូ។
ប្រទេសអេរីទ្រានិងអេត្យូពីរកឃើញសន្តិភាព
នៅថ្ងៃទី៩ខែកក្កដា អ្នកជិតខាងអាហ្វ្រិកគឺអេរីទ្រានិងអេត្យូពីបានប្រកាសពីការបញ្ចប់សង្គ្រាមរយៈពេល២ទស្សវត្សរបស់ខ្លួននិងចាប់ផ្តើមដំណើរសន្តិភាពមួយដែលនាំឲ្យស្ថានទូតនិងព្រំដែនបើកឡើងវិញ ទំនាក់ទំនងតាមទូរស័ព្ទនិងជើងហោះហើរបានបង្កើតឡើងវិញហើយទំនាក់ទំនងពាណិជ្ជកម្មបានបន្តសាជាថ្មី។
វាបានកើតឡើងបន្ទាប់ពីនាយករដ្ឋមន្ត្រីថ្មីរបស់ប្រទេសអេត្យូពីលោក Abiy Ahmed បានប្រកាសកាលពីខែមិថុនាថា រដ្ឋាភិបាលរបស់លោកនឹងបោះបង់ចោលការទាមទារទឹកដីដែលមានជម្លោះ។
កិច្ចព្រមព្រៀងនេះក៏បាននាំឲ្យប្រទេសសូម៉ាលីនិងអេរីទ្រាបង្កើតឡើងវិញនូវទំនាក់ទំនងការទូតផងដែរនៅថ្ងៃទី៣០ខែកក្កដាបន្ទាប់ពីអរិភាពរយៈពេលយូរ។ អង្គការសហប្រជាជាតិបានដកទណ្ឌកម្មលើប្រទេសអេរីទ្រានៅថ្ងៃទី១៤ខែវិច្ឆិកា៕
ក្មេងប្រុសថៃជាប់ក្នុងរូងភ្នំ
មានភាពធូរស្បើយជាសកលនៅថ្ងៃទី១០ខែកក្កដានៅពេលដែលកីឡាករចុងក្រោយនៃក្រុមបាល់ទាត់វ័យក្មេងមានគ្នា១២នាក់និងគ្រូបង្វឹករបស់ពួកគេត្រូវបាននាំចេញដោយសុវត្ថិភាពពីរូងភ្នំលិចទឹកនៅភាគខាងជើងប្រទេសថៃដែលជាកន្លែងពួកគេបានជាប់កាលពី១៧ថ្ងៃមុននោះ។
ជោគវាសនារបស់ក្រុមកីឡាបាល់ទាត់យុវជនមួយនេះបានបង្កឲ្យមានការយកចិត្តទុកដាក់លើពិភពលោកដោយអ្នកជំនាញមុជទឹកអាមេរិកនិងអង់គ្លេសបានចូលរួមក្នុងកិច្ចខិតខំប្រឹងប្រែងជួយសង្គ្រោះប៉ុន្តែអតីតអ្នកមុជទឹករបស់កងទ័ពជើងទឹកថៃម្នាក់ត្រូវបាត់បង់ជីវិត។
កម្ដៅនិងអគ្គិភ័យ
ពីខែកក្កដាដល់ខែសីហា ទ្វីបអឺរ៉ុបត្រូវរងការវាយប្រហារដោយរលកកំដៅដែលបានឈានដល់កម្រិតកំណត់ត្រារបស់ទ្វីបនេះគឺ៤៨អង្សាសេខណៈភ្លើងឆេះព្រៃបានឆាបឆេះនៅប្រទេសក្រិក ព័រទុយហ្គាល់និងអេស្ប៉ាញ។
នៅក្នុងខែវិច្ឆិកា រដ្ឋកាលីហ្វ័រនីញ៉ាត្រូវបានបំផ្លិចបំផ្លាញដោយសារភ្លើងឆេះព្រៃសម្លាប់មនុស្សច្រើនបំផុតមិនធ្លាប់មានដោយមនុស្សចំនួន៨៥នាក់បានស្លាប់មុនពេលវាស្ថិតក្រោមការគ្រប់គ្រងនៅពីសប្តាហ៍បន្ទាប់ពីនោះ។
អង្គការឧតុនិយមពិភពលោករបស់អង្គការសហប្រជាជាតិបានប្រកាសនៅខែវិច្ឆិកាថា ឆ្នាំ២០១៨គឺជាឆ្នាំដែលក្តៅជាងគេបំផុតទីបួនក្នុងកំណត់ត្រា។
អ្នកសារព័ត៌មានអារ៉ាប៊ីសាអ៊ូឌីតត្រូវបានគេធ្វើឃាត
នៅថ្ងៃទី២ខែតុលា អ្នកកាសែតអារ៉ាប៊ីសាអ៊ូឌីតរបស់Washington Postឈ្មោះJamal Khashoggiបានចូលក្នុងស្ថានកុងស៊ុលរបស់ប្រទេសគាត់ប្រចាំទីក្រុងអ៊ីស្តង់ប៊ុលហើយគេមិនបានឃើញគាត់ចេញមកវិញទេ។
បន្ទាប់ពីការបដិសេធនិងសេចក្តីថ្លែងការណ៍ផ្ទុយអស់រយៈពេលជាងពីរសប្តាហ៍ ទីក្រុងរីយ៉ាដបានសារភាពថា គាត់ត្រូវបានគេសម្លាប់នៅក្នុងស្ថានកុងស៊ុលបន្ទាប់ពីមានជម្លោះមួយ។
