ភ្នំពេញ ៖ រថយន្តដឹកដីពេញមួយគ្រឿង ដែលគេស្គាល់ថា ជារបស់តាវែង បើកបរខ្វះការប្រុងប្រយ័ត្នបុកកៀររថយន្តក្រុងរបស់សាលាក្រុង ស៊ីញ៉ូបត់ឆ្លងផ្លូវចូលបេន ជ្រុលទៅមុខបុកកៀរចិញ្ចើមថ្មសួនច្បារ និងបង្កាន់ដៃដែក បាក់អស់មួយផ្ទាំង តែសំណាងល្អមិនបង្កគ្រោះថ្នាក់មនុស្សណាម្នាក់នោះឡើយ។
ហេតុការណ៍គ្រោះថ្នាក់ចរាចរណ៍នោះ បានកើតឡើងកាលពីវេលាម៉ោង១និង៥០នាទីរសៀល ថ្ងៃទី០៤ ខែធ្នូ ឆ្នាំ២០១៨ ស្ថិតតាមបណ្ដោយផ្លូវជាតិលេខ៥ ត្រង់ចំណុចមុខសួនច្បារប្រជាធិបតេយ្យ ភូមិឃ្លាំងសាំង សង្កាត់ឫស្សីកែវ ខណ្ឌឫស្សីកែវ។
រថយន្តដឹកដីបង្កម៉ាកពុយស៊ោ ពណ៌ស អត់ស្លាកលេខ អ្នកបើកបរ ឈ្មោះ ហោ ហេង ភេទប្រុសអាយុ៣៣ឆ្នាំ មានទីលំនៅភូមិក្រោលគោ សង្កាត់គីឡូម៉ែត្រលេខ៦ ខណ្ឌឫស្សីកែវ ដែលគេស្គាល់ថាថៅកែឈ្មោះ វែង ។ រីឯរថយន្តក្រុង រងគ្រោះ ពណ៌ខៀវ ពាក់ស្លាកលេខរដ្ឋ៣៧-៣-០២៣២ រងការខូចខាតបែកកញ្ចក់មួយផ្ទាំងចំហៀងខាងឆ្វេង អ្នកបើកបរឈ្មោះ កែវ មុន្នីងា ភេទប្រុស អាយុ៣៩ឆ្នាំស្នាក់នៅភូមិគោកឃ្លៀង សង្កាត់ភ្នំពេញ ខណ្ឌសែនសុខ។
តាមប្រភពព័ត៌មានពីកន្លែងកើតហេតុបានឲ្យដឹងថា នៅមុនពេលកើតហេតុ គេឃើញរថយន្តទាំង២គ្រឿងខាងលើ បើកតាមបណ្ដោយផ្លូវជាតិលេខ៥ ទិសដៅពីត្បូង ទៅជើង ហើយរថយន្តក្រុងរបស់សាលាក្រុង បើកបរក្នុងល្បឿនយ៉ាងលឿន ស៊ីញ៉ូចម្ងាយប្រហែល២០ម៉ែត្រ ទៅ៣០ម៉ែត្រ ដើម្បីបត់ចូលបេន ខណៈនោះ រថយន្តដឹកដីរបស់តាវែង បានបើកវ៉ាស្តាំមិនប្រយ័ត្ន ស្របពេលនោះក៏បុកកៀររថយន្តក្រុងកំពុងបត់ចូលបេន ហើយជ្រុលទៅមុខបុកកៀរចិញ្ចើមផ្លូវសួនច្បារ ច្រកចូលបេនកៀបជាប់បាក់បង្កាន់ដៃដែកសួនច្បារ ទៅមុខលែងរួចតែសំណាងល្អមិនបណ្តាលឲ្យមនុស្សណាម្នាក់រងរបួសនោះឡើយ។
ក្រោយកើតហេតុ សមត្ថកិច្ចមូលដ្ឋាន ចុះមកដល់កន្លែងកើតហេតុ និងទាក់ទងសមត្ថកិច្ចជំនាញចុះមកធ្វើការវាស់វែងរួចរាល់ ហើយយករថយន្តទាំង២គ្រឿងទៅរក្សាទុកនៅការិយាល័យនគរបាលចរាចរណ៍ជើងគោក នៃស្នងការដ្ឋាននគរបាលរាជធានីភ្នំពេញ ដើម្បីរង់ចាំការដោះស្រាយនាពេលក្រោយទៅតាមនីតិវិធីច្បាប់៕
Source: Kampuchea Thmey Daily
0 Comments