ភ្នំពេញ ៖ នាយឧត្ដមសេនីយ៍ កង សុខន អគ្គនាយក នៃអគ្គនាយកដ្ឋានអត្តសញ្ញាណកម្ម បានជំរុញឲ្យមន្ត្រីរបស់ខ្លួនផ្ដល់សេវាសាធារណៈប្រកបដោយភាពស្អាតស្អំ ដើម្បីធានាឲ្យបាននូវប្រសិទ្ធភាព ផលិតភាព គណនេយ្យភាព និងតម្លាភាព ជូនប្រជាពលរដ្ឋ។
ថ្លែងនៅក្នុងពិធីបិទបញ្ចប់ វគ្គបណ្ដុះបណ្ដាលស្ដីពីយេនឌ័រ និងគណនេយ្យភាពសង្គម កាលពីរសៀល ថ្ងៃទី២៦ ខែធ្នូ ឆ្នាំ២០១៨ នាយឧត្ដមសេនីយ៍ កង សុខន បានឲ្យដឹងថា ដើម្បីផ្ដល់សេវាសាធារណៈផ្សេងៗជួនដល់ប្រជាពលរដ្ឋប្រកបដោយប្រសិទ្ធភាពនោះ ចាំបាច់តម្រូវឲ្យមន្ត្រីសិក្ខាកាម នៃអគ្គនាយកដ្ឋានអត្តសញ្ញាណកម្មទាំងអស់ ត្រូវពង្រឹងបន្ថែមលើយន្តការតាមដាន និងការវាយតម្លៃការងាររបស់ខ្លួន ក្នុងការផ្ដល់សេវាអត្រានុកូលដ្ឋាន ការផ្ដល់អត្តសញ្ញាណប័ណ្ណសញ្ជាតិខ្មែរ ការផ្ដល់លិខិតឆ្លងដែន ការផ្ដល់សៀវភៅគ្រួសារនិងសៀវភៅស្នាក់នៅ ប្រកបដោយប្រសិទ្ធភាពខ្ពស់ ដើម្បីបង្ការនិងទប់ស្កាត់អំពើអសកម្ម ដែលអាចកើតមានឡើងចំពោះប្រជាពលរដ្ឋ ក្នុងការធានារូបភាព និងភាពជឿរជាក់លើសេវាសាធារណៈ តាមរយៈការកសាងប្រព័ន្ធស្ថាប័នរដ្ឋ ប្រកបដោយចីរភាព។
នាយឧត្ដមសេនីយ៍ កង សុខន បានឲ្យដឹងបន្តទៀតថា ក្នុងអាណត្តិទី៦នេះ រាជរដ្ឋាភិបាល បានដាក់ចេញយុទ្ធសាស្ត្រចំនួន៤ លើការងារអនុវត្តរបស់មន្ត្រីអគ្គនាយកដ្ឋានអត្តសញ្ញាណកម្ម ក្នុងនោះរួមមាន ការកែទម្រង់ និងលើកម្ពស់ស្ថាប័ន ការពង្រឹងភាពស្អាតស្អំក្នុងរដ្ឋបាលសាធារណៈ ការពង្រឹងប្រសិទ្ធភាព នៃការអនុវត្តការងារ ការពង្រឹងអភិបាលកិច្ចលើវិស័យឯកជន ដើម្បីលើកម្ពស់គុណភាពសេវាសាធារណៈ ដល់ប្រជាពលរដ្ឋប្រកបដោយស្មារតីទទួលខុសត្រូវខ្ពស់។
ជាមួយគ្នា លោកស្រី ឧត្ដមសេនីយ៍ឯក ឌុច ដាណា អគ្គនាយករង និងជាប្រធានក្រុមការងារយេនឌ័រអគ្គនាយកដ្ឋានអត្តសញ្ញាណកម្ម បានបញ្ជាក់ថា វគ្គបណ្ដុះបណ្ដាលស្ដីពីយេនឌ័រ និងគណនេយ្យភាពសង្គមនេះ គឺដើម្បីលើកកំពស់គុណភាពសេវាសាធារណៈ ដល់ប្រពលរដ្ឋប្រកបដោយស្មារតីទទួលខុសត្រូវ ពង្រឹងសមត្ថភាពក្នុងការផ្ដល់សេវាសាធារណៈជូនប្រជាពលរដ្ឋ និងតម្កល់ផលប្រយោជន៍រួមជូនជនប្រជាពលរដ្ឋ។
គួរបញ្ជាក់ថា សិក្ខាកាម នៃអគ្គនាយកដ្ឋានអត្តសញ្ញាណកម្ម ដែលបានចូលរួមវគ្គបណ្ដុះបណ្ដាលស្ដីពីយេនឌ័រ និងគណនេយ្យភាពសង្គម មានចំនួន១៥០នាក់ ដោយបានសិក្សាលើ៨ជំនាញ ក្នុងនោះរួមមានគោលនយោបាយយុទ្ធសាស្ត្រចតុកោណ និងបរិយាកាណ៍អភិបាលកិច្ចល្អ ទស្សនាទាន និងគោលការណ៍អភិបាលកិច្ចល្អ ភាពជាអ្នកដឹកនាំ ស្តង់ដារសេវាសាធារណៈ បទពិសោធន៍ ស្ដីពីតែមួយ ការអនុវត្តអភិបាលកិច្ចល្អនៅក្នុងការិយាល័យច្រកចេញចូលតែមួយ សុរិចភាព និងអភិបាលកិច្ចល្អ និង គោលនយោបាយយេនឌ័រ និងផែនការបញ្ជ្រាបយេនឌ័រក្នុងការផ្ដល់សេវាសាធារណៈ៕
Source: Kampuchea Thmey Daily
0 Comments