ប្រទេស​អារ៉ាប់​រួម​បើក​ស្ថានទូត​នៅ​ទីក្រុង​ដា​ម៉ាស​ឡើងវិញ​បន្ទាប់ពី​បិទ​រយៈពេល​ប្រាំពីរ​ឆ្នាំ

ប្រទេស​អារ៉ាប់​រួម​ បាន​បើក​ស្ថានទូត​របស់​ខ្លួន​ឡើងវិញ​នៅ​ទីក្រុង​ដា​ម៉ាស​កាលពី​ថ្ងៃ​ព្រហស្បតិ៍​ដែល​នេះ​ជាស​ញ្ញា​ថ្មី​បំផុត​នៃ​កិច្ចខិតខំ​ប្រឹងប្រែង​ដើម្បី​នាំយក​រដ្ឋាភិបាល​ស៊ី​រី​ឲ្យ​ត្រលប់​មកកាន់​ក្រុម​អារ៉ាប់​វិញ​។​

អារ៉ាប់​រួម​បាន​បំបែក​ទំនាក់ទំនង​ជាមួយ​ស៊ី​រី​នៅ​ខែកុម្ភៈ​ឆ្នាំ​២០១២​នៅពេល​មានការ​បង្ក្រាប​បាតុកម្ម​ទូទាំងប្រទេស​ដែល​ការទាមទារ​ឲ្យ​ផ្លាស់ប្តូរ​របប​បានប្រែក្លាយ​ទៅជា​សង្គ្រាម​ដ៏​សាហាវ​មួយ​។​

រយៈពេល​ជិត​៧​ឆ្នាំក្រោយ ទង់​អារ៉ាប់​រួម​ត្រូវ​បានលើកឡើង​ម្តងទៀត​អំឡុង​ពិធី​មួយ​ដែលមាន​ការចូលរួម​ពី​សំណាក់​អ្នកការទូត​និង​អ្នកកាសែត​។​

សេចក្តីថ្លែងការណ៍​មួយ​របស់​អារ៉ាប់​រួម​បាន​និយាយថា ភារៈធារី​ស្តីទី​បានចាប់ផ្តើម​ធ្វើការ​រួចហើយ​និង​បាន​សង្កត់ធ្ងន់ថា អារ៉ាប់​រួម​ចង់​នាំយក​ទំនាក់ទំនង​ឲ្យ​ត្រលប់​ទៅរក​ផ្លូវ​ធម្មតា​ឡើងវិញ​។​

សេចក្តីថ្លែងការណ៍​ដដែល​នេះ​បាន​និយាយទៀតថា ការបន្ត​ទំនាក់ទំនង​ឡើងវិញ​គឺមាន​គោលបំណង​គាំទ្រ​អធិបតេយ្យភាព​និង​ឯករាជ្យភាព​របស់​ប្រទេស​ស៊ី​រី​ហើយ​បាន​កើតឡើង​ស្របពេល​ប្រឈមមុខ​នឹង​គ្រោះថ្នាក់​នៃ​ការជ្រៀតជ្រែក​ក្នុង​តំបន់​។​

ពាក្យ​ចចាមអារ៉ាម​ស្តីអំពី​ការបើក​ស្ថានទូត​អារ៉ាប់​រួម​ឡើងវិញ​ត្រូវបាន​គេ​ចែករំលែក​ក្នុង​រយៈពេល​ប៉ុន្មាន​ថ្ងៃ​ថ្មីៗ​នេះ​ខណៈ​ការងារ​ជួសជុល​ត្រូវបាន​គេ​ប្រទះឃើញ​នៅនឹងកន្លែង​។​

ដំណើរ​ទស្សនកិច្ច​ទៅកាន់​ក្រុង​ដា​ម៉ាស​របស់​ប្រធានាធិបតី​ស៊ូដង់ Omar al-Bashir កាលពី​ដើមខែ​នេះ​ត្រូវបាន​អ្នកសង្កេតការណ៍​ខ្លះ​មើលឃើញថា​ជា​សញ្ញា​មួយ​នៃ​កិច្ចប្រឹងប្រែង​ក្នុង​តំបន់​ដើម្បី​បញ្ចប់​ភាព​ឯកោ​ផ្នែក​ការទូត​របស់​ប្រធានាធិបតី​ស៊ី​រី​លោក Bashar al-Assad ។​

ពីរ​បី​ម៉ោង​ក្រោយពី​ការប្រកាស​របស់​អារ៉ាប់​រួម​, ប្រទេស​បា​រ៉ែ​ន​ក៏បាន​បង្ហាញ​ពី​បំណង​របស់ខ្លួន​ក្នុង​ការបើក​ស្ថានទូត​របស់ខ្លួន​នៅ​ទីក្រុង​ដា​ម៉ាស​ឡើងវិញ​ផងដែរ​ដែល​បាន​បិទទ្វារ​ចាប់តាំងពី​ខែមីនា​ឆ្នាំ​២០១២​មក​។​

គួរ​បញ្ជាក់ថា ប្រទេស​ស៊ី​រី​ត្រូវបាន​ផ្អាក​ពី​សម្ព័ន្ធ​អារ៉ាប់​ក្នុង​ខែវិច្ឆិកា​ឆ្នាំ​២០១១​នៅពេលដែល​ចំនួន​អ្នកស្លាប់​មានការ​កើនឡើង​។​
ជម្លោះ​នេះ​បានសម្លាប់​មនុស្ស​ច្រើនជាង​៣៦០,០០០​នាក់​៕ AFP
​
​

Source: Kampuchea Thmey Daily