បាត់ដំបង ៖ ជនជាតិខ្មែរម្នាក់ ក្នុងចំណោមបក្ខពួកចំនួន៣នាក់ បានរងរបួសត្រង់កំភួនជើងស្តាំ ដោយបច្ចុប្បន្នកំពុងសម្រាកព្យាបាលនៅក្នុងមន្ទីរពេទ្យផងដែរ បន្ទាប់ពីពួកគេទាំង៣នាក់ បានលបចូលទៅកាប់ឈើ និងលួចអារឈើ នៅលើទឹកដីថៃទាំងកណ្តាលអធ្រាត្ររួចមក។
យោងតាមប្រភពដែលយើងទទួលបានគឺហេតុការណ៍ នៃការបាញ់បោះរបស់ភាគីថៃ ដែលមិនគោរពតាមកិច្ចព្រមព្រៀង MOU បានកើតឡើងកាលពីថ្ងៃទី២៣ ខែធ្នូ ឆ្នាំ២០១៨ វេលាម៉ោង១១និង ៣០នាទី ត្រង់ចំណុចខាងក្រោមច្រកចរិយា ( ច្រកសុខសាន្ត ) លើទឹកដីថៃ ទល់នឹងចំណុច ក្រៈឌូកឆាង ក្នុងភូមិសាស្ត្រខេត្តត្រាត។
ប្រភពបានបន្តថា នៅពេលនោះដែរ គឺមានជនជាតិខ្មែរចំនួន៣នាក់ បានលបចូលទៅកាប់ឈើ និងអារឈើនៅក្នុងតំបន់ខាងលើ ស្រាប់តែមានកម្លាំងសមត្ថកិច្ចថៃមកដល់ ហើយបានធ្វើការបាញ់រះមកលើជនជាតិខ្មែរទាំងនោះចំនួន៥គ្រាប់ បណ្តាលឲ្យត្រូវចំកំភួនជើងខាងស្តាំម្នាក់ ឯ២នាក់ទៀតបានរត់រួច និងគេចខ្លួនចូលមកទឹកដីកម្ពុជាវិញ ចំណែកម្នាក់ដែលរងរបួស ក៏ខំប្រឹងធ្វើដំណើរឆ្លងដែនមកវិញបានដែរ ដោយភាគីថៃមិនបានចាប់ខ្លួននោះទេ។ ជនរងគ្រោះនោះមានឈ្មោះ ខាន់ សំណាង ភេទប្រុស អាយុ៣៥ឆ្នាំ រស់នៅភូមិភ្នំរៃ ឃុំតាតោក ស្រុកសំឡូត ខេត្តបាត់ដំបង។
ជុំវិញបញ្ហានេះដែរ លោកឧត្ដមសេនីយ៍ទោ ពេជ្រ វណ្ណា នាយករងទីចាត់ការការងារព្រំដែន អគ្គបញ្ជាការ និងជាប្រធានការិយាល័យ ទំនាក់ទំនងព្រំដែនកម្ពុជា-ថៃ បានមានប្រសាសន៍ថា រឿងនេះនៅមិនទាន់មានអ្នកណារាយការណ៍ទៅលោកទេ ហើយការបាញ់បោះដែលមិនគោរពតាមកិច្ចព្រមព្រៀង MOU របស់ភាគីថៃនេះ គឺពីមុនមានច្រើនតាមច្រកមួយចំនួន ប៉ុន្តែពេលនេះទៅខាងឧត្តរមានជ័យ គឺគេគ្រាន់តែចាប់ខ្លួនហើយអនុវត្តតាមផ្លូវច្បាប់តែប៉ុណ្ណោះ ដោយឡែកនៅតាមខ្សែបន្ទាត់ព្រំដែន ច័ន្ទបុរី និងត្រាត គឺការបាញ់បោះនៅមាននៅឡើយ ដោយគេចោទប្រកាន់ថា ភាគីម្ខាងមានការតដៃ ឬរត់គេចខ្លួន ..។ល។
ដូច្នេះ លោក នឹងសួរទៅប៉ុស្តិ៍ជួរមុខសិនថា តើរឿងនេះវាយ៉ាងណាទៅហើយ៕
Source: Kampuchea Thmey Daily
0 Comments