ភ្នំពេញ ៖ លោក Jun TSUSHIMA និងលោក Arata TAKEBE សមាជិកសភាជប៉ុន និង លោក Hidehisa HORINOUCHI ឯកអគ្គរាជទូតជប៉ុនប្រចាំនៅកម្ពុជា បានថ្លែងអំណរគុណដល់កម្ពុជាដែលបានបោះឆ្នោតគាំទ្រដល់ ជប៉ុន បានជាប់ជាប្រទេសម្ចាស់ផ្ទះក្នុងការរៀបចំពិរពណ៌ពិភពលោក នៅឆ្នាំ២០២៥។
ការថ្លែងអំណរគុណ របស់ សមាជិកសភាជប៉ុន បានធ្វើឡើង ក្នុងជំនួប ពិភាក្សាពីកិច្ចសហប្រតិបត្តិការរវាងកម្ពុជា-ជប៉ុន ជាមួយ លោក វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទកាលពី ព្រឹកថ្ងៃពុធ ៤រោច ខែមិគសិរ ឆ្នាំច សំរឹទ្ធិស័ក ពស ២៥៦២ ត្រូវនឹងថ្ងៃទី២៦ ខែធ្នូ ឆ្នាំ២០១៨ នៅ ទីស្តីការក្រសួង ។
នាឪកាសនោះ រដ្ឋមន្ត្រី បានស្វាគមន៍ចំពោះដំណើរទស្សនកិច្ចរបស់ តំណាងសភាជប៉ុន មកកាន់កម្ពុជា និងបានថ្លែងអំណរគុណចំពោះរាជរដ្ឋាភិបាលជប៉ុន ដែលបាននិងកំពុងជួយគាំទ្រដល់ការអភិវឌ្ឍន៍នៅកម្ពុជា ជាពិសេសលើការអភិវឌ្ឍន៍ហេដ្ឋារចនាសម្ព័ន្ធ និងគាំទ្រផ្នែកបច្ចេកទេសដល់កម្ពុជា។
ជាមួយគ្នានេះ លោក Jun TSUSHIMA បានមានប្រសាសន៍ថា ឆ្នាំនេះជាខួបលើកទី៦៥នៃកិច្ចសហប្រតិបត្តិការរវាងកម្ពុជា និងជប៉ុន ហើយរាជរដ្ឋាភិបាលជប៉ុននឹងបន្តពង្រឹងកិច្ចសហប្រតិបត្តិការរវាងប្រទេសទាំងពីរឲ្យកាន់តែប្រសើរឡើង។ ទន្ទឹមនឹងនេះ លោក ក៏បានថ្លែងអំណរគុណដល់កម្ពុជាដែលបានបោះឆ្នោតគាំទ្រដល់ ជប៉ុន បានជាប់ជាប្រទេសម្ចាស់ផ្ទះក្នុងការរៀបចំពិព័រណ៍ពិភពលោក នៅឆ្នាំ២០២៥ ហើយលោកក៏បានអញ្ជើញថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ ចូលរួមពិព័រណ៍ពិភពលោក ឆ្នាំ២០២៥ នៅទីក្រុងនីពុងផងដែរ។
ឆ្លៀតក្នុងឱកាសនេះ លោក រដ្ឋមន្ត្រី បានស្នើដល់រាជរដ្ឋាភិបាលជប៉ុន ជួយគាំទ្រដល់កិច្ចដំណើរការមជ្ឈមណ្ឌលភ្ញាស់ពូជត្រីនៅខេត្តព្រះសីហនុ និងស្នើគាំទ្រដល់ការបង្កើតមជ្ឈមណ្ឌលភ្ញាស់កូនត្រីទឹកសាបផងដែរ ដើម្បីជួយដល់ការបង្កើនជីវភាពប្រជាកសិករកម្ពុជា។ លោក រដ្ឋមន្ត្រី ក៏បានស្នើដល់ភាគីជប៉ុនជួយគាំទ្រដល់ការអភិវឌ្ឍន៍សហគមន៍កសិកម្ម និងគាំទ្រការអភិវឌ្ឍន៍ការចិញ្ចឹមសត្វនៅកម្ពុជាដោយប្រើប្រាស់ទឹកស្ពែមសិប្បនិម្មិត ស្របតាមបរិបទថ្មីនៃដំណើរការវិវត្តន៍នៃបដិវត្តឧស្សាហកម្ម ៤.០ និងសម័យឌិជថល។
ជាចុងក្រោយលោករដ្ឋមន្ត្រី ក៏បានស្នើដល់រាជរដ្ឋាភិបាលជប៉ុនជួយរៀបចំដំណើរទស្សនកិច្ចគ្រប់កម្រិតក្នុងការសិក្សាផ្លាស់ប្តូរបទពិសោធន៍ ដើម្បីស្វែងយល់បន្ថែមពីការវិវឌ្ឍន៍ផ្នែកកសិកម្មនៅប្រទេសជប៉ុន និងស្នើដល់ប្រទេសជប៉ុនពិនិត្យពិចារណាពីលទ្ធភាពក្នុងកៀរគរអ្នកវិនិយោគទុនមកធ្វើការវិនិយោគលើការកែច្នៃផលិតផលកសិកម្មនៅកម្ពុជា ក៏ដូចជាការទទួលទិញនូវផលិតផលកសិកម្មបន្ថែមពីកម្ពុជានាពេលខាងមុខ៕
Source: Kampuchea Thmey Daily
0 Comments