ភ្នំពេញ ៖ សម្តេចតេជោ ហ៊ុន សែន គ្រោងបំពេញទស្សនកិច្ចផ្លូវការទៅកាន់សាធារណរដ្ឋប្រជាមានិតចិននៅក្នុងអំឡុង ថ្ងៃទី២១, ២២ ខែមករាខាងមុខនេះ គ្រាន់តែបើកទំព័រឆ្នាំថ្មីឆ្នាំ២០១៩ភ្លាម ពោលតាមការគ្រោងទុកតបតាមការអញ្ជើញរបស់នាយករដ្ឋមន្ត្រីចិន លោក លី ខឺឈាង។
នៅក្នុងជំនួបសំដែងការគួរសមនិងពិភាក្សាការងាររវាងឧបនាយករដ្ឋមន្ត្រី ប្រាក់ សុខុន រដ្ឋមន្ត្រីក្រសួងការបរទេសនិងសហប្រតិបត្តិការអន្តរជាតិនិងលោក Wang wentian ឯកអគ្គរដ្ឋទូតចិនប្រចាំនៅកម្ពុជាដែលទើបតែងតាំងថ្មី បានពិភាក្សាផងដែរពាក់ព័ន្ធដំណើរទស្សនកិច្ចផ្លូវការរបស់សម្តេចតេជោ ហ៊ុន សែន ទៅកាន់ប្រទេសចិន។
លោក កេត សុផាន់ អ្នកពាក្យក្រសួងការបរទេសនិងសហប្រតិបត្តិការអន្តរជាតិ បានឲ្យដឹងថា នៅក្នុងជំនួបនាព្រឹកថ្ងៃទី២៥ ខែធ្នូ ឆ្នាំ២០១៨នេះ លោកឧបនាយករដ្ឋមន្ត្រី ប្រាក់ សុខុន និងឯកអគ្គរដ្ឋទូតចិនបានពិភាក្សាគ្នាច្រើនលើបញ្ហាទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ។ ជាពិសេសពិភាក្សាលើការរៀបចំដំណើរទស្សនកិច្ចរបស់សម្តេចតេជោ ហ៊ុន សែន ទៅកាន់ប្រទេសចិននាខែក្រោយនេះ ធ្វើយ៉ាងណាឲ្យដំណើរបំពេញទស្សនកិច្ចនេះទទួលបានជោគជ័យខ្ពស់។
លោកឧបនាយករដ្ឋមន្ត្រី ប្រាក់ សុខុន បានគូសបញ្ជាក់ទៅកាន់លោកឯកអគ្គរដ្ឋទូតចិនថា ដំណើរទស្សនកិច្ចរបស់សម្តេចតេជោ ហ៊ុន សែន ទៅកាន់ប្រទេសចិនគឺជាវិញ្ញាសាដ៏សំខាន់មួយបញ្ជាក់ពីសមត្ថភាពការងាររបស់លោកឯកអគ្គរដ្ឋទូតចិនប្រចាំនៅកម្ពុជាក្នុងនាមជាអ្នកសម្របសម្រួល។
បើតាមលោក កេត សោផាន់ ដំណើរទស្សនកិច្ចរបស់សម្តេចតេជោ ហ៊ុន សែន ទៅកាន់ប្រទេសចិននេះ នឹងមានកិច្ចព្រមព្រៀងក៏ដូចជាឯកសារមួយចំនួននឹងត្រូវចុះហត្ថលេខាជាមួយគ្នាផងដែរ។
លោកឯកអគ្គរដ្ឋទូតថ្មីរបស់ចិនក៏បានបង្ហាញនូវជំហររបស់រដ្ឋាភិបាលចិនក្នុងការគាំទ្រចំពោះវត្តមានសម្តេចតេជោ ហ៊ុន សែន ក៏ដូចជាគណបក្សប្រជាជនកម្ពុជាក្នុងការដឹកនាំកម្ពុជាក៏ដូចជានៅក្នុងសកម្មភាពផ្សេងៗលើឆាកអន្តរជាតិផងដែរ។
