ឧត្តរមានជ័យ ៖ ដីព្រៃរបស់រដ្ឋ រាប់រយហិកតា ត្រូវបាន លោកផ្កាយ២ អ៊ុក គឹមលី ដាក់គ្រឿងចក្រ៤គ្រឿងធ្វើការឈូសឆាយ ប់ពីចុងខែវិច្ឆិកា រហូតមកទល់ដើមខែធ្នូនេះ ស្ថិតនៅក្នុងភូមិសាមគ្គី ឃុំត្រពាំងប្រីយ៍ ស្រុកអន្លង់វែង ខេត្តឧត្តរមានជ័យ។
ប្រជាពលរដ្ឋដែលមានទីលំនៅក្នុងឃុំត្រពាំងប្រីយ៍បានឲ្យដឹងថា នៅក្នុងឃុំនេះ នរណាៗក៏បានឮល្បីថា លោកផ្កាយ២រូបនេះ មានដីជាច្រើនកន្លែង សូម្បីដីដែលប្រជាពលរដ្ឋរស់នៅសព្វថ្ងៃតាមដងផ្លូវយុទ្ធសាស្ត្ររបស់ សម្ដេចតេជោ ហ៊ុន សែន ស្ថិតនៅក្នុងភូមិថ្គាមរមាសនេះ លោកផ្កាយ២ បានប្ដឹងចោទប្រកាន់ពួកគាត់ថា រស់នៅលើដីរបស់លោកដែរ។ ជាក់ស្ដែងនាពេលថ្មីៗនេះ លោកផ្កាយ២ អ៊ុក គឹមលី បានយកគ្រឿងចក្រ៤គ្រឿង ធ្វើការឈូសឆាយដីព្រៃរបស់រដ្ឋ ចាប់ពីចុងខែវិច្ឆិកា ទល់ខែធ្នូ ឆ្នាំ២០១៨នេះ។
ទាក់ទិនទៅនឹងការចោទប្រកាន់នេះ លោកផ្កាយ២ នាយរងការិយាល័យទំនាក់ទំនងព្រំដែនកម្ពុជា-ថៃ-វៀតណាម-ឡាវ បានឲ្យដឹងតាមទូរស័ព្ទថា ដីដែលធ្វើការឈូសឆាយនេះ មានជាង២០០ហិកតា គឺលោកបានប្រមូលទិញពីម្ចាស់ដី ហើយលោកបានធ្វើសិទ្ធិកាន់កាប់ប្រើប្រាស់ដីនេះ ដោយស្របច្បាប់ដែលមានរយៈពេលជាង១០ឆ្នាំ មកហើយ មិនមែនជាដីគម្របព្រៃរដ្ឋទេ បន្ទាប់មកលោកបានដាក់គ្រឿងចក្រធ្វើការឈូសឆាយដីឲ្យបានស្អាតដាំដំណាំផ្សេងៗ។
លោក ស៊ូ ណាត មេឃុំត្រពាំងប្រីយ៍ នៅព្រឹកថ្ងៃទី១១ធ្នូ បានប្រាប់អ្នកយកព័ត៌មានតាមទូរស័ព្ទ ថា ដីនោះ ជាដីរបស់ លោក អ៊ុក គឹមលី មែន តែមានសិទ្ធិប្រើប្រាស់ដីត្រឹមតែអាជ្ញាធរមូលដ្ឋានទេ។
លោកបានបញ្ជាក់ថា ក្នុងការដាក់គ្រឿងចក្រឈូសឆាយ គួរតែធ្វើសំណើដាក់ឲ្យមន្ត្រីដែលពាក់ព័ន្ធ រួមទាំងអាជ្ញាធរបានដឹងឮទទួលស្គាល់ផង៕
Source: Kampuchea Thmey Daily
0 Comments