ស្ថានទូត​សហភាព​អឺរ៉ុប រៀបចំ​ដំណើរ​ទស្សនកិច្ច​ប្រតិភូ​អ្នកសារព័ត៌មាន​កម្ពុជា ស្វែងយល់​អំពី​ការ​វិនិយោគ​របស់​បណ្តា​ប្រទេស​ក្នុង​សហភាព​អឺរ៉ុប​នៅ​កម្ពុជា

សៀមរាប ៖ លោក George Edgar ឯកអគ្គរដ្ឋទូត​សហភាព​អឺរ៉ុប​ប្រចាំ​នៅ​ព្រះរាជាណាចក្រ​កម្ពុជា មានប្រសាសន៍​ថា​ ៖ ​ដំណើរ​ទស្សនកិច្ច​នេះ គឺជា​ព្រឹត្តិការណ៍​មួយ​ក្នុង​ព្រឹត្តិការណ៍​ជាច្រើន ដែល​លើក​នេះ​គឺជា​ព្រឹត្តិការណ៍​ចុងក្រោយ ក្នុង​គោលបំណង​ដើម្បី​ផ្តល់ព័ត៌មាន​នៃ​ការចូលរួម​សេដ្ឋកិច្ច​នៃ​អ្នកវិនិយោគ​មកពី​សហភាព​អឺរ៉ុប​​មកកាន់​កម្ពុជា ថា​តើ​ក្រុមហ៊ុន​អឺរ៉ុប​ទាំងនោះ បានធ្វើ​អ្វីខ្លះ និង​សម្រេចបាន​អ្វីខ្លះ ហើយ​នៅក្នុង​ដំណើរ​ទស្សនកិច្ច​នេះ ក៏មាន​ការបង្ហាញ​អំពី​បច្ចេកវិទ្យា បង្ហាញ​អំពី​សកម្មភាព​របស់​ក្រុមហ៊ុន ដែល​កំពុងដំណើរការ​ដោយ​ការទទួលខុសត្រូវ​ចំពោះ​សង្គម បរិស្ថាន ជាដើម។

ស្ថានទូត​សហភាព​អឺរ៉ុប បានរៀបចំ​ឲ្យ​មានដំណើរ​ទស្សនកិច្ច​ប្រតិភូ​អ្នកសារព័ត៌មាន​កម្ពុជា ដើម្បី​ស្វែងយល់​អំពី​ការវិនិយោគ​របស់​បណ្តា​ប្រទេស​ក្នុង​សហភាព​អឺរ៉ុប​នៅ​កម្ពុជា។ ដំណើរ​ទស្សនកិច្ច​របស់​អ្នក​សារព័ត៌មាន​ខ្មែរ​លើក​នេះ បានធ្វើ​ឡើង​នៅ​ខេត្តសៀមរាប​រយៈពេល​មួយថ្ងៃ ថ្ងៃទី​០៤ ខែធ្នូ ឆ្នាំ​២០១៨ ក្នុង​គោលដៅ​ចំនួន​៤​កន្លែង គឺ​នៅ​ក្រុមហ៊ុនចម្រុះ​សិប្បករ​អង្គរ នៅ​រោងចក្រ​ផលិត​ថង់​ក្រណាត់​ដាក់​វ៉ែនតា ក្រណាត់​ជូត​វ៉ែនតា និង​សម្ភារៈ​ប្រើប្រាស់​ពី​កម្ទេច​ក្រណាត់ PACTICS ( Cambodia ) Co.,Ltd ក្រុមហ៊ុន Cambodia Aiports និង ស្ថានីយ៍​ប្រេង​ឥន្ទ​នៈ​ក្រុមហ៊ុន Cambodia TOTAL ។​

នៅ​ក្រុមហ៊ុនចម្រុះ​សិប្បករ​អង្គរ លោក George Edgar បង្ហាញថា ៖ ក្រុមហ៊ុន​សិប្បករ​អង្គរ មាន​លក្ខណៈផ្សេង​ពី​ក្រុមហ៊ុន​ដទៃទៀត ដែល​សហភាព​អឺរ៉ុប​បាន​ចូលរួម​ដោយផ្ទាល់ និង​ជួយ​ជ្រោមជ្រែង​ឲ្យ​មាន​ជា​ដំណាក់កាល​នៃ​ការ​អភិវឌ្ឍ​មកដល់​បច្ចុប្បន្ន​នេះ។ ទាំងនោះ​ហើយ​ដែល​ចង់​និយាយ​ថា ជា​លទ្ធផល​ជោគជ័យ​របស់​ក្រុមហ៊ុន​សិប្បករ​អង្គរ។