បើតាមលោក កេត សោផាន់ បានគូសបញ្ជាក់ទៀតថា ក្នុងជំនួបនោះក្រៅពីការពិភាក្សាលើការងារពង្រឹងទំនាក់ទំនងនិងកិច្ចសហប្រតិបត្តិការរវាងប្រទេសទាំងពីរឲ្យកាន់តែល្អប្រសើរឡើង។
លោកឧបនាយករដ្ឋមន្ត្រី ប្រាក់ សុខុន និងលោកឯកអគ្គរដ្ឋទូតចិនក៏បានលើកអំពីបញ្ហាមួយចំនួនដែលនាំឲ្យមានភាពល្អក់កករដល់ទំនាក់ទំនងប្រទេសទាំងពីរផងដែរ ។ ដូចជាកន្លងមកមានការផ្សព្វផ្សាយព័ត៌មានថា កម្ពុជាផ្តល់ទីតាំងសម្រាប់កងទ័ពរបស់ចិនក៏ដូចជាបញ្ហារបស់ជនជាតិនៅក្នុងខេត្តព្រះសីហនុជាដើម ត្រូវបានចាត់ទុកជាព័ត៌មានមួយធ្វើឲ្យមានបញ្ហាដល់ទំនាក់ទំនងរវាងកម្ពុជានិងចិន។ លោកឧបនាយករដ្ឋមន្ត្រី ប្រាក់ សុខុន និង លោក Wang wentian បានចាត់ទុកព័ត៌មានទាំងអស់នេះ គឺជាចេតនាមិនល្អមួយរបស់បណ្តាប្រទេសដែលចង់បំផ្លាញទំនាក់ទំនងកម្ពុជានិងចិន។
លោក កេត សោផាន់ បានដកស្រង់សម្តីរបស់ឯកអគ្គរដ្ឋទូតចិនមកបញ្ជាក់ថា «លោកឯកអគ្គរដ្ឋទូតបានបញ្ជាក់ច្បាស់ថា លោកខាងលិចតែងតែលាបពណ៌ធ្វើឲ្យល្អក់កករសម្រាប់ទំនាក់ទំនងកម្ពុជា-ចិន ប៉ុន្តែយើងបានសហការគ្នាជិតស្និទ្ធដើម្បីដោះស្រាយបញ្ហានេះ»។
លោកឧបនាយករដ្ឋមន្ត្រី ប្រាក់ សុខុន បានយល់ស្របចំពោះការលើកឡើងរបស់លោកឯកអគ្គរដ្ឋទូតហើយបានបញ្ជាក់តបថា «ជាធម្មតាទេ ប្រទេសដែលគេមិនសប្បាយចិត្ត គេតែងតែយករឿងតូចតូចបំប៉ោងជារឿងធំ។ តែតាមពិតជាក់ស្តែងការវិនិយោគធំបែបនេះគឺបាននាំមកនូវផលប្រយោជន៍ដល់កម្ពុជានិងចិន»។
នៅក្នុងជំនួបនោះដែរ លោកឧបនាយករដ្ឋមន្ត្រី ប្រាក់ សុខុន ក៏បានថ្លែងអំណរគុណដល់រដ្ឋាភិបាល និងប្រជាជនចិនដែលតែងតែផ្តល់ជំនួយដល់ប្រទេសកម្ពុជ។ ជំនួយទាំងនេះបានធ្វើឲ្យកម្ពុជាមានឯករាជ្យ និងអធិបតេយ្យពេញលេញក្នុងការបំពេញការងាររបស់ខ្លួន។
សូមរំលឹកជូនផងដែរថា កាលពីថ្ងៃទី១៧ ខែធ្នូ ក្នុងឱកាសសម្ពោធទំនប់វារីអគ្គិសនីសេសាន្តក្រោម២ ក្នុងខេត្តស្ទឹងត្រែង សម្តេចតេជោនាយករដ្ឋមន្ត្រីបានប្រាប់ទៅលោកឯកអគ្គរដ្ឋទូតចិនថា ទស្សនកិច្ចរបស់សម្តេចទៅកាន់ប្រទេសចិននៅខាងមុខ មានការចរចាផ្តោតទៅលើការស្នើសុំឥណទានយ៉ាងគំហុកមួយដើម្បីតបណ្តាញអគ្គិសនី។
