ភ្នំពេញ ៖ លោក រ៉ាត់ រត្នមុនី ដែលជាសហព័ន្ធសហជីពកម្មករសំណង់កម្ពុជា និងជាអ្នកចូលរួមផលិតខ្សែភាពយន្តឯកសារបំភ្លៃការពិតពីកម្ពុជា ត្រូវបានអាជ្ញាធរថៃចាប់ខ្លួនហើយ កាលពីថ្ងៃសុក្រ ទី០៧ ខែធ្នូ ឆ្នាំ២០១៨ សប្តាហ៍មុន តាមការស្នើសុំរបស់អាជ្ញាធរកម្ពុជា នេះបើតាមការបញ្ជាក់ពីអ្នកស្រី ឡុង គីមហៀង ជាភរិយា។
អ្នកស្រី ឡុង គីមហៀង បានថ្លែងប្រាប់អ្នកសារព័ត៌មានថា ពេលនេះប្តីរបស់នាងកំពុងស្ថិតនៅកន្លែងឃុំខ្លួនរបស់ប៉ូលិសអន្តោប្រវេសន៍របស់ថៃ ហើយអាជ្ញាធរថៃនឹងទាក់ទងបញ្ជូនមកកម្ពុជានៅពេលឆាប់ៗនេះ ហើយបើតាមការបញ្ជាក់ពីអ្នកស្រី ឡុង គីមហៀង អាជ្ញាធរថៃមាននីតិវិធីប្រមាណមួយសប្តាហ៍។
តាមអ្នកស្រី ឡុង គីមហៀង ការចាប់ខ្លួននោះបានធ្វើឡើងខណៈពេលអ្នកស្រី និងស្វាមី (លោក រ៉ាត់ រត្នមុនី) ទៅយកផាស័រពីការិយាល័យប្រទេសហុល្លង់ប្រចាំនៅទីក្រុងបាងកក ប្រទេសថៃ នាវេលាម៉ោងប្រមាណ១២ និង១៥ នាទីថ្ងៃទី០៧ ខែធ្នូ ឆ្នាំ២០១៨ គឺខណៈនោះមានមន្ត្រីអន្តោប្រវេសន៍ស៊ីវិលចំនួន២នាក់បានមកសួរនាំ ហើយបាននាំខ្លួនទៅកាន់ការិយាល័យអន្តោប្រវេសន៍តែម្តង ហើយមន្ត្រីអន្តោប្រវេសន៏នោះបានបញ្ជាក់ថា អាជ្ញាធរកម្ពុជាបានស្នើសុំកិច្ចសហការស្វែងរកចាប់ខ្លួនឈ្មោះ រ៉ាត់ រត្នមុនី នេះ ដោយឈ្មោះនេះបានប្រព្រឹត្តកំហុសមួយ គឺថតភាពយន្តឯកសារមិនពិត មានន័យថា ប្រឌិតឯកសារមិនពិត ដែលនិយាយអំពីការលក់កូនស្រីឲ្យរកស៊ីផ្លូវភេទ ដែលត្រូវចាប់បញ្ជូនមកកម្ពុជាវិញ ហើយមន្ត្រីអន្តោប្រវេសន៏របស់នោះ បានប្រាប់ឲ្យមកដោះស្រាយនៅប្រទេសកម្ពុជា។
សូមបញ្ជាក់ថា កាលពីថ្មីៗនេះ ខ្សែភាពយន្តមួយ ត្រូវបានបង្ហោះលើបណ្តាញសង្គមហ្វេសប៊ុក (Facebook) ហើយបានស៊ែរតៗគ្នា ដែលខ្សែវីដេអូខ្លីនេះ បានផ្តោតលើតួអង្គពីរនាក់ គឺលោកស្រី កៅ ម៉ាឡៃ និងកូនស្រីឈ្មោះ ឃៀង ស្រីម៉ិច ដែលជាអតីតពលរដ្ឋបឹងកក់។ ក្រោយការចេញផ្សាយ សមត្ថកិច្ចអាជ្ញាធរបានហៅតួអង្គម្តាយ និងកូន ក្នុងសាច់រឿងនេះ ទៅសាកសួរ រួចក៏បានអះអាងថា ពួកគេទទួលបានលុយចំនួន ២០០ដុល្លារ ជាថ្នូរនឹងការនិយាយកុហកក្នុងភាពយន្តឯកសារនេះ។ ចំណែកសមត្ថកិច្ចកម្ពុជា បានអះអាងថា ភាពយន្តឯកសារនេះ ធ្វើឲ្យប៉ះពាល់ដល់វប្បធម៌ខ្មែរ និងបំផ្លាញកេរ្តិ៍ឈ្មោះកម្ពុជា។
ទាក់ទងបញ្ហាខ្សែវីដេអូខ្លីនេះ អ្នកស្រី ឡុង គីមហៀង អះអាងថា ពិតជាបានពាក់ព័ន្ធជាមួយអ្នកស្រី និងស្វាមីមែន ពីព្រោះខ្សែភាពយន្តនេះ ប្តីរបស់នាងជាអ្នកថត ចំណែកអ្នកស្រី គឺជាអ្នកស្គាល់តួអង្គម្តាយ និងកូនស្រី នៅក្នុងខ្សែភាពយន្តខ្លីនេះ ហើយជាអ្នកទំនាក់ទំនង។ អ្នកស្តីបញ្ជាក់ថា “បើនិយាយពីការថតសម្ភាសន៍អីនោះ អត់ទាក់ទងទេ ប៉ុន្តែបើនិយាយពីសាច់រឿង ដើម្បីអាចសម្ភាសន៍បាននោះ គឺពាក់ព័ន្ធ”។
អ្នកស្រី ឡុង គីមហៀង បញ្ជាក់ថា ម្តាយ និងកូនស្រី នៅក្នុងសាច់រឿងនោះ គឺជាអតីតជនរងគ្រោះដោយការបណ្តេញចេញនៅតំបន់បឹងកក់ គឺអ្នកស្រី កែវ ម៉ាឡៃ និងកូនស្រី (ស្រីម៉ិច) ហើយការស្គាល់គ្នា ដោយសារតែអ្នកស្រី ជាអ្នកធ្វើការនៅអង្គការផ្នែកដីធ្លី ហើយបានទំនាក់ទំនងស្គាល់ដោយសារតែករណីដីធ្លីរបស់អ្នកស្រី កែវ ម៉ាឡៃ នេះ ហើយអ្នកស្រី កែវ ម៉ាឡៃ ជាស្រីមេម៉ាយ ហើយនៅពេលបណ្តេញចេញពីតំបន់បឹងកក់ អ្នកស្រីមិនបានទទួលសំណងអ្វីនោះទេ។ នៅពេលនោះហើយដែលធ្វើឲ្យជីវភាពរបស់ពួកគាត់លំបាក ឈានទៅដល់បែកបាក់គ្រួសារ អត់លុយជួលផ្ទះ ទើបឈានដល់ការធ្វើបែបនេះ (លក់កូនស្រីឲ្យរកស៊ីផ្លូវភេទ)៕
Source: Kampuchea Thmey Daily
0 Comments