ភ្នំពេញ ៖ អតីតភូមិត្រពាំងឈូកដែលកន្លងមកជាទីផ្សារលក់គ្រឿងញៀនដ៏សកម្មល្បីឈ្មោះបោះសម្លេងទូទាំងប្រទេសជាង២ទសវត្ស ឥឡូវនេះត្រូវបានសមត្ថកិច្ចបោសសំអាតអស់ហើយប៉ុន្តែគ្រឿងញៀននៅតែមានលក់ហូរហែក្នុងទីក្រុងដែលទីផ្សារលក់គ្រឿងញៀនលួចលាក់ថ្មីល្បីមួយទៀតគឺនៅម្តុំគល់ស្ពានព្រែកព្នៅ។
ការលើកឡើងថា នៅម្តុំគល់ស្ពានព្រែកព្នៅ ជាទីផ្សារលក់គ្រឿងញៀនដោយលួចលាក់នេះ គឺគេដឹងតាមរយៈចម្លើយសារភាពរបស់ក្រុមជនសង្គមងងឹត រកស៊ីមុខរបរនេះដោយខុសច្បាប់ដែលសមត្ថកិច្ចបង្ក្រាបបានជាច្រើនករណីហើយរកឃើញចម្លើយ ពីពួកគេដូចៗគ្នាថា ប្រភពទីតាំងលក់ថ្នាំញៀនចេញតែពីកន្លែងដដែលៗមួយនេះ(នៅម្តុំគល់ស្ពានព្រែកព្នៅត្រើយខាងលិច ស្ថិតក្នុងភូមិឡកំបោ សង្កាត់ស្វាយប៉ាក ខណ្ឌឫស្សីកែវ រាជធានីភ្នំពេញ)។
ក្រុមជនល្មើសពាក់ព័ន្ធគ្រឿងញៀន មួយចំនួនដែលសមត្ថកិច្ចខណ្ឌសែនសុខធ្លាប់បង្ក្រាបបាននាពេលកន្លងមក មួយចំនួនក៏បានសារភាពប្រាប់សមត្ថកិច្ចថា ពួកគេបានទិញថ្នាំញៀនមកពីជនមិនស្គាល់ឈ្មោះនៅម្តុំគល់ស្ពានព្រែកព្នៅ យកមកប្រើប្រាស់និងចែកចាយ។
នៅស្រុកពញាឮខេត្តកណ្តាល សមត្ថកិច្ចបានចាប់ខ្លួនក្រុមជនល្មើសរកស៊ីជួញដូរគ្រឿងញៀន រាប់រយករណី ដែលក្នុងចំណោមនោះ ភាគច្រើនពួកគេបានផ្តល់នូវចម្លើយសារភាពថា ថ្នាំញៀនដែលពួកគេបានយកមកលក់និងចែកចាយនៅទីនេះ(ស្រុក ពញាឮ) គឺបានទិញពីគេនៅម្តុំគល់ស្ពានព្រែកព្នៅ ត្រើយខាងលិច នៅប៉ែក ខាងត្បូងស្ពាន តែមិនប្រាប់ពីអត្តសញ្ញាណមេខ្លោងជាអ្នកលក់ដូរថ្នាំញៀននោះទេដែលពួកបានត្រឹមតែផ្តល់ចម្លើយទិញពីជនមិនស្គាល់ឈ្មោះតែប៉ុណ្ណោះ។
ព័ត៌មានចុងក្រោយ កាលពីថ្ងៃទី៦ ខែវិច្ឆិកា ឆ្នាំ២០១៨ សមត្ថកិច្ចនគរបាលស្រុកពញាឮ ខេត្តកណ្តាល បានចាប់ខ្លួនជនល្មើសជួញដូរថ្នាំញៀនបានចំនួន៣នាក់ និង ដកហូតបានថ្នាំញៀន១៤កញ្ចប់ នៅម្តុំរមណីយដ្ឋាន ភ្នំប្រសិត ភូមិតាពេច ឃុំឈ្វាំង។ ជនល្មើសម្នាក់ក្នុងចំណោម៣នាក់ជាមេខ្លោងមានឈ្មោះ សៀន សេង ភេទប្រុស អាយុ៣៤ឆ្នាំ បានសារភាពប្រាប់សមត្ថកិច្ចនគរបាលថា ថ្នាំញៀនទាំងនេះគាត់តែងតែទៅទិញមកពីគេលក់នៅនៅម្តុំខាងត្បូងគល់ស្ពានព្រែកព្នៅដោយទិញម្តងៗចំនួន១០០ដុល្លារ យកមករំលែកចែកចាយលក់បន្តក្នុង១កញ្ចប់តូចតម្លៃ១០ដុល្លារ គាត់ប្រាប់ថា មុខរបរនេះគាត់បានដឹងថា វាជាអំពើខុសច្បាប់ពិតមែន តែវាចំណេញបានច្រើនទ្វេដង ទើបចេះប្រថុយប្រថានដូច្នេះ៕
Source: Kampuchea Thmey Daily
0 Comments