វាបានបង្កឲ្យមានការចាប់ខ្លួនមនុស្សមួយចំនួនហើយសាកសពរបស់គាត់ត្រូវបានគេសន្និដ្ឋានថា ត្រូវកាត់ជាបំណែក។
ប្រទេសប្រេស៊ីលងាកទៅរកអ្នកស្តាំនិយម
នៅថ្ងៃទី២៨ខែតុលា ប្រទេសធំបំផុតនៅតំបន់អាមេរិកកឡាទីនមួយនេះបានងាកទៅរកអ្នកស្តាំនិយមនៅក្នុងការបោះឆ្នោតមួយដែលអតីតកាពីតែនកងទ័ពលោកJairBolsonaroបានជាប់ឆ្នោតជាប្រធានាធិបតីថ្មីរបស់ប្រទេសប្រេស៊ីល។
ក្នុងអំឡុងយុទ្ធនាការឃោសនា លោកBolsonaroត្រូវបានគេចាក់ចំត្រង់ពោះក្នុងការជួបជុំនៅខែកញ្ញា។
ការបោះឆ្នោតពាក់កណ្តាលអាណត្តិរបស់អាមេរិកបានបង្កើនកម្លាំងដល់អ្នកប្រជាធិបតេយ្យ
ការបោះឆ្នោតពាក់កណ្តាលនៅថ្ងៃទី៦ខែវិច្ឆិកាបានធ្វើឲ្យគណបក្សប្រជាធិបតេយ្យឈ្នះការគ្រប់គ្រងសភាតំណាងរាស្ត្រខណៈដែលគណបក្សសាធារណរដ្ឋបង្កើនសំឡេងភាគច្រើនរបស់ពួកគេនៅក្នុងព្រឹទ្ធសភា។
ថ្ងៃចុងក្រោយនៃការធ្វើយុទ្ធនាការឃោសនាត្រូវបានរង្គោះរង្គើដោយការវាយប្រហារប្រឆាំងអម្បូរសេមីតដ៏អាក្រក់បំផុតក្នុងប្រវត្ដិសាស្ដ្ររបស់អាមេរិកនៅពេលដែលខ្មាន់កាំភ្លើងម្នាក់បានសម្លាប់មនុស្សចំនួន១១នាក់ក្នុងព្រះវិហារនៅទីក្រុង Pittsburgh និងការផ្ញើសំបុត្រមានគ្រាប់បែកបំពង់ទៅឲ្យអ្នកប្រជាធិបតេយ្យល្បីឈ្មោះរួមទាំងលោកស្រីHillary Clinton និងលោក Barack Obama ផងដែរ។
ការបះបោរ “អាវកាក់ពណ៌លឿង” របស់ប្រទេសបារាំង
នៅថ្ងៃទី១៧ខែវិច្ឆិកា បាតុកម្មបានផ្ទុះឡើងនៅទូទាំងប្រទេសបារាំងប្រឆាំងនឹងការកើនឡើងនៃតម្លៃប្រេងឥន្ធនៈនិងការចំណាយលើការរស់នៅដែលក្រោយមកបានរីករាលដាលទៅជាចលនាទូលំទូលាយប្រឆាំងនឹងគោលនយោបាយរបស់លោកប្រធានាធិបតីEmmanuel Macron។
បាតុកម្ម “អាវកាក់ពណ៌លឿង” ដែលត្រូវបានដាក់ឈ្មោះតាមអាវសុវត្ថិភាពដែលពាក់ដោយក្រុមបាតុករគឺបានកើតឡើងជាមួយកុបកម្មនិងការលួចក្នុងទីក្រុង ប៉ារីស។
កិច្ចព្រមព្រៀងBREXIT
បន្ទាប់ពីរយៈពេល១៧ខែនៃការចរចា នៅថ្ងៃទី២៥ខែវិច្ឆិកាសហភាពអឺរ៉ុបនិងចក្រភពអង់គ្លេសបានយល់ព្រមលើកិច្ចព្រមព្រៀងមួយដែលគ្របដណ្តប់លើការចាកចេញរបស់ចក្រភពអង់គ្លេសពីប្លុកនេះនៅត្រឹមខែមីនាឆ្នាំ២០១៩។
[caption id="attachment_1009969" align="alignnone" width="700"]
[/caption]ប៉ុន្តែលោកស្រីនាយករដ្ឋមន្ត្រីអង់គ្លេសTheresa May នៅថ្ងៃទី១០ខែធ្នូបានពន្យារពេលការបោះឆ្នោតសភាមួយលើកិច្ចព្រមព្រៀងនេះដោយទទួលស្គាល់ថានឹងត្រូវបរាជ័យ។ លោកស្រីបានរួចផុតពីការបោះឆ្នោតសម្តែងការមិនទុកចិត្តក្នុងគណបក្សនៅថ្ងៃទី១២ខែធ្នូ៕
Source: Kampuchea Thmey Daily
0 Comments