ក្លិបបាល់ទាត់អាស៊ីអឺរ៉ុប សមាជិកក្លិបពានរង្វាន់លីគកំពូលកម្ពុជា (Metfone Cambodian League 2018) បានប្រកាសនៅលើហ្វេសប៊ុកផ្លូវការរបស់ខ្លួនថា ថ្នាក់ដឹកនាំក្លិបដែលមានសាកលវិទ្យាល័យអាស៊ីអឺរ៉ុប នៅពីក្រោយខ្នងនេះ បានផ្តល់អាហារូបករណ៍១០០% សិក្សាថ្នាក់បរិញ្ញប័ត្រដល់កីឡាករយុវជនចំនួន៣នាក់ នៅព្រឹកល្ងាចថ្ងៃច័ន្ទ ទី៣ ខែធ្នូ ឆ្នាំ២០១៨។
ប្រភពបានបញ្ជាក់ថា លោកបណ្ឌិត ជា សុភាព សកលវិទ្យាធិការ និងគណៈគ្រប់គ្រងសាកល វិទ្យាល័យ អាស៊ី អឺរ៉ុប តំណាងរបស់លោកបណ្ឌិត ឌួង លាង ប្រធានក្រុមប្រឹក្សាភិបាល និងជាប្រធានក្លឹបបាល់ទាត់ អាស៊ីអឺរ៉ុបយូណាយធីត បានប្រគល់ប័ណ្ណអាហារូបករណ៍សិក្សា ១០០% ជូនយុវជនក្លឹបបាល់ទាត់អាស៊ីអឺរ៉ុបយូណាយធីត ចំនួន៣រូបដូចជាយឿន សិរីមង្គល,តុប ឡេត,សេង ចាន់រិទ្ធី ឲ្យបន្តសិក្សាថ្នាក់បរិញ្ញាបត្រ នៅសាកលវិទ្យាល័យអាស៊ីអឺរ៉ុប។
យុវជនទាំង ៣រូបខាងលើបានចំណាយពេលចូលរួមហ្វឹកហាត់ជាមួយក្រុមយុវជនរបស់អស់រយៈពេលកន្លងមកក្នុងវ័យសិក្សានៅវិទ្យាល័យរហូតបានឆ្លងកាត់ការប្រឡងសញ្ញាបត្រទុតិយភូមិ (បាក់ឌុប់) មកដល់ពេលនេះ គណៈគ្រប់គ្រងសាកលវិទ្យាល័យ អាស៊ី អឺរ៉ុប បានសម្រេចផ្តល់អាហារូបករណ៍សិក្សា បន្តការសិក្សាថ្នាក់បរិញ្ញាបត្រ ដើម្បីជាការលើកទឹកចិត្ត និងជំរុញឲ្យយុវជនដទៃទៀតនៅក្នុងក្រុមឱ្យខិតខំសិក្សា កុំបោះបង់ការសិក្សាត្រឹមកម្រិតវិទ្យាល័យ ចូលរួមហ្វឹកហាត់ជាមួយក្រុមយុវជនរបស់ក្លិបនឹងទទួលបានអាហារូបករណ៍សិក្សា សិក្សាដោយឥតគិតថ្លៃ និងក្លាយជាកីឡាកររបស់ក្រោយបញ្ចប់ការកិស្សានៅកំរិតវិទ្យាល័យ។
ក្រុមអាស៊ីអឺរ៉ុប បានបញ្ចប់រដូវកាលចាស់របស់ខ្លួនដោយឈរចំណាត់ថ្នាក់លេខ៧ ក្នុងចំណោមសមាជិកទាំង១២ក្រុម ក្នុងពានរង្វាន់លីគកំពូលកម្ពុជា ហើយនេះគឺជាលទ្ធផលដ៏ល្អរបស់ក្លិបតាំងពីបង្កើតមក។ តាមរយៈកម្មវិធីប្រកួតសន្សំពិន្ទុ២២ប្រកួតក្រុមអាស៊ីអឺរ៉ុប បានយកឈ្នះគូប្រកួតបាន៨លើក ហើយស្មើគ្នាបាន៦លើកនិងចាញ់៨លើក ប៉ុណ្ណោះ។ បើនិយាយពីក្នុងពានរង្វាន់សម្តេចតេជោ ហ៊ុន សែន វិញក្រុមនេះបានធ្លាក់ចេញនៅវគ្គ១៦ក្រុមចុងក្រោយថ្នាក់ជាតិក្រោយចាញ់ក្រុមជើងឯកក្រសួងការពារជាតិដោយលទ្ធផលទាំង២ជើង១០ទល់២៕
Source: Kampuchea Thmey Daily
0 Comments