ឆបោក​ម៉ូតូ​របស់​មិត្តភក្តិ យក​ទៅ​បញ្ចាំ ​យក​លុយ​ទិញ​ថ្នាំញៀន

កំពង់ចាម ៖​ ​ជនសង្ស័យ២​នាក់​ត្រូវ​សមត្ថកិច្ច​ស្រាវជ្រាវ​ចាប់ខ្លួន បន្ទាប់ពី​ធ្វើ​សកម្មភាព​ឆបោក​ម៉ូតូ​របស់​មិត្តភក្តិ យកទៅ​បញ្ចាំ​។​

ប៉ូលិស​បានអោយដឹងថា​ នៅ​ថ្ងៃទី ៨​ ខែធ្នូ ឆ្នាំ​២០១៨ ​វេលា​ម៉ោង ១៧​និង​០០​នាទី ប៉ុស្តិ៍​នគរបាល​រដ្ឋបាល​វាលវង់ បានទទួល​បណ្ដឹង​ពី​ឈ្មោះ លី វិ​រៈ ភេទ​ប្រុស អាយុ​២២​ឆ្នាំ មុខរបរ​ជាង​ឡាន មាន​ទីលំនៅ​ភូមិ​បឹង​កុក​ទី​១ សង្កាត់ បឹង​កុក ក្រុង​កំពង់ចាម ខេត្តកំពង់ចាម ប្ដឹង​ពី​ឈ្មោះ ចិត្ត ភេទ​ប្រុស អាយុ​ប្រហែល​២២​ឆ្នាំ ស្នាក់នៅ​ភូមិ​មេម៉ាយ សង្កាត់​បឹង​កុក ក្រុង​កំពង់ចាម​និង​បក្ខ​ពួក 01​នាក់​មិន​ស្គាល់ ដែល​បានធ្វើ​សកម្មភាព ឆបោក​ម៉ូតូ​ធុន​ហុងដា សេ​១២៥ ពណ៌​ខ្មៅ ស្លាក​លេខ កំពង់ចាម 1M.២៥១៨ លេខ​តួ​+​លេខ​ម៉ាស៊ីន ៨៧៦៩៩៨១ កាលពី​វេលា​ម៉ោង ០៦​និង​០០​នាទី ថ្ងៃទី ០៥​ខែធ្នូ​ឆ្នាំ​២០១៨ នៅ​ចំណុច​មុខ​ហាង​កាហ្វេ​មុខ​តេ​លា ស្ថិតក្នុង​ភូមិ​ទី​៤ សង្កាត់​វាលវង់ ក្រុង​កំពង់ចាម ខណៈពេល​ជនបង្ក​ខាងលើ បាន​ខ្ចី​ម៉ូតូ​របស់​ខ្លួន​ជិះ យកទៅ​បាត់ មិន​យក​ម៉ូតូ​មកអោយ​វិញ​រហូតដល់​បច្ចុប្បន្ននេះ​។​

ប៉ូលិស​បាន​បន្តថា ក្រោយ​ទទួល​បណ្តឹង​សមត្ថកិច្ច​យើង​ធ្វើការ​ស្រាវជ្រាវ រហូតដល់​ថ្ងៃទី​11​ខែធ្នូ​ឆ្នាំ​2018 ជំនាញ​ស្រុក​កងមាស បាន​សហការ​ជាមួយ​ជំនាញ​ខេត្ត ស្រាវជ្រាវ និង​មានការ​សង្ស័យ​ទៅលើ​មុខសញ្ញា 02​នាក់ ដែល​ទៅ​សំងំ​លាក់ខ្លួន​នៅ​ចំណុច​បឹង​កន្លែង​ចក ខាងលិច​ភូមិ​ដំណាក់​ជ្រៃ ស្រុក​កងមាស​។​

ជន​​សង្ស័យ​ទាំង​២​មាន​:
1.​ឈ្មោះ​នាថ​ហ្វា​ដា​(​ហៅ​ចិត្ត​)​ ភេទ​ប្រុស​ អាយុ​25​ឆ្នាំ​
2.​ឈ្មោះ​គិ​ន​ប៊ុនឡុង​ ភេទ​ប្រុស ​អាយុ​23​ឆ្នាំ ​ទាំង​02​នាក់​ មុខរបរ​មិន​ពិតប្រាកដ​ មាន​ទីលំនៅ​ផ្ទះ​ជួល​ម្តុំ​បឹង​កុក​ក្រុង​កំពង់ចាម។

ប៉ូលិស​បាន​បញ្ជាក់​ថា តាម​ការសាកសួរ​មុខសញ្ញា​ទាំង​2​នាក់​ខាងលើ​បាន​ឆ្លើយថា ​ខ្លួន​គ្មាន​ម៉ែឪ​ផ្ទះសំបែង​ទេ​ ហើយ​បាន​យក​ម៉ូតូ​1​គ្រឿង​ម៉ាក C125​ពណ៌​ខ្មៅ​ជា​កម្ម​សិទ្ធិ​របស់​ឈ្មោះ​វរ​:​នៅ​កំពង់ចាម​យកទៅ​បញ្ចាំ​នៅ​ឃ្លាំង​រំសេវ​ភ្នំពេញ​បាន​លុយ​120$​ហើយ​យក​លុ​​យ ស៊ីចាយ​និង លស់​ទូរស័ព្ទ​បញ្ចាំ​គេ​និង​ទិញ​ថ្នាំញៀន​ជក់​អស់ហើយ​។​
​
បច្ចុប្បន្ន​ជនសង្ស័យ​ទាំង​02​នាក់​ ​​​​ឃាត់​ខ្លួន​នៅ​អធិការដ្ឋាន​នគរបាល​ស្រុក​កងមាស​ដើម្បី​បំពេញ​ឯកសារ​តាម​នីតិវិធី៕

Source: Kampuchea Thmey Daily