បន្ទាយមានជ័យ ៖ បុរសជាប្តី ត្រូវនាងជាប្រពន្ធចាក់២កាំបិតចិតបន្លែចំក្បាល និងក បណ្តាលឲ្យរងរបួសធ្ងន់ គ្រាន់តែរឿងហាមប្រពន្ធមិនឲ្យស្លៀកពាក់ខើចខ្លីពេក នៅព្រឹកថ្ងៃទី២៩ ខែធ្នូ ឆ្នាំ២០១៨ ក្នុងភូមិព្រៃគប់ សង្កាត់ផ្សារកណ្តាល ក្រុងបោយប៉ែត ខេត្តបន្ទាយមានជ័យ។
សមត្ថកិច្ច បានប្រាប់អ្នកយកព័ត៌មានឲ្យដឹងថា ជនរងគ្រោះឈ្មោះ ផាត់ អឿម អាយុ២៣ឆ្នាំ ចំណែកជនដៃដល់ជាប្រពន្ធឈ្មោះ ភាព ពៅ អាយុ២១ឆ្នាំ រស់នៅភូមិទំនប់ក៥ សង្កាត់ និងក្រុងប៉ោយប៉ែត ខេត្តបន្ទាយមានជ័យ។
សមត្ថកិច្ច បានបញ្ជាក់ឲ្យដឹងទៀតថា នៅមុនកើតហេតុគ្រួសារមួយនេះ បានផ្ទុះជម្លោះនឹងគ្នា គឺបុរសជាប្តីហាមមិនឲ្យប្រពន្ធស្លៀកពាក់ខើច ឬខ្លីពេក ខ្លាចអ្នកស្រុកពេបជ្រាយ តែនាងជាប្រពន្ធខឹងក៏ផ្ទុះជាជម្លោះឡើង ឈានដល់ចាក់ប្តី២កាំបិតឲ្យរបួសធ្ងន់តែម្តង។
ស្ត្រីជាម្តាយជនរងគ្រោះដែលដឹកបញ្ជូនកូនចូលមន្ទីរពេទ្យប្រាប់អ្នកយកព័ត៌មានថា ករណីហិង្សាក្នុងគ្រួសារ កូនគាត់កើតមានញឹកញយ ហើយកាលលើកមុន នាងជាប្រពន្ធក៏ធ្លាប់កាប់ប្តីឲ្យរបួសម្តងដែរ។ យ៉ាងណាក៏ដោយក្រោយកើតហេតុគេឃើញសមត្ថកិច្ចទាំងនគរបាល និងអាវុធហត្ថបានចុះទៅចំណុចនោះភ្លាម ដើម្បីសួរនាំរកមូលហេតុ។
សមត្ថកិច្ចបានបញ្ជាក់ឲ្យដឹងថា ករណីខាងលើជាអំពើហិង្សាក្នុងគ្រួសារ ប៉ុន្តែមិនបានប្រាប់លម្អិតពីដំណើររឿងទាំងស្រុងនោះទេ ហើយថាស្ត្រីដៃដល់ពេលនេះ កំពុងសាកសួរនៅឡើយ។ គេគិតថា បើគ្មានភ្លើងក៏គ្មានផ្សែងដែរ អាចបុរសជាប្តីកើតរោគប្រចណ្ឌ ឬរករឿងប្រពន្ធទើបកើតមានអំពើហិង្សាឡើង ក៏មានដែរ៕
Source: Kampuchea Thmey Daily
0 Comments