បន្ទាយមានជ័យ ៖ ព្រឹកថ្ងៃទី១១ ខែធ្នូ ឆ្នាំ២០១៨នេះ លោកលី សារី អភិបាលរងខេត្ត និងជាប្រធានគណៈកម្មាធិការសាខាកាកបាទក្រហមខេត្តបន្ទាយមានជ័យតំណាងឲ្យលោកសួន បវរអភិបាលខេត្ត និង ក្រុមការងារសាខាកាកបាទក្រហមកម្ពុជា ខេត្តបន្ទាយមានជ័យជាច្រើននាក់ បាននាំយកកញ្ចប់ទ្រទ្រង់សុខភាពពីសាខាកាកបាទក្រហមកម្ពុជាខេត្តទៅចែកជូនស្ត្រីជាអ្នកទោសដែលមានកូនតាមម្តាយនិងមានផ្ទៃពោះចំនួន១៣នាក់ នៅក្នុងពន្ធនាគារខេត្តបន្ទាយមានជ័យ ស្ថិតក្នុងភូមិគាប សង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។
លោកអ៊ុង ស៊ីផាន ឧត្តមអត្ថានុរក្សថ្នាក់លេខ២ និង ជាប្រធានពន្ធនាគារខេត្តបន្ទាយមានជ័យបានប្រាប់អ្នកយកព័ត៌មានឲ្យដឹងថា ស្ត្រីជាអ្នកជាប់ពន្ធនាគារដែលត្រូវទទួលកញ្ចប់ទ្រទ្រង់សុខភាពមានចំនួន១៣នាក់ ក្នុងនោះមានស្ត្រីមានផ្ទៃពោះចំនួនម្នាក់ និង ស្ត្រីដែលមានកូនតាមម្តាយមានចំនួន១២នាក់ហើយជាក់ស្តែងជនជាប់ឃុំមានចំនួនសរុប១.៥៥៣ នាក់ ស្រី១១៩នាក់ ជនត្រូវចោទមានចំនួន ២២៧នាក់ ស្រី១៧នាក់ ជនជាប់ចោទមានចំនួន២៩៧នាក់ស្រី១០នាក់ ពិរុទ្ធជនមានចំនួន៥៨២នាក់ស្រី៥៧នាក់ ទណ្ឌិត មានចំនួន៤៤៧នាក់ ស្រី៣៥នាក់ អនីតិជនមានចំនួន១៣០នាក់ ស្រី៤នាក់ ជនបរទេសមានចំនួន២៨នាក់ ស្រី៤នាក់ កុមារតាមម្តាយមានចំនួន១៣នាក់ ស្ត្រីមានផ្ទៃពោះមានចំនួន១នាក់។ ក្នុងអ្នកជាប់ឃុំនោះច្រើនជាងគេគឺបទល្មើសគ្រឿងញៀនមានចំនួន៩២៩នាក់ ស្រី៩៧នាក់ជនជាប់ឃុំចូលថ្មីគិតពីថ្ងៃទី១មករា ដល់ថ្ងៃទី២០តុលាមានចំនួន២.០១៨នាក់។
លោកអ៊ុង ស៊ីផាន បានបញ្ជាក់ឲ្យដឹងទៀតថា ជនជាប់ឃុំទាំងអស់ត្រូវបានប្រធានពន្ធនាគារយកចិត្តទុកដាក់បណ្តុះបណ្តាលវិជ្ជាជីវៈជូនដល់គាត់មានដូចជា រៀនកាត់ដេរ រៀនជួសជុលគ្រឿងអេឡិតត្រួនិច រៀនជួសជុលម៉ួតូ រៀនភ្លេងសម័យ រៀនកាត់សក់ រៀនអក្សរខ្មែរថ្នាក់ទី១រហូតដល់ថ្នាក់ទី៨។ ក្នុងនោះជនជាប់ឃុំត្រូវបានបន្ធូរបន្ថយទោសលើកលែងទោសក្នុង១ឆ្នាំ មានចំនួន៣លើកផងដែរ។
លោកលី សារី បានប្រាប់អ្នកយកព័ត៌មានឲ្យដឹងថា ជាការយកចិត្តទុកដាក់ពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជាហើយសាខាកាកបាទក្រហមកម្ពុជាខេត្តបន្ទាយមានជ័យបានដឹកនាំសមាជិកនាំយកកញ្ចប់ទ្រទ្រង់សុខភាពចែកជូនស្ត្រីជាជនជាប់ឃុំមានចំនួន១៣នាក់មានស្ត្រីមានកូនតាមម្តាយចំនួន១២នាក់និងស្ត្រីមានផ្ទៃពោះម្នាក់។ ក្នុងម្នាក់ទទួលបានកន្សែងពោះគោធំ១ ទឹកដោះគោឆៅ១ឡូ ទឹកសុទ្ធ១កេស ទឹកដោះគោខាប់២កំប៉ុង អូរវ៉ាន់ទីន២០កញ្ចប់ សាប៊ូកក់សក់១ដប សាប៊ូកក់ខ្លួន២ដុំ ម្ស៉ៅលាបខ្លួន១ដប នំធុង១ធុង ក្រដាសសើម២ដុំ ថវិកា២ម៉ឺនរៀល សារ៉ុង១។លោក លី សារី បានមានប្រសាសន៍ផ្តាំផ្ញើដល់ស្ត្រីជាជនជប់ឃុំទាំង១៣នាក់ត្រូវចេះថែរក្សាកូនដែលតាមម្តាយជាប់ពន្ធនាគារព្រោះកូនមិនបានដឹងអ្វីទាល់តែសោះនៅពេលម្តាយមានទោសនៅក្នុងពន្ធនាគារជាមួយម្តាយ។ ត្រូវចេះកែខ្លួនឲ្យបានល្អបញ្ឈប់រាល់អំពើល្មើសច្បាប់ពេលបញ្ចប់ទោសចេញត្រូវកែខ្លួនឲ្យក្លាយជាមនុស្សល្អក្នុងសង្គម៕
Source: Kampuchea Thmey Daily
0 Comments