ភ្នំពេញ ៖ រាជរដ្ឋាភិបាល គ្រោងនឹងនឹងអនុវត្តគោលនយោបាយថ្មីមួយទៀត ដោយជួយចេញថ្លៃសេវាពិនិត្យផ្ទៃពោះ និងសម្រាលកូនដល់ស្ត្រីមានផ្ទៃពោះដែលមានប័ណ្ណក្រីក្រនាពេលខាងមុខនេះដើម្បីជួយលើកស្ទួយជីវភាពរស់នៅឲ្យកាន់តែប្រសើរឡើងថែមទៀត។
លោកសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលមានប្រសាសន៍ថា ចាប់ពីពាក់កណ្ដាលឆ្នាំ២០១៩ខាងមុខនេះតទៅ ប្រជាពលរដ្ឋជាស្ត្រីក្រីក្រមានផ្ទៃពោះ ដែលមានប័ណ្ណសម្គាល់ក្រីក្រចេញដោយអាជ្ញាធរមូលដ្ឋាន និងក្រសួងផែនការ នឹងត្រូវទទួលបានការពិនិត្យផ្ទៃពោះ និងការសម្រាលកូនដោយឥតគិតថ្លៃ ព្រមទាំងទទួលបានការឧបត្ថម្ភពីរាជរដ្ឋាភិបាលទៀតផង។
លោកសាស្ត្រាចារ្យ ម៉ម ប៊ុនហេងបានបន្តថា ការជួយបង់ថ្លៃសេវាជំនួសរបស់រាជរដ្ឋាភិបាលនេះ គឺដើម្បីចូលរួមចំណែកកាត់បន្ថយការចំណាយរបស់ស្ត្រីមានផ្ទៃពោះក្រីក្រ ក៏ដូចជាលើកកម្ពស់ដល់សុខភាពរបស់ទារកឲ្យកាន់តែប្រសើរឡើងផងដែរ។
ជាមួយគ្នានេះដែរ លោកសាស្ត្រាចារ្យ ម៉ម ប៊ុនហេង បានបន្ថែមទៀតថា ស្ត្រីក្រីក្រមានផ្ទៃពោះដែលមានប័ណ្ណក្រីក្រត្រូវបានទទួលប្រាក់ឧបត្ថម្ភនៅពេលដែលបានទទួលសេវាពិនិត្យផ្ទៃពោះមុនសម្រាលចំនួន៤ដង ដោយក្នុងមួយដងៗ ទទួលបានការឧបត្ថម្ភពីរាជរដ្ឋាភិបាលតាមរយៈមូលនិធិសមធម៌ ចំនួន៤ម៉ឺនរៀល និងនៅពេលសម្រាល ទទួលបានការឧបត្ថម្ភចំនួន២០ម៉ឺនរៀល។
លើសពីនេះទៅទៀតក្រោយពេលសម្រាលកូនហើយ ស្ត្រីក្រីក្រត្រូវបានមូលនិធិសមធម៌ជួយឧបត្ថម្ភលើការពិនិត្យថែទាំសុខភាពទាំងម្តាយ និងកូនចំនួន១០ដង ដោយក្នុង១ដងៗចំនួន៤ម៉ឺនរៀល ដែលសរុបទាំងអស់ស្ត្រីក្រីក្រទទួលបានការឧបត្ថម្ភទាំងមុនសម្រាល នៅពេលសម្រាល និងក្រោយការសម្រាលកូន មានចំនួនទឹកប្រាក់៧៦ម៉ឺនរៀលប្រហាក់ប្រហែលនឹង១៩០ដុល្លារ ដោយរួមទាំងមិនចាំបាច់បង់ថ្លៃសេវាផ្សេងៗទៀតឡើយ។
លោកសាស្ត្រាចារ្យ ម៉ម ប៊ុនហេង បានឲ្យដឹងទៀតថា កន្លងមករាជរដ្ឋាភិបាលដាក់ចេញគោលនយោបាយដោយផ្តល់សេវាថែទាំសុខភាព និងព្យាបាលជំងឺជូនដល់កម្មករនិយោជិតក្នុងប្រព័ន្ធ និងក្រៅប្រព័ន្ធ មន្ត្រីរាជការ ជនពិការ និវត្តជន កម្មករតាមរយៈមូលនិធិសមធម៌ និងបេឡាជា តិរបបសន្តិសុខសង្គមដោយឥតគិតថ្លៃ ដើម្បីគាំពារសុខភាពប្រជាពលរដ្ឋកម្ពុជា ក៏ដូចជាចូលរួមកាត់បន្ថយភាពក្រីក្រឲ្យកាន់តែប្រសើរថែមទៀ។
ជាមួយគ្នានេះដែរ លោកសាស្ត្រាចារ្យ ម៉ម ប៊ុនហេង បានណែនាំ និងលើកទឹកចិត្តឲ្យមន្ត្រីសុខាភិបាល គ្រូពេទ្យគ្រប់ជំនាញ គ្រប់ផ្នែក ត្រូវយកចិត្តទុកដាក់បន្ថែមទៀតក្នុងការថែទាំ ព្យាបាលជំងឺ ជូនប្រជាពលរដ្ឋដោយស្មោះអស់ពីកម្លាំងកាយចិត្ត ពិសេសស្ត្រីក្រីក្រមានផ្ទៃពោះដែលមានប័ណ្ណក្រីក្រដែលនឹងត្រូវទទួលបានការលើកលែងបង់ថ្លៃនៅពាក់កណ្ដាលឆ្នាំ២០១៩ខាងមុខនេះ។
អ្នកស្រី ស៊ានសុភា មានផ្ទៃពោះ៥ខែ រស់នៅខេត្តស្វាយរៀង មានប័ណ្ណក្រីក្របានសាទរចំពោះគោលនយោបាយរបស់រាជរដ្ឋាភិបាលសម្រាប់ស្ត្រីមានផ្ទៃពោះក្រីក្រ ព្រោះបានជួយសម្រាលបន្ទុកយ៉ាងច្រើនដល់អ្នកស្រី ក៏ដូចជាប្រជាពលរដ្ឋជាស្ត្រីក្រីក្រផ្សេងៗទៀតក្នុងការចំណាយទៅលើការពិនិត្យផ្ទៃពោះ និងសម្រាលកូន៕
Source: Kampuchea Thmey Daily
0 Comments