អ្នកចាំទី ហែម ស៊ី​ម៉ៃ របស់​ក្លិប​អង្គ​រថា​យ​ហ្គឺ​រ ដល់​ថ្ងៃ​ចូល​រោង​ជ័យ

អ្នកចាំទី ហែម ស៊ី​ម៉ៃ ក្នុង​ក្លិប​អង្គ​រថា​យ​ហ្គឺ​រ (Angkor Tiger FC) ដែលជា​សមាជិក​ក្នុង​ពានរង្វាន់​លី​គ​កំពូល​កម្ពុជា (Metfone Cambodian League) បាន​ចូល​រោង​ជ័យ​រៀប​អាពាហ៍ពិពាហ៍​នៅ​ថ្ងៃ​សុក្រ ទី​២៨ ខែធ្នូ ឆ្នាំ​២០១៨ នេះ ស្រប​ពេល​ដែល​រូបគេ​កំពុង​សម្រាក​ព្យាបាល​របួស​ត្រៀម​បញ្ចេញ​សមត្ថភាព​ស្វាគមន៍​រដូវ​កាល​ឆ្នាំ​២០១៩ ខាងមុខ​។



​កីឡាករ ហែម ស៊ី​ម៉ៃ ដែលជា​កីឡាករ​បាល់ទាត់​ផង​និង​ជា​ថៅកែ​ហាង​លក់​សម្ភារៈ​កីឡា​ឈ្មោះថា «Tiger Sport» ភរិយា​ខ្លួន​មានឈ្មោះ កាក់ ដា​រី ជា​បុគ្គលិក​ក្រុមហ៊ុន​ឯកជន​មួយ និង​មាន​គេហដ្ឋាន​នៅមុខ​ហាង​លក់​សម្លៀកបំពាក់​កីឡាករ​របស់​ខ្លួន​ក្បែរ​វិទ្យាល័យ​ព្រះស៊ីសុវត្ថិ​។ អ្នក​ទាំង​២​បាន​ស្វែងយល់​ចិត្តថ្លើម​គ្នា​អស់​រយៈពេល​២​ឆ្នាំ​មក​ហើយ មុន​ដល់​ថ្ងៃ​ចូល​រោងការ​នេះ​។ យ៉ាងណា​ក្តី​កីឡាករ​វ័យ​៣០​ឆ្នាំ​រូប​នេះ​ ទើបតែ​បន្ត​កិច្ចសន្យា​ជាមួយ​ក្លិប​មួយ​រដូវ​កាល​ទៀត​ កាលពី​ពេល​ថ្មីៗ ហើយ​រូបគេ​តាំងចិត្ត​ធ្វើ​ឲ្យ​បាន​ល្អ​ឲ្យ​អស់ពី​លទ្ធផល​នៅ​រដូវ​កាល​ថ្មី​ខាងមុខ​។​



កីឡាករ ហែម ស៊ី​ម៉ៃ បាន​ចាប់​អាជីព​ជា​កីឡាករ​បាល់ទាត់​តាំងពី​ឆ្នាំ​២០០៤ មក​ម្ល៉េះ​ដោយ​កាលនោះ​ជា​សមាជិក​ក្នុង​ក្លិប​បៀ​ល​ប្រាយ​យូ​ណាយ​ធី​ត ហើយ​រហូតដល់​ឆ្នាំ​២០១២ រូបគេ​បាន​ផ្លាស់​ទៅលេង​ក្នុង​ក្លិប​គីរីវង់​សុខ​សែន​ជ័យ មុន​ចាក​ចេញទៅ​ចូលរួម​ជាមួយ​ក្រុម​អាស៊ី​អឺរ៉ុប នៅ​ឆ្នាំ​បន្ទាប់​។ នៅ​ឆ្នាំ​២០១៤ រូបគេ​បាន​ចូលរួម​ជាមួយ​ក្រុម​ត្រាយ​អាស៊ី​ភ្នំពេញ មុន​ប្ដួ​រ​ឈ្មោះ​មកជា​ខេ​ម​បូ​ឌា​ន​ថា​យ​ហ្គឺ​រ នៅ​ឆ្នាំ​២០១៥ កន្លងទៅ​។ ក្រៅពី​នេះ​រូបគេ​ធ្លាប់ជា​សមាជិក​ក្នុង​ក្រុម​ជម្រើសជាតិ​កម្ពុជា នា​ពេល​កន្លងទៅ​ផង​ដែរ​។ កីឡាករ​រូប​នេះ​ ធ្លាប់​ឈ្នះ​ពានរង្វាន់​អ្នកចាំទី​ល្អ​នៅ​ឆ្នាំ​២០០៩ ក្នុង​ពានរង្វាន់​សម្តេច​តេ​ជោ ហ៊ុន សែន (Hun Sen Cup) ផងដែរ​។



​ទោះបី​ខ្លួន​ជា​កីឡាករ​មែន តែ​កីឡាករ ហែម ស៊ី​ម៉ៃ ធ្លាប់បាន​បញ្ចប់​វគ្គ​សិក្សា​គ្រូបង្វឹក​គ្រូបង្វឹក​អ្នកចាំទី​កម្រិត​អន្តរជាតិ (MA FIFA Goalkeeping Coaching Course) នៅ​មជ្ឈមណ្ឌល​និង​សាលា​បាល់ទាត់​ជាតិ​បាទី ដែល​រៀបចំឡើង​ដោយ​សហព័ន្ធ​កីឡាបាល់ទាត់​កម្ពុជា សហការ​ជាមួយ​សហព័ន្ធ​កីឡាបាល់​ទាត់​អន្តរជាតិ​ (FIFA) ក្រោមការ​បង្ហាត់​បញ្ជា​ពី​គ្រូ​ឧទ្ទេស​បរទេស​ផង​ដែរ​៕

Source: Kampuchea Thmey Daily