បន្ទាយមានជ័យ ៖ លោកឧត្ដមសេនីយ៍ទោ ឈុន ម៉ៅ មេបញ្ជាការរងតំបន់ទី១ យោធភូមិភាគទី៥កាលពីព្រឹកថ្ងៃទី៣១ ខែធ្នូ ឆ្នាំ២០១៨ រួមទាំងក្រុមការងារ បានអញ្ជើញចុះទស្សនកិច្ចសិក្សាការងារកសាងពង្រឹងអង្គភាពរឹងមាំលើគ្រប់វិស័យ នៅកងអនុសេនាធំគាំទ្រ កងការពារព្រំដែនលេខ៥០៣ យោធភូមិភាគទី៥ ស្ថិតក្នុងភូមិបន្ទាយថ្មី ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។
ទស្សនកិច្ចសិក្សានេះ ក៏មានការអញ្ជើញចូលរួមពីសំណាក់លោកឧត្ដមសេនីយ៍ត្រី ឃួន ជឿន មេបញ្ជាការកងការពារព្រំដែនលេខ៥០៣ មន្ត្រីនគរបាល មន្ត្រីអាវុធហត្ថ អាជ្ញាធរមូលដ្ឋាន និងនាយ នាយទាហានជាច្រើននាក់។
ថ្លែងក្នុងឧកាសនោះ លោកវរសេនីយ៍ត្រី កេង លីម មេបញ្ជាការកងអនុសេនាធំគាំទ្រ កងការពារព្រំដែនលេខ៥០៣ យោធភូមិភាគទី៥ បានបង្ហាញរបាយការណ៍ ដោយធ្វើបទបង្ហាញ ស្ដីពីការកសាងពង្រឹងអង្គភាពរឹងមាំលើគ្រប់វិស័យរបស់កងអនុសេនាធំគាំទ្រ កងការពារព្រំដែនលេខ៥០៣ រួមមាន៤ ចំណុចធំៗ គឺ ១-លក្ខណៈសភាពការណ៍របស់អង្គភាព, ២-លទ្ធផលការងាររបស់អង្គភាពសម្រេចបាន, ៣-ការវាយតម្លៃចំណុចខ្លាំង និងចំណុចខ្សោយ, ៤-ផែនការអនុវត្តបន្ត។
លោក ឈុន ម៉ៅ បានធ្វើការកោតសរសើរ និងវាយតម្លៃខ្ពស់ចំពោះការខិតខំប្រឹងប្រែងយកចិត្តទុកដាក់លើកិច្ចការងារកសាងពង្រឹងអង្គភាពរឹងមាំលើគ្រប់វិស័យ ធ្វើឲ្យទទួលបានលទ្ធផលល្អប្រសើរ។
លោក ក៏បានផ្ដាំផ្ញើផងដែរដល់កងកម្លាំងទាហាន ត្រូវពង្រឹងស្មារតី ការការពារព្រះមហាក្សត្រ នៃយើង ការពារបូរណភាពទឹកដី ការពាររដ្ឋាភិបាលស្របច្បាប់ និងប្រជាពលរដ្ឋ។ មួយវិញទៀត ត្រូវទប់ស្កាត់ឲ្យបាន កុំឲ្យមានបទល្មើសយានយន្តឆ្លងដែនឲ្យបាន ព្រោះវាជាបទបញ្ជាថ្នាក់ដឹកនាំ និងជាការល្មើសច្បាប់ បើអនុវត្តមិនបានកុំធ្វើជាកងកម្លាំង។
សូមបញ្ជក់ផងដែរថា នាចុងឆ្នាំ២០១៨នេះ ជាបន្តបន្ទាប់ តាមកាំវិធាន និងការចាត់តាំងរបស់ លោកមេបញ្ជាការភូមិភាគបានដឹកនាំក្រុមការងារទស្សនកិច្ចសិក្សាការងារកសាងពង្រឹងអង្គភាពរឹងមាំលើគ្រប់វិស័យ គ្រប់អង្គភាពយោធាដែលចំណុះឲ្យភូមិភាគ៥៕
Source: Kampuchea Thmey Daily
0 Comments