បាត់ដំបង ៖ សពកុមារាម្នាក់ ដែលទើបតែមានអាយុ៣ឆ្នាំ ត្រូវបានគេប្រទះឃើញអណ្ដែតនៅក្នុងទឹកស្ទឹងសង្កែ ដែលធ្វើឲ្យស្ត្រីជាម្តាយយំសោក បោកខ្លួន ដោយការស្តាយស្រណោះ បន្ទាប់ពីកុមាររូបនេះបានបាត់ខ្លួន កាលពីវេលាម៉ោង៩និង៣០នាទីព្រឹក ថ្ងៃទី៤ ខែធ្នូ ឆ្នាំ២០១៨ ក្នុងផ្សារណាត់ កណ្តាលក្រុងបាត់ដំបង។
បើតាមការរៀបរាប់ពីស្ត្រីជាម្តាយកុមារា មានឈ្មោះ ឡុង ចន្ថា អាយុ៣៩ឆ្នាំ មានទីលំនៅបច្ចុប្បន្ន ភូមិសួសអី ឃុំពាមឯក ស្រុកឯកភ្នំ ខេត្តបាត់ដំបង បាននិយាយទាំងទឹកភ្នែកថា ខណៈពេលដែលខ្លួន កំពុងជាប់រវល់អ៊ុតសក់ឲ្យភ្ញៀវក្នុងរយៈពេលប្រហែល១០នាទី ដោយពុំបានតាមមើល ក៏បានបាត់កូនប្រុសឈ្មោះ ដេត រ៉ាឌីន អាយុ៣ឆ្នាំ មិនដឹងជាទៅទីណា ទើបខ្លួនបានប្តឹងទៅសមត្ថកិច្ចដើម្បីជួយស្រាវជ្រាវរកកូនប្រុស ប៉ុន្តែទោះជាខំរកយ៉ាងណាក៏មិនឃើញដែរ។
លុះនៅម៉ោង៨និង៣០នាទីព្រឹក ថ្ងៃទី៥ធ្នូនេះ ស្រាប់តែមានការភ្ញាក់ផ្អើលដោយសារតែមានគេប្រទះឃើញ សពកុមារារូបនេះ អណ្ដែតឡើងនៅក្នុងស្ទឹង ទល់មុខទីតាំងលក់ភីស្សាខមភេនី ដែលស្ថិតក្នុងភូមិព្រែកមហាទេព សង្កាត់ស្វាយប៉ោ ក្រុងបាត់ដំបង។
បច្ចុប្បន្ន សព ត្រូវបានម្តាយនាំយកទៅធ្វើបុណ្យនៅឯលំនៅដ្ឋានហើយ ទាំងភាពក្ដុកក្ដួលជាអនេក ដោយសារតែកូនប្រុសដ៏តូចកំពុងពេញស្រលាញ់ បានដើរចុះទឹកស្ទឹងទាំងគ្មាននរណាម្នាក់បានឃើញ៕
Source: Kampuchea Thmey Daily
0 Comments