សម្តេចតេជោ ហ៊ុន សែន បានប្រាប់ទៅឯកអគ្គរដ្ឋទូតចិនថា «សុំជម្រាបទៅលោកប្រធានាធិបតី ស៊ី ជីនភីង និងលោកនាយករដ្ឋមន្ត្រី លី ខឺឈាង ថា ក្រៅពីការកសាងផ្លូវថ្នល់ ទៅលើបញ្ហាការកសាងប្រឡាយទឹក យើងខ្ញុំត្រូវការនូវទុនដើម្បីកសាងនូវបណ្តាញចែកចាយអគ្គិសនី។ មិត្តចិនបានមកវិនិយោគវារីអគ្គិសនីទាំង៧ ដែលយើងសម្ពោធអាទី៧ នៅថ្ងៃនេះគឺប្រភពទុនទាំងអស់មកពីចិន។ ...នៅក្នុងខេត្តកំពង់ស្ពឺមាន២ គិរីរម្យ ១ និងគិរីរម្យ៣។ នៅកំពតមានកំចាយ ។ ឯនៅកោះកុងមាន៣ មានអាតៃ, ឫស្សីជ្រុំ និងតាតៃ។ ដូច្នេះយើងត្រូវបន្តការខិតខំទៅលើរឿងនេះ»។
ចំពោះកិច្ចសហប្រតិបត្តិការសេដ្ឋកិច្ច ប្រទេសចិនជាដៃគូពាណិជ្ជកម្ម និងវិនិយោគិនដ៏ចម្បងរបស់កម្ពុជា។ទំហំពាណិជ្ជកម្មទ្វេភាគីក្នុងឆ្នាំ២០១៧ មានចំនួន ៥.៥៧៧លានដុល្លារកើនឡើងជាង ២១,៧% បើធៀបនឹងឆ្នាំ២០១៦។ ក្នុងឆ្នាំ ២០១៧ ទំហំវិនិយោគចិនសរុបនៅកម្ពុជាឈរលំដាប់លេខ ១ ធៀបនឹងទំហំវិនិយោគទុនពីប្រទេសដទៃទៀតដែលមានទំហំសរុបប្រមាណ ១.៦៤៤ លានដុល្លារ។ លើសពីនេះប្រទេសទាំងពីរក៏បានឯកភាពគ្នាជំរុញទំហំពាណិជ្ជកម្មឲ្យកើនឡើងដល់ ៦.០០០ លានដុល្លារនៅឆ្នាំ ២០២០។
ចំពោះវិស័យទេសចរណ៍មានក្រុមហ៊ុនឤកាសចរណ៍ចំនួន១៥ កំពុងធ្វើប្រតិបត្តិការហោះហើរទៀងទាត់រវាង កម្ពុជានិងចិន។នៅឆ្នាំ ២០១៧ ទេសចរចិនមានប្រមាណ ១,២ លាននាក់ ។ គិតត្រឹមត្រីមាសទី១ ឆ្នាំ២០១៨ នេះ កម្ពុជាបានទទួលភ្ញៀវទេសចរអន្តរជាតិសរុប ១,៧ លាននាក់ ដែលក្នុងនោះទេសចរចិនមានចំនួនជាង ៥០ ម៉ឺននាក់។
រាជរដ្ឋាភិបាលកម្ពុជាបានវាយតម្លៃខ្ពស់ចំពោះរដ្ឋាភិបាលចិនក្នុងការគោរពឯករាជ្យ អធិបតេយ្យ និង ការចាត់វិធានការនានារបស់រាជរដ្ឋាភិបាលកម្ពុជាដើម្បីការការពារសន្តិសុខនិងស្ថិរភាពសង្គម។ កម្ពុជាអបអរសាទរចំពោះលទ្ធផលជាវិជ្ជមាននៃកិច្ចសហប្រតិបត្តិការនិងផ្លែផ្កា ដែលទទួលបាននាពេលកន្លងមក និងប្តេជ្ញាបន្តលើកកម្ពស់វិសាលភាពនៃកិច្ចទំនាក់ទំនងកិច្ចសហប្រតិបត្តិការជាដៃគូយុទ្ធសាស្ត្រគ្រប់ជ្រុងជ្រោយកម្ពុជា-ចិនឲ្យឈានដល់កម្រិតកាន់តែខ្ពស់ថែមទៀតដើម្បីផលប្រយោជន៍នៃប្រជាជនយើងទាំងពីរ៕
Source: Kampuchea Thmey Daily
0 Comments