លោក Pierre-Andre Romano នាយក​ប្រតិបត្តិ​ក្រុមហ៊ុនចម្រុះ​សិប្បករ​អង្គរ មានប្រសាសន៍ថា ៖​សិប្បករ​អង្គរ បាន​បំពេញបេសកកម្ម​របស់​ខ្លួន ដើម្បី​ធ្វើ​ឲ្យ​រស់​ឡើងវិញ ​និង​អភិវឌ្ឍ​ជំនាញ​សិប្បកម្ម​ប្រពៃណី​ខ្មែរ ផ្តល់​ការ​បណ្តុះបណ្តាល​មាន​គុណភាព​ផ្នែក​សិល្បៈ​សិប្បកម្ម បង្កើត​ឲ្យ​មាន​ស្ថិរភាព​ការងារ​ធ្វើ​នៅ​ក្នុង​ខេត្ត​សៀមរាប។ ការដ្ឋាន​បណ្តុះបណ្តាល​វិជ្ជាជីវៈ​បាន​បង្កើតឡើង​តាំងពី​ឆ្នាំ​១៩៩២ ដើម្បី​ផ្តល់​ចំណេះដឹង​វិជ្ជាជីវៈ​ដល់​យុវជន យុវនារី នៅតាម​ទីជនបទ។ មកដល់​បច្ចុប្បន្ន​នេះ ក្រុមហ៊ុន​សិប្បករ​អង្គរ បាន​សាងសង់​និង​ផ្គត់ផ្គង់​ឧបករណ៍​ដល់​រោង​សិប្បកម្ម​បាន​ចំនួន​៤៨​កន្លែង ព្រមទាំង​បាន​ដឹកនាំ​ទំនុកបម្រុង​ឲ្យ​សិប្បករ​ចំនួន​ជាង​៩០០​នាក់ មានការ​ងារ​ធ្វើ។

លោក Delobel Eric នាយក​ប្រតិបត្តិ​ក្រុមហ៊ុន Cambodia Aiports មានប្រសាសន៍​ឲ្យ​ដឹងថា ៖ ក្រុមហ៊ុន Cambodia Aiports គឺជា​ក្រុមហ៊ុន​របស់​កម្ពុជា មាន​ភាគហ៊ុន​ដោយ​វិនិយោគិន​បារាំង គ្រប់គ្រង​ដោយ​ជនជាតិ​បារាំង ជា​ក្រុមហ៊ុន​សម្បទា​និក​ពី​រាជរដ្ឋាភិបាល​កម្ពុជា ដើម្បី​ដំណើរការ​អាកាសយានដ្ឋាន​អន្តរជាតិ​ទាំង​៣​នៅ​កម្ពុជា ហើយ​ការចាប់​ផ្តើមដំបូង គឺ​កាលពី​២៥​ឆ្នាំមុន។ បច្ចុប្បន្ននេះ ក្រុមហ៊ុន​បាន​បង្កើត​ការងារ​ប្រមាណ​ជា​ចំនួន ២ ០០០​នាក់ ក្នុងនេះ ៩៩% ជា​ជនជាតិខ្មែរ។

ចំពោះ​ដំណើរ​ទស្សនកិច្ច​របស់​ប្រតិភូ​អ្នកសារព័ត៌មាន​កម្ពុជា លោក Delobel Eric វាយតម្លៃថា ៖ វា​ជា​ឱកាស​ដ៏​ល្អ សម្រាប់​ការសិក្សា​អំពី​ស្ថានភាព​នៃ​អ្នក​វិនិយោគិន​អឺរ៉ុប​នៅ​កម្ពុជា​របស់​អ្នកយកព័ត៌មាន​កម្ពុជា ព្រឹត្តិការណ៍​បែបនេះ មិនមាន​ជា​ញឹកញាប់​នោះទេ​។​
​
ខ្លឹមសារ​ប្រែ​សម្រួល​សង្ខេប ( ដំណើរ​ទស្សនកិច្ច​នេះ ត្រូវបាន​ទាញយក​ចំណាប់អារម្មណ៍​របស់​អ្នកសារព័ត៌មាន​កម្ពុជា ចំពោះ​ការវិនិយោគ​របស់​វិនិយោគិន​អឺរ៉ុប​នៅ​កម្ពុជា សង្ឃឹមថា​ព្រឹត្តិការណ៍​នេះ​អាចជួយ​ឲ្យ​អ្នកសារព័ត៌មាន យល់បាន​កាន់តែច្បាស់​អំពី​ការវិនិយោគ​នៃ​បណ្តា​ប្រទេស​ក្នុង​សហភាព​អឺរ៉ុប​នៅ​កម្ពុជា )៕



Source: Kampuchea Thmey Daily