រូបសំណាកគោបូរៈទី៥នៃប្រាសាទព្រះវិហារ នឹងលេចចេញជារូបរាងបង្ហាញសាធារណជននៅរង្វង់មូលស្រអែម នៅមុនបុណ្យចូលឆ្នាំខ្មែរនេះ

ព្រះវិហារ ៖ រូបសំណាកគោបូរៈទី៥នៃប្រាសាទព្រះវិហារស្ថិតនៅលើទីតាំងរង្វង់មូលស្រអែម ទីប្រជុំជនឃុំស្រអែម ស្រុកជាំក្សាន្ត ខេត្តព្រះវិហារ នឹងលេចចេញជារូបរាងបង្ហាញអោយសាធារណជនបានឃើញនៅមុនបុណ្យចូលឆ្នាំខ្មែរខាងមុខនេះហើយ ។

នេះបើតាមការបញ្ជាក់អោយដឹងពីលោកសំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារ ក្នុងឱកាសដែលលោកបានអញ្ជើញចូលរួមក្នុងពិធីក្រុងពាលី បញ្ចុះបឋមសិលាសាងសង់រង្វង់មូលស្រអែមនេះ កាលពីរសៀលថ្ងៃទី១១ ខែធ្នូ ឆ្នាំ២០១៨នេះ ក្រោមអធិបតីភាពដ៏ខ្ពង់ខ្ពស់ ពីទេសរដ្ឋមន្ត្រី ទទួលបន្ទុកបេសកកម្មពិសេសនិងជា ប្រធានក្រុមការងារថ្នាក់ជាតិ ចុះជួយខេត្តព្រះវិហារលោកមាស សុភា លោក អ៊ុន ចាន់ដា អភិបាលខេត្តព្រះវិហារ លោកឧត្ដមសេនីយ៍ឯក ស្រី ឌឹក មេបញ្ជាការកងពលធំអន្តរាគមន៍ លេខ៣ លោក ឡុង សុវណ្ណ ប្រធានក្រុមប្រឹក្សាខេត្ត ព្រមទាំងមន្ត្រីរាជការជុំវិញខេត្តព្រះវិហារជាច្រើនរូបទៀត។

លោកសំ លាងទ្រី ប្រធានមន្ទីរសាធារណការ និងដឹកជញ្ជូនខេត្តព្រះវិហារបានបន្តឲ្យដឹងទៀតថារូបសំណាកប្រាសាទព្រះវិហាររង្វង់មូលស្រអែម ស្ថិតនៅទីប្រជុំជនឃុំស្រអែម លើបង្គោលភ្លើងលេខ១៦២ ស្រុកជាំក្សាន្ត ខេត្តព្រះវិហារនេះនឹងត្រូវសាងសង់ឡើង ក្រោមការជ្រោមជ្រែងយ៉ាងពេញទំហឹងពីសំណាក់ លោក ទេសរដ្ឋមន្ត្រី ទទួលបន្ទុកបេសកកម្មពិសេស មាស សុភា, លោក សួស យ៉ារ៉ា តំណាងរាស្ត្រមណ្ឌលខេត្តព្រះវិហារ, លោកឧត្ដមសេនីយ៍ឯក ស្រី ឌឹក និងលោក អ៊ុន ចាន់ដា អភិបាលខេត្ត, ព្រមទាំងសប្បុរសជននានាផងដែរ។

លោកប្រធានមន្ទីរក៏បានបញ្ជាក់បន្ថែមទៀតថា ការសាងសង់រង្វង់មូលស្រអែមនេះ នឹងត្រូវសាងសង់ឲ្យរួចរាល់នៅមុនពិធីបុណ្យចូលឆ្នាំថ្មីប្រពៃណីជាតិ ដើម្បីទទួលភ្ញៀវទេសចរដែលមកទស្សនាកំសាន្តតាមរមណីយដ្ឋាននានាក្នុងខេត្តព្រះវិហារ ជាពិសេសគឺប្រាសាទព្រះវិហារនេះតែម្តង ហើយចំពោះការសាងសង់រូបសំណាកគោបូរៈទី៥ នៃប្រាសាទព្រះវិហារនេះ គឺមន្ទីរសាធារណការ និងដឹកជញ្ជូនខេត្តព្រះវិហារ ជាអ្នកទទួលខុសត្រូវក្នុងការសាងសង់ទាំងស្រុង ក្នុងនោះត្រូវសាងសង់រង្វង់មូលដែលមានអង្កត់ផ្ចិត៤០ម៉ែត្រ រូបសំណាកគោបូរៈទី៥ នៃប្រាសាទព្រះវិហារ ខ្នាត១លើ២៥ ស្មើនឹង៧៥%នៃតួប្រាសាទព្រះវិហារដើម មានរូបនាគ២ ហើយនៅលើរង្វង់មូលនេះ ក៏នឹងមានការដាំស្មៅ ផ្កានិងដើមឈើ លម្អយ៉ាងស្រស់ស្អាតផងដែរ។ ប៉ុន្តែដើមឈើដែលត្រូវដាំនោះដាច់ខាតមិនអោយបាំងរូបសំណាកគោបូរៈទី៥ នៃប្រាសាទព្រះវិហារនេះឡើយ។

លោកសំ លាងទ្រីបានបញ្ជាក់ទៀតថា នេះ ជាសមិទ្ធផលថ្មីមួយទៀតរបស់ខេត្តព្រះវិហារ បន្ទាប់ពីផ្លូវភ្លោះ និង បុស្បុកលោកតាសួង ដែលមាន លោក អ៊ុន ចាន់ដា ជាអភិបាលខេត្តដឹកនាំក្នុងការកសាងឡើង។ ជាងនេះទៅទៀតចំពោះបណ្តាញគមនាគមន៍វិញ ត្រូវបានជួសជុលនិងស្ថាបនាឡើងស្អាត មិនមានគ្រលុកសំបុកមាន់ឡើយ ងាយស្រួលក្នុងការធ្វើដំណើរទៅមកក្នុងខេត្តព្រះវិហារ។

ក្នុងឱកាសនោះដែរ លោកសំ លាងទ្រីក៏បានសំណូមពរអោយបងប្អូនប្រជាពលរដ្ឋទាំងអស់ មេត្តាចូលរួមគោរពច្បាប់ចរាចរណ៍ទាំងអស់គ្នា ដោយកុំដឹកលើសទម្ងន់ ដឹកសំពីងសំពោង និងពេលស្រវឹងកុំបើកបរ៕