ភ្នំពេញ ៖ មន្ត្រីជាន់ខ្ពស់នៃក្រសួងសុខាភិបាលបានក្រើនរំលឹកដល់ប្រជាពលរដ្ឋនៅទូទាំងប្រទេសឲ្យមានការប្រុងប្រយ័ត្នខ្ពស់ចំពោះបញ្ហាសុខភាព ខណៈអាកាសធាតុចុះត្រជាក់ខ្លាំង នឹងឈានចូលមកដល់នៅថ្ងៃទី៣០ ខែធ្នូខាងមុខដ៏ខ្លីនេះហើយ។
លោកវេជ្ជបណ្ឌិត លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លងនៃក្រសួងសុខាភិបាល បានជំរុញឲ្យប្រជាពលរដ្ឋពិសេសកុមារនិងមនុស្សវ័យចំណាស់ត្រូវថែរក្សាសុខភាពឲ្យបានល្អដើម្បីជៀសវាងការឆ្លងជំងឺផ្សេងៗដូចជាជំងឺផ្តាសាយ រលាកបំពង់ក ក្រពះ ពោះវៀននិងជំងឺរលាកសួតដែលបណ្តាលមកពីអាកាសធាតុចុះត្រជាក់ខ្លាំង។
លោកវេជ្ជបណ្ឌិតបានថ្លែងកាលពីព្រឹកថ្ងៃទី២៧ ខែធ្នូ ឆ្នាំ២០១៨ឲ្យដឹងថា ជំងឺផ្ដាសាយនេះ ធ្វើឲ្យអ្នកជំងឺអាការៈក្អក កណ្ដាស់ ហៀរសំបោរនិងក្តៅខ្លួន។ ចំណែកជំងឺរលាកសួតវិញកើតឡើងបណ្តាលមកពីអ្នកជំងឺផ្តាសាយទុកយូរមិនបានព្យាបាល ហើយជំងឺនេះប្រសិនបើមិនបានស្វែងរកការព្យាបាលឲ្យបានទាន់ពេលទេអាចបណ្តាលឲ្យស្លាប់បានដោយសារការមានអាការៈហត់ដង្ហក់ និងថប់ដង្ហើម។
លោកវេជ្ជបណ្ឌិត បានធ្វើការណែនាំដល់ប្រជាពលរដ្ឋត្រូវស្លៀកពាក់សំលៀកបំពាក់ក្រាស់ៗការពារធាតុត្រជាក់ ពាក់ម៉ាស់ការពារមិនឲ្យធូលីហ៊ុយកាត់បន្ថយការចម្លងវីរុសពីមនុស្សម្នាក់ទៅមនុស្សម្នាក់ទៀត និងត្រូវឧស្សាហ៍លាងសំអាតដៃនឹងសាប៊ូឲ្យបានញឹកញាប់ដើម្បីការពារការចម្លងរោគផ្សេងៗ និងកុំចោលសំរាម ខាកស្តោះទឹកមាត់ឬកំហាកពាសវាលពាសកាលដើម្បីការពារកុំឲ្យមេរោគចម្លងដល់អ្នកផ្សេងទៀតបាន។
ទន្ទឹមនឹងនេះ លោកវេជ្ជបណ្ឌិតបានជំរុញឲ្យប្រជាពលរដ្ឋត្រូវមានការប្រុងប្រយ័ត្នផងដែរចំពោះបញ្ហាពុលចំណីអាហារព្រោះការពុលចំណីអាហារនេះអាចកើតឡើងគ្រប់រដូវកាលមិនថារដូវក្តៅឬត្រជាក់នោះទេ។ ដូចនេះសូមប្រជាពលរដ្ឋត្រូវប្រើប្រាស់ទឹកស្អាតឬទឹកដាំពុះក្តៅអ៊ុនៗ ហាមប្រើថ្នាំប្រភេទអង់ទីប៊ីយោទិក ដោយគ្មានវេជ្ជបញ្ជា ត្រូវបរិ ភោគអាហារដែលមានពណ៌បៃតងនិងលាងសំអាតត្រីសាច់ និងបន្លែឲ្យបានស្អាតនិងមានអនាម័យ។
លោកវេជ្ជបណ្ឌិតបានណែនាំឲ្យប្រជាពលរដ្ឋនៅពេល ដែលមានបញ្ហាសុខភាពត្រូវប្រញាប់ទៅកាន់មណ្ឌលសុខភាពឬមន្ទីរពេទ្យដែលនៅជិតផ្ទះដើម្បីឲ្យគ្រូពេទ្យពិនិត្យនិងព្យាបាលឲ្យបានទាន់ពេលវេលាហើយគ្រូពេទ្យនៅតាមមន្ទីរពេទ្យឬមណ្ឌលសុខភាពត្រូវបង្កើនការយកចិត្តទុកដាក់ព្យាបាលជំងឺដល់ប្រជាពលរដ្ឋផងដែរពិសេសទារក កុមារនិងមនុស្សវ័យចំណាស់។
លោក ចាន់ យុត្ថា អ្នកនាំពាក្យក្រសួងធនធានទឹកនិងឧតុនិយមបានឲ្យដឹងកាលព្រឹកថ្ងៃទី២៦ធ្នូឆ្នាំ២០១៨ឲ្យដឹងដែរថា ប្រទេសកម្ពុជា នឹងចាប់ផ្ដើមចុះត្រជាក់ពីថ្ងៃទី៣០និង៣១ខែធ្នូ ឆ្នាំ២០១៨នេះរហូតដល់ដើមខែមករាឆ្នាំ២០១៩ និងចុះត្រជាក់ខ្លាំងនៅចុងខែមករា ឬនៅដើមខែកុម្ភៈ ឆ្នាំ២០១៩ខាងមុខជាពិសេសនៅតាមតំបន់ភ្នំដែលមានសីតុណ្ហភាពគិតជាមធ្យមពី១៥ទៅ១៧អង្សាសេនិងពី១៩ទៅ២០អង្សាសេនៅតំបន់ខ្ពង់រាបកណ្តាល។
លោកបានបន្តថា បញ្ហាអាកាសធាតុចុះត្រជាក់នេះក្រសួងធនធានទឹកនិងឧតុនិយមបានធ្វើការផ្សព្វផ្សាយរួចហើយដើម្បីឲ្យប្រជាពលរដ្ឋមានការប្រុងប្រយ័ត្នពិសេសប្រជាពលរដ្ឋរស់នៅតាមតំបន់ភ្នំដែលមានការចុះត្រជាក់ខ្លាំង។
លោកវេជ្ជបណ្ឌិត លី សូវ៉ាន់បានអំពាវនាវដល់មន្ត្រីសុខាភិបាលដែលទទួលខុសត្រូវនៅតាមម ណ្ឌលសុខភាពក្នុងករណីឃើញមានជំងឺដែលខុសពីប្រក្រតីត្រូវរាយការណ៍បន្ទាន់មកក្រសួងសុខាភិបាលឬតាមរយៈទូរស័ព្ទទាន់ហេតុការណ៍១១៥ដើម្បីក្រសួងមានវិធានការឲ្យបានទាន់ពេលវេលា៕
Source: Kampuchea Thmey Daily
0 Comments