ភ្នំពេញ ៖ លោកចេង មុនីរ៉ា អភិបាលនៃគណៈអភិបាលខណ្ឌច្បារអំពៅរួមដំណើរដោយលោក លោកស្រីអភិបាលរងខណ្ឌបាននាំយកអំណោយរបស់អនុសាខាកាកបាទក្រហមកម្ពុជាខណ្ឌច្បារអំពៅផ្តល់ដល់បងប្អូនប្រជាពលរដ្ឋដែលកំពុងខ្វះខាតជីវភាពចំនួន៣៥គ្រួសាររស់នៅសង្កាត់ព្រែកប្រាខណ្ឌច្បារអំពៅរាជធានីភ្នំពេញ។
ពិធីប្រគល់អំណោយនេះបានប្រព្រឹត្តិធ្វើឡើងនៅរសៀលថ្ងៃទី១១ខែធ្នូ។ ក្នុងពិធីប្រគល់អំណោយលោកចេង មុនីរ៉ា បានមានប្រសាសន៍ទៅកាន់ប្រជាពលរដ្ឋទាំង៣៥គ្រួសារថា នៅពេលថ្មីៗនេះលោកបានទទួលព័តមានពីលោកចៅសង្កាត់ព្រែកប្រាថា មានប្រជាពលរដ្ឋចំនួន៣៥គ្រួសារកំពុងខ្វះខាតជីវភាពហើយភ្លាមៗនោះ លោកក៏បានរៀបចំអំណោយរបស់អនុសាខាកាកបាទកម្ពុជាខណ្ឌយកមកជូនដល់ដៃដោយពុំពន្យារពេលឡើយ។
លោកអភិបាលខណ្ឌបានបញ្ជាក់ទៀតថា អំណោយរបស់អនុសាខាកាកបាទក្រហមកម្ពុជាខណ្ឌច្បារអំពៅ ដែលយកមកផ្តល់ជូនបងប្អូនប្រជាពលរដ្ឋនាថ្ងៃនេះគឺទទួលបានពីសប្បុរសជនពិសេសពីតាមទីអារ៉ាមក្នុងមូលដ្ឋានខណ្ឌតែម្តង។ សកម្មភាពមនុស្សធម៌ដែលអាជ្ញាធរខណ្ឌច្បារអំពៅបានអនុវត្តន៍សព្វថ្ងៃនេះ គឺអាជ្ញាធរយើងខ្ញុំបានយោងតាមប្រសាសន៍ ណែនាំរបស់សម្តេចកិត្តិព្រឹទ្ធបណ្ឌិតប៊ុន រ៉ានីហ៊ុសែន ប្រធានកាកបាទក្រហមកម្ពុជាដែលសម្តេចតែងតែជំរុញដល់អាជ្ញាធរតាមបណ្តាមូលដ្ឋានត្រូវនាំយកអំណោយទៅផ្តល់ដល់ដៃប្រជាពលរដ្ឋដែលកំពុងខ្វះខាតជីវភាពខណៈដែលពេលដែលបានដឹងហើយត្រូវរួសរាន់ជួយភ្លាមៗនិងពុំប្រកាន់ពូជសាសន៍ពណ៌សម្បុរឲ្យតែរស់នៅក្នុងព្រះរាជាណាចក្រកម្ពុជាយើង។
ចំពោះអំណោយដែលផ្តល់ដល់ប្រជាពលរដ្ឋដែលខ្វះខាតជីវភាពចំនួន៣៥គ្រួសារនៅសង្កាត់ព្រែកប្រាដែលក្នុងមួយគ្រួសារៗទទួលបានអង្ករ៣០គីឡូក្រាម មី១០កញ្ចប់ ទឹកស៊ីអ៊ីវ១យួរ ទឹកត្រី១យួរ ត្រីខរ៥កំប៉ុង ស្ករស១កញ្ចប់ទឹកគោ១កំប៉ុង តែ៣កញ្ចប់មុង កន្ទេល ខ្នើយមួយសម្រាប់និងថវិកា៣០,០០០រៀល។
គួរបញ្ជាក់ថា ជារៀងរាល់សប្តាហ៍ លោកអភិបាលខណ្ឌច្បារអំពៅតែងនាំយកអំណោយផ្តល់ដល់ប្រជាពលរដ្ឋដែលកំពុងខ្វះខាតជីវភាពទាំង៨សង្កាត់មិនដែលខកខានម្តងណាឡើយ៕
Source: Kampuchea Thmey Daily
0 Comments