ភ្នំពេញ ៖ លោក គង់ គាំ អតីតឧត្តមទីប្រឹក្សាជាន់ខ្ពស់របស់អតីតគណបក្សសង្គ្រោះជាតិបានចេញមុខរិះគន់លោក សម រង្ស៊ី ដែលគេដឹងថា អតីតមេដឹកនាំរបស់ខ្លួន ក្រោយពីមានសន្និសីទមួយរបស់ក្រុមអ្នកគាំទ្រលោក សម រង្ស៊ី នៅទីក្រុងអាត់ត្លង់តា (Atlanta) រដ្ឋ Georgia សហរដ្ឋអាមេរិក ដោយបានគាំទ្រឲ្យលោក សម រង្ស៊ី ធ្វើជាប្រធានស្តីទីខ្មោចគណបក្សសង្គ្រោះជាតិ ខុសទៅនឹងលក្ខន្តិកៈគណបក្ស។
លោក គង់ គាំ បានសរសេរសារនៅលើបណ្តាញសង្គម Facebook របស់ខ្លួនកាលពីថ្ងៃទី០៣ ខែធ្នូ ឆ្នាំ២០១៨ថា គិតមិនត្រូវ យល់មិនច្បាស់ និងធ្វើអ្វីមិនកើត។ ប្រធានចលនា ឬប្រធានស្តីទី CNRP វាដូចតែគ្នាទេ។ តាមលោក គង់ គាំ នៅក្នុងសន្និសីទកម្រិតពិភពលោកលើកទី១ របស់អតីតគណបក្សសង្គ្រោះជាតិ (CNRP) នៅក្រៅប្រទេសកំណត់ថា លោក សម រង្ស៉ី និងលោក កឹម សុខា ជាមនុស្សតែមួយ ហើយបានហៅអ្នកប្រឆាំងលោក សម រង្ស៉ី ថាជាការប្រឆាំងកឹម សុខា ហើយអ្នកប្រឆាំងលោក កឹម សុខា គឺប្រឆាំងលោក សម រង្ស៉ីទៀតផង ប៉ុន្តែនៅពេលនេះ ទាំងលោក សម រង្ស៊ី និងអង្គសន្និសីទ បែរជាថា លោក កឹម សុខា គ្មានសេរីភាព ដូច្នេះមតិយោបល់របស់គាត់មិនអាចយកជាបានការ ចុះមតិរបស់កញ្ញា កឹម មនោវិទ្យា និងអ្នកក្រៅប្រទេស ដែលមិនគាំទ្រសម រង្ស៊ី និងមិនគាំទ្រសន្និសីទនោះ ពិតជាប្រឆាំងលោក កឹម សុខា មែនដែរឬ?
អតីតឧត្តមទីប្រឹក្សាជាន់ខ្ពស់របស់អតីតគណបក្សសង្គ្រោះជាតិរូបនោះបានបញ្ជាក់ថា ផ្ទៃក្នុងរបស់គណបក្សសង្គ្រោះជាតិ (CNRP) មិនទទួលស្គាល់ផង តើឲ្យអន្តរជាតិទទួលស្គាល់ធ្វើម៉េចទៅកើត។
គួររំលឹកថា កាលពីថ្ងៃទី០១-០២ ខែធ្នូ ឆ្នាំ២០១៨ ក្រុមអ្នកនិយមគាំទ្រលោក សម រង្ស៉ី នៅក្នុងអតីតគណបក្សសង្គ្រោះជាតិ បានរៀបសន្និសីទមួយ នៅទីក្រុងអាត់ត្លង់តា (Atlanta) រដ្ឋGeorgia នៃសហរដ្ឋអាមេរិក ដើម្បីរៀបចំរចនាសម្ព័ន្ធថ្មី របស់ខ្មោចគណបក្សសង្គ្រោះជាតិ ហើយសន្និសីទនោះ បានចេញសេចក្តីសម្រេចមួយ ដែលមាន១០ចំណុច ក្នុងនោះមានការសម្រេចឲ្យលោក សម រង្ស៉ី ធ្វើជាប្រធានស្តីទី (អតីត)គណបក្សសង្គ្រោះជាតិផងដែរ។
តែសេចក្តីសម្រេចនោះ លោក កឹម សុខា ដែលជាអតីតប្រធាននៃអតីតគណបក្សសង្គ្រោះជាតិនោះ មិនបានគាំទ្រ និងទទួលស្គាល់សន្និសីទនេះឡើយ ហើយកូនស្រីរបស់លោក កឹម សុខា រួមទាំងអ្នកគាំទ្រលោកជាច្រើន បានរិះគន់ចំពោះការរៀបចំសន្និសីទនៅអាត្លង់តានេះថា ជាការបំបែកបំបាក់ផ្ទៃក្នុងរបស់ខ្មោចគណបក្សសង្គ្រោះជាតិ ឲ្យកាន់តែធ្ងន់ធ្ងរថែមទៀត៕
Source: Kampuchea Thmey Daily
0 Comments