ក្រុម​ជម្រើសជាតិ​កម្ពុជា ឈរ​លេខ​រៀង​ទី​១៧២ ក្នុង​តារាង​ពិភពលោក​ប្រចាំ​ខែធ្នូ​

សហព័ន្ធ​កីឡាបាល់ទាត់​អន្តរជាតិ ឬ ហៅ​កាត់​ថា FIFA បាន​បញ្ចេញ​តារាង​ចំណាត់ថ្នាក់​ក្រុមបាល់ទាត់​ទាំងអស់​ជា​សមាជិក​របស់ខ្លួន (FIFA World Ranking) ដែលមាន ២០៦ ប្រទេស ប្រចាំខែ ធ្នូ ឆ្នាំ​២០១៨ នៅ​កាលពីពេល​ថ្មីៗ​នេះ​ស្របពេល​ក្រុម​កម្ពុជា នៅ​ឈរ​ចំណាត់ថ្នាក់​ដែល​គឺ​លេខ​១៧២ ពោលគឺ​ស្មើនឹង​ចំណាត់ថ្នាក់​កាលពី​ខែវិច្ឆិកា កន្លងទៅ​។



យោង​តាម​វិ​ប​សាយ fifa.com បាន​បញ្ជាក់​ថា ​តារាង​ចំណាត់ថ្នាក់​នេះ​គិត​ចាប់ពី​ថ្ងៃទី​២០ ខែធ្នូ ឆ្នាំ​២០១៨ តទៅ​។ តារាង​ចំណាត់ថ្នាក់​នេះ​មិនមាន​ការប្រែប្រួល​ច្រើន​ព្រោះ​ក្រុម​ជម្រើសជាតិ​កម្ពុជា តែ​បញ្ចប់​បេសកម្ម​ក្នុង​ពានរង្វាន់​បាល់ទាត់ AFF Suzuki Cup 2018​។ សរុប​តារាង​ចំណាត់ថ្នាក់​ប្រចាំ​តំបន់​អាស៊ាន ប្រទេស​វៀតណាម ឡើង​មកឈរ​កំពូល​តា​រាង​១១​ខែ​ជាប់​គ្នា ដោយ​ឈរ​លេខ​១០០​ពិភពលោក បន្ទាប់ពី​វ៉ា​ដាច់​ហ្វីលីពីន នៅ​លេខ​១១៦ តាម​ពីក្រោយ​ក្រុម​ថៃ ឈរ​លេខ​១១៨​ពិភពលោក​,​មី​យ៉ាន់​ម៉ា លេខ​១៣៩,​ឥណ្ឌូណេស៊ី លេខ​១៥៩,​សឹង្ហ​បុរី លេខ ១៦៥, ម៉ាឡេស៊ី លេខ​១៦៧,​កម្ពុជា លេខ​១៧២, ឡាវ លេខ​១៨៤,​ប្រ៊ុយណេ លេខ​១៩៥ និង​ទី​ម័​រ​ខាងកើត លេខ​១៩៦​។



​បើ​រាល់​តារាង​ចំណាត់ថ្នាក់​ក្រុម​ល្អ​ទាំង​១០ ប្រចាំ​ទ្វីបអាស៊ី ក្នុង​ខែធ្នូ នេះ​មាន​ក្រុម​អ៊ីរ៉ង់ បាន​ឡើង​មកឈរ​លេខ​២៩ ពិភពលោក​ក្នុង​តារាង​ក្រោយ​ទម្លាក់​ក្រុម​អូស្ត្រាលី ឲ្យ​ឈរ​លេខ​៤១​ពិភពលោក​,​ជប៉ុន លេខ​៥០, កូរ៉េខាងត្បូង លេខ​៥៣, អារ៉ាប់​ប៊ី​សា​អ៊ូ​ឌី​ត លេខ​៦៩, ស៊ី​រី លេខ​៧៤, ចិន លេខ​៧៦, អារ៉ាប់​រួម លេខ ៧៩,​លី​បង់ លេខ​៨១ និង​អូ​ម៉​ង់ លេខ​៨២​ពិភពលោក​។



សម្រាប់​ចំណាត់ថ្នាក់​ក្រុម​ខ្លាំងជាងគេ​ប្រចាំ​ពិភពលោក​ក្នុង​ខែធ្នូ នេះ​គឺ​ក្រុម​ប៊ែ​ល​ហ្សិ​ច ឈរ​លេខ​១ ហើយ​ក្រុម​បារាំង ឈរ​លេខ​២ ខណៈ​ក្រុម​ប្រេ​ស៊ី​ល ឈរ​លេខ​៣ ,​ក្រូ​អាត លេខ ៤, ប្រទេស​អង់គ្លេស ឈរ​លេខ​៥,​ព័រ​ទុយ​ហ្គា​ល់ លេខ​៦, អ៊ុយ​រ៉ា​ហ្គា​យ លេខ​៧, ស្វី​ស លេខ​៨, អេ​ស្ប៉ា​ញ ឡើងមក​លេខ៩ និង​ក្រុម​ជម្រើស​ជាតិ​ដាណឺម៉ាក់ ឈរ​លេខ១០​៕

Source: Kampuchea Thmey Daily