ប្រព័ន្ធ​ផ្សព្វផ្សាយ​សង្គម​រាលដាល​ក្តីសង្ឃឹម​និង​ភាពភ័យខ្លាច​ក្នុងចំណោម​ជន​ចំណាកស្រុក​អាមេរិក​កណ្តាល

តើ​ពួកគេ​ឆ្លងកាត់​ព្រំដែន​ដោយ​របៀប​ណា​? តើ​ពួកគេ​គួរ​នាំយក​អ្វី​ទៅ​? ម្តាយ​និង​កូនៗ​របស់​ពួកគេ​កំពុង​គេច​ពី​ក្រុម​ហិង្សា​ឃោរឃៅ​ហើយ​បុរស​សង្ឃឹមថា ​នឹង​រក​វិធី​ចិញ្ចឹម​គ្រួសារ​របស់​ពួកគេ​។ ក្បួន​ចំណាកស្រុក​បាន​ទាក់ទាញ​អ្វីៗ​គ្រប់យ៉ាង​។​
​
ភ្លាមៗ​បន្ទាប់ពី​ក្បួន​មួយ​បាន​ចាកចេញ ផែនការ​សម្រាប់​ក្បួន​បន្ទាប់​បាន​រាលដាល​ក្នុង​ប្រព័ន្ធ​ផ្សព្វផ្សាយ​សង្គម​។ អ្នក​ដែល​ចាប់អារម្មណ៍​រាប់រយ​នាក់​បាន​ចោទ​ជា​សំណួរ ចូលរួម​ពិភាក្សា​ឬ​ចែករំលែក​ក្តីសង្ឃឹម​និង​ការភ័យខ្លាច​។​


​
មនុស្ស​ម្នាក់​និយាយថា “​គោលបំណង​របស់ខ្ញុំ​គឺ​ដើម្បី​ឈានដល់​សហរដ្ឋអាមេរិក​។ នៅក្នុង​ក្បួន​ចំណាកស្រុក គ្មាន​នរណាម្នាក់​អាច​ប៉ះ​ខ្ញុំ​បានទេ​”​។​
​មួយថ្ងៃ​មុនពេល​ក្បួន​នេះ​ចេញដំណើរ ជនអន្តោប្រវេសន៍​បាន​ចំណាយពេល​មួយ​យប់​នៅលើ​ទីលាន El Salvador del Mundo នៅក្នុង​រដ្ឋធានី San Salvador​។​
​
ចាប់តាំងពី​ខែតុលា​មក ជនអន្តោប្រវេសន៍​អាមេរិក​កណ្តាល​ជាង​៥,០០០​នាក់​បានធ្វើ​ដំណើរ​លើផ្លូវ​ដ៏​វែងឆ្ងាយ​ចម្ងាយ​រាប់ពាន់​គីឡូម៉ែត្រ​ដោយ​ធ្វើដំណើរ​ដោយ​ថ្មើរជើង តាម​រថយន្តក្រុង​ឬ​តាមផ្លូវ​ទៅ​ទិស​ខាងជើង​ឆ្ពោះទៅ​សហរដ្ឋអាមេរិក​។​

“​នៅក្នុង​ក្បួន​មាន​សុវត្ថិភាព​ជាង​”
​ស្ត្រី​មេម៉ាយ​អាយុ​៣៨​ឆ្នាំ​ម្នាក់​ដែលមាន​កូន​អាយុ​១១​ឆ្នាំ​និង​១៣​ឆ្នាំ​បាន​ប្រាប់ AFP ថា “​ខ្ញុំ​បានដឹង​អំពី​ក្បួន​នេះ​នៅលើ Facebook​។ មាន​មនុស្ស​បាន​បង្ហោះ​លីង​នៅក្នុង​កម្មវិធី WhatsApp​។ មនុស្ស​បាន​ដោះដូរ​ព័ត៌មាន​នេះ មិនមាន​មេដឹកនាំ​ទេ​”​។​
​
នាង​បដិសេធ​ប្រាប់​ឈ្មោះ​របស់​នាង​ព្រោះ​ខ្លាច​ថា ក្រុម​អន្ធពាល​នឹងធ្វើ​បាប​នាង​។
​ក្រុម​ឧក្រិដ្ឋជន​បាន​បង្ក​ភាពភ័យខ្លាច​មិន​ត្រឹមតែ​នៅក្នុង​ប្រទេស​អែល​សាល់​វ៉ា​ឌ័​រ​ទេ​ប៉ុន្តែ​ក៏​នៅ​តំបន់​អាមេរិក​កណ្តាល​ទាំងមូល​ផងដែរ​។​


