កណ្តាល ៖ រថយន្តខ្នាតធំដែលមានដាក់ស្លាកសញ្ញាក្រុមហ៊ុនស្រាបៀរកម្ពុជា១គ្រឿងបានជ្រុលចង្កូតបើកបុករថយន្តប្រភេទទេសចរណ៍១គ្រឿងម៉ាកលុចស៊ីសRX.330 បណ្តាលឲ្យខូចខាតធ្ងន់ តែសំណាងល្អពុំមានអ្នករងរបួសឡើយ។
ហេតុការណ៍នេះ បានកើតឡើងកាលពីវេលាម៉ោង២២និង១៥នាទី យប់ថ្ងៃទី០៣ ខែធ្នូ គ.ស២០១៨ នៅចំណុចភូមិចេតិយថ្មី ឃុំវិហារលួង ស្រុកពញាឮ ខេត្តកណ្ដាល លើកំណាត់ផ្លូវជាតិលេខ៥ ចន្លោះគីឡូម៉ែត្រលេខ ៣៣ និង៣៤។
មន្ត្រីនគរបាលមូលដ្ឋានបានឲ្យដឹងថា គ្រោះថ្នាក់ចរាចរណ៍ខាងលើបង្កឡើងដោយសារភាគីខាងរថយន្តស្រាបៀរកម្ពុជា បើកបររំលោភចូលមកខ្សែបន្ទាន់ទ្រូងផ្លូវខាងស្តាំរបស់រថយន្តម្ខាងទៀត(រងគ្រោះ)ដែលបើកបញ្ច្រាសទិសគ្នា។
ប្រភពដដែលបានបញ្ជាក់ថា នៅវេលាម៉ោងថ្ងៃ ខែ ឆ្នាំកើតហេតុខាងលើមានរថយន្តមួយគ្រឿងម៉ាក HYUNDAI(ប្រាំភ្លៅ)ដាក់ស្លាកក្រុមហ៊ុនស្រាបៀរអង្គរ ពណ៌ក្រហម ពាក់ស្លាកលេខ ភ្នំពេញ3A-5468 បើកបរដោយជនឈ្មោះមិនស្គាល់អត្តសញ្ញាណ(រត់គេចខ្លួន)នៅក្នុងទិសដៅពីលិចទៅកើត។ លុះពេលបើកបរមកដល់ចំណុចកើតហេតុខាងលើភាគីរថយន្តស្រាបៀរមានល្បឿនលឿននិងមិនមានការប្រុងប្រយ័ត្នផងក៏បានរេចង្កូតទៅបុកនិងរថយន្តមួយគ្រឿងទៀតម៉ាកLEXUS
RX.330 ពណ៌ស ពាក់ស្លាកលេខ ភ្នំពេញ 2AF-5040 បើកបរដោយឈ្មោះហុក ម៉េងឃួច ភេទប្រុសអាយុ៣៥ឆ្នាំ មានទីលំនៅភូមិឡកំបោ សង្កាត់ព្រែកព្នៅ ខណ្ឌឫស្សីកែវ រាជធានីភ្នំពេញ មានអ្នករួមដំណើរម្នាក់ ឈ្មោះហៀង ណាវី ភេទស្រី អាយុ២៨ឆ្នាំ ផ្ទះនៅភូមិពោធិ៍កំបោរ ឃុំវិហារលួង ស្រុកពញាឮ ខេត្តកណ្ដាល ដែលកំពុងបើកបរក្នុងទិសដៅពីកើតទៅលិចបញ្ច្រាសទិសគ្នា។ នៅពេលបុកគ្នានោះភាគីរថយន្តស្រាបៀរបានជ្រុលធ្លាក់ផ្លូវនៅខាងស្តាំដៃរបស់ភាគីរថយន្តម្ខាងទៀត តែនៅក្នុងរថយន្តនោះមិនមែនស្រាបៀរអង្គរទេ គឺសុទ្ធតែទឹកក្រូច ម៉ាកMirinda ធ្លាក់រាយប៉ាយ ឯអ្នកបើកបររត់គេចខ្លួនបាត់ភ្លាមៗក្នុងពេលនោះដែរ។
ចំណែកភាគីរថយន្ត លុចស៊ីសវិញ បានរងការខូចខាតធ្ងន់ធ្ងរផ្នែកខាងមុខប៉ុន្តែអ្នកបើកបរនិងអ្នករួមដំណើរមិនរងរបួសគ្រោះថ្នាក់អ្វីឡើយ ដោយសាររថយន្តទំនើបមានពោងសុវត្ថិភាពការពារគ្រាអាសន្ន៕
Source: Kampuchea Thmey Daily
0 Comments