ភ្នំពេញ ៖ ដើម្បីឆ្លើយតបទៅនឹងតម្រូវការចាំបាច់របស់ព្រះសង្ឃ ដែលបាននិមន្តមកគង់ស្នាក់នៅរៀនសូត្រ និង កំណើនប្រជាពុទ្ធបរិស័ទមកធ្វើបុណ្យទាននានានៅក្នុងវត្តទួលទំពូងកាន់តែច្រើនឡើងពីមួយឆ្នាំ ទៅមួយឆ្នាំទើបព្រះសង្ឃនិងគណៈកម្មការ អាចារ្យវត្ត បានសម្រេចសាងសង់សាលាធម្មសភាថ្មីមានតម្លៃ១លានដុល្លារដើម្បីជួយសម្រួលដល់ការគង់នៅរបស់ព្រះសង្ឃនិងការមកធ្វើបុណ្យរបស់ពុទ្ធបរិស័ទ។
ព្រះវិន័យ វង្សា ស៊ា ប៊ុនណាត ព្រះចៅអធិការវត្ត មណិរតនារាម ហៅវត្ត ទួលទំពូង បានមានព្រះថេរដឹការនៅក្នុងពិធីបុកគ្រឹះ បញ្ចុះបឋមសិលា សាងសង់អគារ សាលាធម្មសភាថ្មី កាលពីថ្ងៃទី១០ខែធ្នូឲ្យដឹងថា ការសម្រេចផ្តើមកសាងសាលាសភាជាថ្មីនេះដោយសារសាលាធម្មសភាចាស់ មានសភាព តូចចង្អៀត ចាស់ទ្រុឌទ្រោម ធ្វើឲ្យពុទ្ធបរិស័ទ មានកង្វល់ ភ័យខ្លាចបាក់ធ្លាក់ បង្កគ្រោះថ្នាក់ដល់ព្រះសង្ឃ និងពុទ្ធបរិស័ទ ដែលមកធ្វើបុណ្យទាននានា។
ព្រះអង្គបានបន្តថា សាលាធម្មសភាថ្មីនេះ នឹងសាងសង់តាមរចនាបថខ្មែរ នៅលើទីតាំងចាស់ ដែលមានទំហំ២៣គុណ៣៦ម៉ែត្រ មានកម្ពស់៣១ម៉ែត្រ គ្រោងនឹងចំណាយថវិកាប្រមាណ១លានដុល្លារអាមេរិក ខណៈពេលនេះ ប្រមូលបានបច្ច័យសរុបប្រមាណ ១០លានរៀល និង៥ម៉ឺនដុល្លារ ទុកសម្រាប់ការកសាង។ ក្រៅពីនោះការកសាងទាំងមូល សម្រេចប្រគល់ជូនទៅ លោកជំទាវ ភាព ហៀក ប្រធានក្រុមប្រឹក្សាភិបាល ក្រុមហ៊ុនជីបម៉ុង និងក្រុមគ្រួសារ ជាអ្នកចាត់ចែង ក្នុងការកសាង។
លោកឧកញ៉ា លាង ឃុន ប្រធានក្រុម អគ្គនាយក ក្រុមហ៊ុន ជីបម៉ុង បានថ្លែងឲ្យដឹងថា ផ្តើមចេញពីសទ្ធា នឹងដឹងគុណ ពីក្រុមគ្រួសារលោក ចំពោះអារាមមួយនេះ ជាពិសេស អនុវត្តតាមគោលការណ៍របស់ក្រុមហ៊ុន ដែលតែងតែចូលរួមបរិច្ចាក ក្នុងកិច្ចការសង្គម គ្រប់រូបភាពផ្សេងៗផងនោះ ក៏បានធានាទទួលរាប់រងទាំងស្រុង លើការកសាងសាលាធម្មសភាថ្មី ដែលមានទំហំ ៨២៨ម៉ែត្រក្រឡា លើផ្ទៃដី១២៧៦ម៉ែត្រក្រឡា ក្នុងទំហំទឹកប្រាក់១លានដុល្លារអាមេរិក ដែលសាងសង់ដោយក្រុមហ៊ុនជីបម៉ុងផ្ទាល់ តាមការរចនារបស់អ្នកជំនាញ។
លោកឧកញ៉ា ក៏បានអំពាវនាវ ឲ្យមានការចូលរួមពីសប្បុរសជន និងពុទ្ធបរិស័ទជិតឆ្ងាយ ដើម្បីទុកជាប្រយោជន៍រួម ក្នុងវិស័យព្រះពុទ្ធសាសនា នឹងជាបុណ្យកុសល តម្កល់ទុក សម្រាប់ពេលបច្ចុប្បន្ន និងអនាគតជាតិរៀងៗខ្លួន។
លោក ហ៊ុយ ហានសុង រដ្ឋលេខាធិការ តំណាងរដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ដែលបានចូលរួមនៅក្នុងពិធីបញ្ចុះបឋមសិលានាឱកាសនោះដែរ បានមានប្រសាសន៍ថា តាមរយៈ ព្រះពុទ្ធសាសនាបានស្តែងចេញពីការកសាងយ៉ាងរឹងមាំ នូវស្ពានសាមគ្គីភាព មិត្តភាព ការបង្កើតធនធានមនុស្ស ការអប់រំផ្លូវកាយ ផ្លូវចិត្ត ដែលជាមាគ៌ា ដ៏ប្រពៃ និងជាបំណងប្រាថ្នារបស់សង្គមកម្ពុជាទាំងមូល។
លោករដ្ឋលេខាធិការបញ្ជាក់ថា ព្រះពុទ្ធសានា ពិតជាបានដើរតួនាទីស្នូលយ៉ាងសំខាន់ នៃវប្បធម៌សន្តិភាព ដែលពលរដ្ឋខ្មែរ ផ្តល់តម្លៃយ៉ាងពិសិដ្ឋ និងពង្រឹងឲ្យក្លាយទៅជាសីលធម៌សង្គម តាមបែបផែន នៃការរស់នៅប្រកបដោយ ការរីកចម្រើន ជឿនលឿន និងសុខដុមនីយកម្ម ក្នុងសង្គមជាតិទាំងមូល ដោយគ្មានការរើសអើង៕
Source: Kampuchea Thmey Daily
0 Comments