​
ស្ត្រី​មេម៉ាយ​រូបនេះ​បាន​លាឈប់​ពី​ការងារ​ធ្វើ​នំពោត​រក​កម្រៃ​បាន​៦​ដុល្លារ​ក្នុង​មួយថ្ងៃ​របស់​នាង ដើម្បី​ចូលរួម​ក្បួន​ចំណាកស្រុក​។ នាង​គ្មាន​មធ្យោបាយ​ផ្សេងទៀត​ទេ​ដើម្បី​ព្យាយាម​ទៅដល់​សហរដ្ឋអាមេរិក​។​
​
នាង​និយាយថា "​យើង​ជា​ជនក្រីក្រ យើង​មិនមាន​ប្រាក់​៨​ពាន់​ដុល្លារ​តាម​ការទាមទារ​របស់​ក្រុម​ជួញដូរ​មនុស្ស​ទេ​។ នាង​បាន​បន្ថែមថា “​វា​មាន​សុវត្ថិភាព​ជាង​នៅក្នុង​ក្បួន​ចំណាកស្រុក​”​។​
“​ការ​កុហក​និង​ការខ្វះ​សាមគ្គីភាព​”
​
បន្ទាប់ពី​ការនាំ​មុខ​ដោយ​ជន​ចំណាកស្រុក​២,០០០​នាក់​ដែល​បាន​ចាក​ចេញពី​ប្រទេស​ហុង​ឌូ​រ៉ា​ស​នៅ​ថ្ងៃទី​១៣​ខែតុលា ក្រុម​ដំបូង​នៃ​ជនជាតិ​អែល​សាល់​វ៉ា​ឌ័​រ​ចំនួន​៤០០​នាក់​បានចាប់ផ្តើម​នៅ​ថ្ងៃទី​២៨​ខែតុលា​។​
​
បី​ថ្ងៃ​ក្រោយមក ចំនួន​របស់​ពួកគេ​បាន​កើនឡើង​បួន​ដងដោយ​អ្នកខ្លះ​បាន​ប្រាប់​អំពី​លទ្ធភាព​នេះ​តាមរយៈ​ទំព័រ Facebook នានា​ដូចជា “El Salvador emigrates for a better future” ជាដើម​ដែល​ទទួល​បានការ​ចុច like ជាង​៤,០០០​នាក់​។​
​
ទោះបីជា​យ៉ាងណាក៏ដោយ នៅ​ថ្ងៃទី​១៨​ខែវិច្ឆិកា នៅសល់តែ​២០០​នាក់​ប៉ុណ្ណោះ​ក្នុងចំណោម​ពួកគេ​ខណៈដែល​អ្នកផ្សេង​ទៀត​បា​ន​បោះបង់ចោល​ការធ្វើដំណើរ​ហើយ​ចំណាយ​ប្រាក់​៥​ដុល្លារ​ជិះឡាន​ក្រុង​ទៅ​ប្រទេស​ហ្គា​តេ​ម៉ា​ឡា​។​
​
ខណៈ​ប្រព័ន្ធ​ផ្សព្វផ្សាយ​សង្គម​បាន​ដើរតួនាទី​យ៉ាងសំខាន់​ក្នុងការ​កេណ្ឌ​និង​រៀបចំ​ជនអន្តោប្រវេសន៍​នោះ វា​ក៏​អាច​សាបព្រោះ​ការសង្ស័យ​ឬ​ការមិនសប្បាយចិត្ត​ក្នុងចំណោម​ពួកគេ​ផងដែរ​។​
​រឿងរ៉ាវ​ដែល​មិនអាច​ផ្ទៀងផ្ទាត់​បាន​នៃ​អរិភាព​ដែល​ជន​ចំណាកស្រុក​ជួបប្រទះ​នៅក្នុង​បណ្តា​ប្រទេស​ដែល​ពួកគេ​ឆ្លងកាត់​គឺ​បាន​រាលដាល​យ៉ាង​ឆាប់រហ័ស​ជាពិសេស​តាមរយៈ​កម្មវិធី WhatsApp ។​
​
មនុស្ស​ម្នាក់​ដែល​មិន​បញ្ចេញ​ឈ្មោះ​បានសរសេរថា “​ពួកគេ​ទាំងអស់​ត្រូវបាន​បង្ខាំង​នៅ​ព្រំដែន​ម៉ិ​ក​ស៊ិ​ក​ហើយ​គ្មាន​អ្នកណា​ផ្តល់​អ្វី​ឲ្យ​ពួកគេ​ទេ​”​។​
​អ្នកផ្សេង​ទៀត​បាន​អះអាងថា “​អ្នក​ត្រូវ​ចំណាយ​ប្រាក់​៥០​ដុល្លារ​” ដើម្បី​ឲ្យ​កូន​ឆ្លង​ព្រំដែន​។​
​
លោកស្រី Evelyn Marroquin នាយក​ផ្នែក​សេវា​ធ្វើ​ចំណាកស្រុក​នៃ​ប្រទេស​អែល​សាល់​វ៉ា​ឌ័​រ​បាន​ថ្លែងថា ជន​ចំណាកស្រុក​បានដាក់​ពាក្យ​បណ្តឹង​ជាច្រើន​។​
​
លោកស្រី​និយាយថា “​ពួកគេ​និយាយថា អ្នក​ដែល​រៀបចំ​ក្បួន​នេះ​បាន​សុំ​លុយ​។ មិនមាន​សាមគ្គីភាព​លើ​ប្រព័ន្ធ​ផ្សព្វផ្សាយ​សង្គម​ដើម្បី​ធ្វើដំណើរ​រួមគ្នា​ទេ​។ comment ទាំងអស់​នៅលើ​ប្រព័ន្ធ​ផ្សព្វផ្សាយ​សង្គម​គឺជា​ការ​កុហក​”៕ AFP

​

Source: Kampuchea Thmey Daily