ភ្នំពេញ ៖ កម្លាំងប៉េអឹមខណ្ឌដូនពេញ សហការជាមួយការិយាល័យប្រឆាំងគ្រឿងញៀន កម្លាំងអាវុធហត្ថរាជធានី បានចុះបង្ក្រាប និងឃាត់ខ្លួនជនសង្ស័យពាក់ព័ន្ធគ្រឿងញៀនបានចំនួន០៨នាក់ កាលពីវេលាម៉ោង១៥និង៣០នាទី ថ្ងៃពុធ៥កើត ខែមិគសិរ ឆ្នាំច សំរឹទ្ធិស័ក ពស២៥៦២ ត្រូវនឹងថ្ងៃទី១២ ខែធ្នូ ឆ្នាំ២០១៨ ចំណុចផ្ទះលេខ៣៦ និង៣៧ ផ្លូវបេតុង ក្រុម៣៩ ភូមិ៣ សង្កាត់ស្រះចក ខណ្ឌដូនពេញ រាជធានីភ្នំពេញ ព្រមទាំងដកហូតថ្នាំញៀនជាច្រើនកញ្ចប់ផង។
នៅក្នុងប្រតិបត្តិការនេះ កម្លាំងបានឃាត់ខ្លួនជនសង្ស័យចំនួន០៨នាក់ ទី១-សារី សារ៉ាយ ភេទប្រុស អាយុ២២ឆ្នាំ មុខរបរកម្មកររោងចក្រ ស្នាក់នៅជួល នៅម្តុំផ្សារទួលពង្រ។ ទី២-បូ សារី ភេទប្រុស អាយុ១៧ឆ្នាំ មុខរបរ ដឹកចំណីគោ ស្នាក់នៅផ្ទះលេខ៩៤ ផ្លូវ៦A សង្កាត់ជ្រោយចង្វា ខណ្ឌជ្រោយចង្វា។ ទី៣-ពៅ សុវត្ថិ ភេទប្រុស អាយុ៣៣ឆ្នាំ មុខរបរកម្មកររោងចក្រ ស្នាក់នៅផ្ទះជួល ផ្លូវបេតុង សង្កាត់ស្ទឹងមានជ័យ៣ ខណ្ឌមានជ័យ។ ទី៤-ប្រាក់ ចំរើន ភេទប្រុស អាយុ១៦ឆ្នាំ មុខរបរ រើសអេតចាយ ស្នាក់នៅផ្ទះលេខ៣៧ សង្កាត់បឹងកក់២ ខណ្ឌទួលគោក។ ទី៥-ស៊ិន សាយ័ន្ត ភេទប្រុស អាយុ៣៨ឆ្នាំ មុខរបរជាងជួសជុលរថយន្ត ស្នាក់នៅផ្ទះលេខ២៨ ផ្លូវ៦០៨ សង្កាត់បឹងកក់២ ខណ្ឌទួលគោក។ ទី៦-វ៉ន ញឿន ភេទប្រុស អាយុ៤៣ឆ្នាំ មុខរបរជាងសំណង់ ស្នាក់នៅការដ្ឋានបឹងកក់ ។ ទី៧-ធី វណ្ណា ភេទប្រុស អាយុ២៥ឆ្នាំ មុខរបរសន្តិសុខឯកជន ស្នាក់នៅ(ជ្រោយចង្វារ) និងទី៨-ចាន់ ផល្លិត ភេទប្រុស អាយុ៣៤ឆ្នាំ មុខរបរកម្មកររោងចក្រ ស្នាក់នៅផ្ទះជួល ភូមិឫស្សី សង្កាត់មានជ័យ២ ខណ្ឌមានជ័យ រាជធានីភ្នំពេញ។
ចំណែកវត្ថុតាងដកហូតរួមមាន ទី១-ម្សៅក្រាមថ្លា ពណ៌សចំនួន៥៦កញ្ចប់តូច, ទី២-ជញ្ជីងសម្រាប់ថ្លឹងចំនួន០២, ទី៣-ដបសម្រាប់ជក់ចំនួន០១ , កែវសម្រាប់ជក់០១ ,ប្រដាប់សម្រាប់សេពគ្រឿង ញៀនមួយចំនួន ,ទី៤-ដាវចំនួន០៧ ,កាំបិតតាំងតោចំនួន០១ ,និងម៉ូតូចំនួន០២គ្រឿង ដែល១-ម៉ូតូម៉ាកC125 ពណ៌ខ្មៅ ស៊េរី២០១៦ ស្លាកលេខ1D-3708 ត្បូងឃ្មុំ ចំនួន០១គ្រឿង និងមួយគ្រឿងទៀតម៉ាកSmash Revo ពណ៌ខ្មៅ ស៊េរី២០០៨ ស្លាកលេខ 1U-1345 ភ្នំពេញ។
បច្ចុប្បន្ន ជនសង្ស័យទាំង០៨នាក់ខាងលើ រួមនឹងវត្ថុតាងពាក់ព័ន្ធគ្រឿងញៀន ត្រូវបានបញ្ជូនទៅការិយាល័យប្រឆាំងគ្រឿងញៀនអាវុធហត្ថរាជធានីភ្នំពេញ ដើម្បីចាត់ការតាមនីតិវិធីច្បាប់៕
Source: Kampuchea Thmey Daily
0 Comments