ភ្នំពេញ ៖ គណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា នៅអំឡុងពេលបិទផ្សាយបញ្ជីបោះឆ្នោតដំបូងនេះ មានបណ្តឹងចំនួន២ នៅក្រុមប្រឹក្សា ឃុំ សង្កាត់ ប៉ុន្តែត្រូវបានដោះស្រាយចប់សព្វគ្រប់ហើយ នេះបើតាមសេចក្តីប្រកាសព័ត៌មានរបស់ គ.ជ.ប ចុះថ្ងៃទី០៣ ខែធ្នូ ឆ្នាំ២០១៨។
គ.ជ.ប បានបញ្ជាក់ថា មានបណ្តឹងចំនួន២ ទាក់ទងនឹងការបិទផ្សាយបញ្ជីបោះឆ្នោតដំបូង ហើយត្រូវបានដោះស្រាយរួចរាល់ ក្នុងរយៈពេល៥ថ្ងៃ (ចាប់ពីថ្ងៃទី២៧ ខែវិច្ឆិកា ដល់ថ្ងៃទី០១ ខែធ្នូ ឆ្នាំ២០១៨) នៃការដាក់ការទទួល និងការដោះស្រាយពាក្យបណ្តឹងនៅក្រុមប្រឹក្សា ឃុំ សង្កាត់ ហើយបណ្តឹងទាំង២នោះ រួមមាន ទី១- ជាបណ្តឹងតវ៉ា ត្រូវបានដោះស្រាយរួច និងទី២- ជាបណ្តឹងជំទាស់ចំនួន១ បណ្តឹងត្រូវបានដោះស្រាយរួច។
បទបញ្ជា និងនីតិវិធីសម្រាប់ការពិនិត្យបញ្ជីឈ្មោះ និងការចុះឈ្មោះបោះឆ្នោតប្រចាំឆ្នាំ បានចែងថា បញ្ជីបោះឆ្នោត និងបញ្ជីឈ្មោះអ្នកដែលត្រូវលុបចេញពីបញ្ជីបោះឆ្នោត ត្រូវបិទផ្សាយនៅតាមសាលាឃុំ សង្កាត់ និងនៅតាមទីសាធារណៈណាមួយក្នុងឃុំ សង្កាត់ទូទាំងប្រទេស។ ជនណាក៏ដោយមានសិទ្ធិប្តឹងតវ៉ា ឬប្តឹងជំទាស់ជាលាយលក្ខណ៍អក្សរទៅក្រុមប្រឹក្សាឃុំ សង្កាត់ ក្នុងរយៈពេលយ៉ាងយូរ ៥ថ្ងៃ បន្ទាប់ពីថ្ងៃបិទផ្សាយបញ្ជីបោះឆ្នោតដំបូង។
សូមជម្រាបជូនថា ក្នុងដំណាក់កាលបិទផ្សាយបញ្ជីបោះឆ្នោតដំបូង មិនមានពាក្យបណ្តឹងជំទាស់នឹងសេចក្តីសម្រេចរបស់ក្រុមប្រឹក្សាឃុំ សង្កាត់ មក គ.ជ.ប ទេ។ ចំណែកឯក្នុងដំណាក់កាលចុះឈ្មោះបោះឆ្នោត ដែលបានប្រព្រឹត្តទៅកាលពីថ្ងៃទី១ ដល់ថ្ងៃទី១៨ ខែតុលា ឆ្នាំ២០១៨ ក៏មិនមានបណ្តឹងតវ៉ានឹងការបដិសេធការសុំចុះឈ្មោះបោះឆ្នោតណាមួយ ត្រូវបានដាក់ទៅ ក្រុមប្រឹក្សាឃុំ សង្កាត់នោះដែរ។
ជារួមការបិទផ្សាយបញ្ជីបោះឆ្នោតដំបូង ដែលមានរយៈពេល ៥ថ្ងៃ បានប្រព្រឹត្តទៅដោយរលូនក្នុងក្របខ័ណ្ឌទូទាំងប្រទេស ជូនសាធារណជន៕
Source: Kampuchea Thmey Daily
0 Comments