អ្នកប្រដាល់ជើងខ្លាំង៤រូប នឹងឡើងប្រកួតដណ្តើមពានអនុស្សាវរីយ៍បាយ័ន សម្រាប់ប្រភេទទម្ងន់៥៧គីឡូក្រាម ឆ្នាំ២០១៨។ អ្នកប្រដាល់ទាំង៤រូបនោះ រួមមាន ឌឹម សារិទ្ធ មកពីក្លិបមជ្ឈមណ្ឌលកីឡាខ.ភ.ម , នីម នន ក្លិបកងពលតូចទ័ពឆ័ត្រយោង៩១១, អ៊ូច ធារិទ្ធ ក្លិបអាណាចក្រគុនខ្មែរ និងស៊ឹម ប៊ុនឆៃ មកពីក្លិបព្រៃទទឹងខេត្តបាត់ដំបង។
ពួកគេទាំង៤នាក់នេះ នឹងជួបប្រកួតគ្នានៅល្ងាចថ្ងៃសៅរិ៍ទី០៨ធ្នូ២០១៨នេះ នៅលើសង្វៀនបាយ័នស្ទឹងមានជ័យ ។អ្នកប្រដាល់ទាំង៤រូបនេះ បន្ទាប់ពីឆ្លងកាត់ការចាប់ឆ្នោតនោះ ឌឹម សារិទ្ធនឹងត្រូវជួបជាមួយនីម នន ហើយ អ៊ូច ភារិទ្ធ ជួបជាមួយ ស៊ឹម ប៊ុនឆៃ។
រវាងអ្នកប្រដាល់ ឌឹម សារិទ្ធ និង នីម នន នេះ ពួកគេមិនធ្លាប់ប៉ះគ្នាទេកន្លងមក ។ ពីរនាក់នេះ ពិបាកទស្សន៍ទាយណាស់ថា អ្នកណាឈ្នះ អ្នកណាចាញ់នោះ សម្រាប់ការជួបគ្នាលើកនេះ ព្រោះថានីម នន ថ្វីត្បិតតែគេមានស៊ុហ្វខ្លាំង ប៉ុន្តែមិនប្រាកដថាគេអាចយកឈ្នះឌឹម សារិទ្ធ នោះទេ ព្រោះសារិទ្ធ គេក៏ខ្លាំងនិងល្អដែរ ហើយមួយទៀត សារិទ្ធ ជាអ្នកប្រដាល់ដែលមានចិត្តប្រដាល់ធំ ស៊ូចំពោះការប្រកួត ។ និយាយរួម នីម នន ពិបាកទប់ទល់ជាមួយឌឹម សារិទ្ធ ហើយ។
ចំពោះអ៊ូច ធារិទ្ធ និង ស៊ឹម ប៊ុនឆៃ វិញ ពួកគេទាំងពីរនេះ ធ្លាប់ជួបប្រកួតគ្នាម្តងហើយ កន្លងមក ដែលកាលណោះស៊ឹម ប៊ុនឆៃឈ្នះក្នុងទឹកទី៣ ដោយការស៊ីឡាកលើធារិទ្ធ ព្រោះតែ អ៊ូច ធារិទ្ធ ប្រកួតខុសលក្ខណះបច្ចេកទេសវាយថែមទៅលើដោយអចេតនានោះ។
យ៉ាងណា រវាងពួកគេពីរនាក់នេះ ស៊ឹម ប៊ុនឆៃទំនងជាមិនអាចឈ្នះអ៊ូច ធារិទ្ធ ក្នុងការប្រកួតជម្រុះលើកដំបូងនោះ។
ទោះជាយ៉ាងណា ក្នុងចំណោមពួកគេ៤នាក់នេះ គេបានកត់សម្គាល់ឃើញថា ឌឹម សារិទ្ធនិង អ៊ូច ធារិទ្ធ គេមានថ្វីដៃល្អដូចគ្នា ទាំងបទពិសោធន៍ ទាំងក្បាច់គុន ទាំងកម្លាំងស៊ុហ្វ ដែលអាចឆ្លងផុតវគ្គជម្រុះ ឈានដល់វគ្គផ្តាច់ព្រ័ត្របាន។ តែយ៉ាងណាក៏ដោយ គេមិនអាចទាយមុនបានថា ការប្រកួតដណ្តើមពានបាយ័នទម្ងន់៥៧គីឡូក្រាមឆ្នាំ២០១៨នេះ មិនដឹងថាធ្លាក់ទៅលើនរណានោះទេ ។
គួរបញ្ជាក់អោយដឹងថា ការប្រកួតនេះប្រព្រឹត្តទៅតាមរូបមន្តជាMarathon គឺចាញ់ជ្រុះហាលអាវ ឈ្នះត្រូវបន្តការប្រកួតទៀត ទាល់តែរកឃើញជើងខ្លាំងម្ចាស់ពានក្នុងពេលតែមួយ ។
ការប្រកួតចែកចេញជាពីរដំណាក់កាល ដែលដំណាក់កាលទី១ប្រកួតជម្រុះ ដើម្បីជម្រុះចោលពីរនាក់ដែលចាញ់ ហើយពីរនាក់ដែលឈ្នះនោះ ត្រូវឡើងទៅជួបគ្នាក្នុងដំណាក់កាលទី២ ដែលជាការប្រកួតផ្តាច់ព្រ័ត្រដណ្តើមពានអនុស្សាវរីយ៍របស់ស្ថានីយ៍ទូរទស្សន៍បាយ័ន ។ការប្រកួតក្នុងដំណាក់កាលទី១ គឺប្រកួតតែ៣ទឹកប៉ុណ្ណោះ ដោយក្នុងមួយទឹកមាន៣នាទី និងការប្រកួតក្នុងដំណាក់កាលផ្តាច់ព្រ័ត្រ គឺវាយ៥ទឹកតែមួយទឹកវាយតែ២នាទីទេ ។
ចំពោះការប្រកួតគូឯកវិញនោះ អេ រដ្ឋា អ្នកប្រដាល់ក្លិបអេភូថងកីឡា ត្រូវគេផ្គូអោយជួបប្រកួតជាមួយឆាយ មាស អ្នកប្រដាល់ក្លិបសំរោងកោងខេត្តបាត់ដំបង ដោយប្រកួតគ្នាក្នុងទម្ងន់៦០គីឡូក្រាម ។
ពីរនាក់នេះ ពុំធ្លាប់មានប្រវត្តិជួបគ្នាទេកន្លងមក ។ប៉ុន្តែយ៉ាងណា រវាងពួកគេទាំងពីរ នាក់នេះ អេ រដ្ឋា គេល្អនិងខ្លាំងជាងឆាយ មាស តែមិនច្បាស់ថាអេ រដ្ឋា ឈ្នះ ឆាយ មាស នោះឡើយ។ការប្រកួតចុងក្រោយរបស់ឆាយ មាស គឺវាយឈ្នះងួន គា អ្នកប្រដាល់ក្លិបតាឡីដំរីគីមានរិទ្ធ ដោយពិន្ទុ ហើយការប្រកួតចុងក្រោយរបស់អេ រដ្ឋាវិញ គឺវាយឈ្នះអ្នកប្រដាល់ថៃMoeun Phich ក្នុងទឹកទី៣។ដូច្នេះ ឆ្លងកាត់ការប្រកួតចុងក្រោយនេះ បង្ហាញឲ្យឃើញថា អេ រដ្ឋា គេល្អនិងខ្លាំងជាង ឆាយ មាស៕
Source: Kampuchea Thmey Daily
0 Comments