ក្រុមអ្នកស៊ើបអង្កេតនៅក្នុងប្រទេសថៃបានសម្រេចលើកលែងការចោទប្រកាន់ព្រហ្មទណ្ឌប្រឆាំងនឹងឧបនាយករដ្ឋមន្ត្រីថៃពីបទមិនបានប្រកាសទ្រព្យសម្បត្តិ, មួយឆ្នាំបន្ទាប់ពីគាត់ត្រូវបាន រកឃើញថាមាននាឡិកាប្រណីតជាច្រើនដែលមានតម្លៃលើសប្រាក់ខែរដ្ឋាភិបាលរបស់គាត់។
បញ្ហានេះបានចាប់ផ្តើមកាលពីខែធ្នូមុននៅពេលដែលមានការថតរូបអំឡុងការបង្ហាញគណៈរដ្ឋមន្ត្រីថ្មីមួយ។រដ្ឋមន្ត្រីការពារជាតិលោកឧត្តមសេនីយ៍ Prawit Wongsuwan បានលើកដៃរបស់គាត់ដើម្បីការពារភ្នែកពីពន្លឺព្រះអាទិត្យហើយអ្នកយកព័ត៌មានបានកត់សម្គាល់ឃើញនាឡិកាដ៏ភ្លឺចាំងរបស់គាត់។ ការពិនិត្យមើលកំណត់ត្រានៃទ្រព្យសម្បត្តិដែលបានបង្ហាញរបស់គាត់បានបញ្ជាក់ថា គាត់មិនដែលប្រកាសអំពីតម្លៃនាឡិកាម៉ាក Richard Mille ដ៏ថ្លៃនោះទេ។
ការពន្យល់របស់គាត់ដែលថាគាត់បានខ្ចីនាឡិកានោះនិងនាឡិកាជាង២០ទៀតពីមិត្តភក្តិដែលបានស្លាប់គឺត្រូវបានជួបប្រទះនឹងការសើចចំអកជាសាធារណៈ។
ប្រមុខស្ថាប័នប្រឆាំងអំពើពុករលួយរបស់ថៃបាននិយាយកាលពីថ្ងៃព្រហស្បតិ៍ថា ខ្លួនបានកំណត់ថា ការពន្យល់របស់លោក Prawit គឺជាការពិត។
លោក Worawit Sookboon អគ្គលេខាធិការនៃគណៈកម្មការជាតិប្រឆាំងអំពើពុករលួយបាននិយាយក្នុងសន្និសីទសារព័ត៌មានមួយថា “គណៈកម្មាធិការមួយនៃគណៈកម្មការប្រឆាំងអំពើពុករលួយជាតិបានបោះឆ្នោត៥ទល់នឹង៣ដើម្បីសម្រេចថា មានភស្តុតាងមិនគ្រប់គ្រាន់ក្នុងការសន្និដ្ឋានថា លោកឧត្តមសេនីយ៍ Prawit Wongsuwan មានចេតនាដាក់ពាក្យប្រកាសទ្រព្យសម្បត្តិក្លែងក្លាយឬលាក់ព័ត៌មានចាំបាច់។”
លោក Prawit គឺជាសមាជិកកំពូលមួយរូបនៃរបបយោធាដែលបានគ្រប់គ្រងប្រទេសថៃចាប់តាំងពីការធ្វើរដ្ឋប្រហារឆ្នាំ២០១៤។ របបនេះបានប្តេជ្ញាថានឹងបំបាត់ចោលអំពើពុករលួយថៃប៉ុន្តែសមាជិករបស់ខ្លួនបានជាប់ពាក់ព័ន្ធនឹងការចោទប្រកាន់អំពើពុករលួយមួយចំនួន។ របបយោធាបានសន្យាថានឹងរៀបចំការបោះឆ្នោតនៅដើមឆ្នាំក្រោយបើទោះបីជាក្រុមអ្នករិះគន់មានការព្រួយបារម្ភថា ការបោះឆ្នោតអាចត្រូវបានក្លែងបន្លំដើម្បីដាក់សមាជិកសភាយោធាបច្ចុប្បន្នចូលក្នុងការិយាល័យជាប់ឆ្នោតក៏ដោយ៕ AP
[caption id="attachment_1009214" align="alignnone" width="640"]
[/caption]Source: Kampuchea Thmey Daily
0 Comments