សមាជិកព្រឹទ្ធសភាគណបក្សសាធារណរដ្ឋចំនួនពីររូបបាននិយាយថា ការផ្តល់សេចក្តីសង្ខេប មួយកាលពីថ្ងៃអង្គារដោយនាយក CIA គឺអាចពង្រឹងការជឿជាក់របស់ពួកគេដែលថា រាជទាយាទរបស់ប្រទេសអារ៉ាប៊ីសាអ៊ូឌីតបានបញ្ជាលើការសម្លាប់អ្នកកាសែត Jamal Khashoggi ។
ការប្រកាសថ្មីដោយសមាជិករបស់គណបក្សផ្ទាល់របស់លោកប្រធានាធិបតី Donald Trump នេះបានប្រឆាំងនឹងសេតវិមានដែលច្រានចោលទំនាក់ទំនងដែលអាចមានរវាងរាជទាយាទ Mohammed bin Salman និងការសម្លាប់អ្នកកាសែតនៅស្ថានកុងស៊ុលប្រចាំទីក្រុងអ៊ីស្តង់ប៊ុល។
ប្រធានគណៈកម្មាធិការទំនាក់ទំនងបរទេសព្រឹទ្ធសភាលោក Bob Corker បានប្រាប់ក្រុមអ្នកសារព័ត៌មានបន្ទាប់ពីនាយក CIA លោក Gina Haspel បានប្រាប់សមាជិកព្រឹទ្ធសភាមួយក្រុមតូចថា “ខ្ញុំគ្មានសំនួរនៅក្នុងចិត្តរបស់ខ្ញុំទេថា រាជទាយាទបានដឹកនាំឃាតកម្មនេះហើយរក្សាការវាយតម្លៃពីស្ថានភាពទាំងអស់តាមរយៈរឿងនេះ”។
លោកបាននិយាយថា “ប្រសិនបើព្រះអង្គម្ចាស់ Mohammed bin Salman ស្ថិតនៅចំពោះមុខគណៈវិនិច្ឆ័យ ព្រះអង្គនឹងត្រូវបានផ្តន្ទាទោសក្នុងរយៈពេលមិនដល់៣០នាទីផង”។
សមាជិកព្រឹទ្ធសភាគណបក្សសាធារណរដ្ឋមួយរូបទៀតឈ្មោះ Lindsey Graham ដែលជាសម្ព័ន្ធមិត្តរបស់លោក Trump ក៏បានចូលរួមក្នុងសន្និសីទបិទទ្វាររយៈពេលមួយម៉ោងនេះផងដែរ។
លោក Graham បាននិយាយនៅក្នុងការរិះគន់ចំពោះសម្ព័ន្ធមិត្តអាមេរិកថា “រាជទាយាទគឺ ឆ្កួត និងជា គ្រាប់បាល់ដែលបាក់បែកដែលជាអ្នកសមគំនិតក្នុងករណីឃាតកម្មលោក Khashoggi ដល់កម្រិតខ្ពស់បំផុត”។
កាសែតអាមេរិកជាច្រើនដូចជាកាសែត Wall Street Journal ជាដើមបានរាយការណ៍ថា CIA មានភស្តុតាងបង្ហាញថា ព្រះអង្គម្ចាស់ Mohammed បានផ្ញើសារតបតចំនួន១១ជាមួយជំនួយការជិតស្និទ្ធឈ្មោះ Saud al-Qahtani ដែលត្រូវបានគេចោទប្រកាន់ថាបានមើលការខុសត្រូវករណីឃាតកម្មនេះមុននិងក្រោយពេលកើតហេតុ៕ AFP
Source: Kampuchea Thmey Daily
0 Comments