តាកែវ ៖ ជនសង្ស័យម្នាក់ ត្រូវបាននគរបាលស្រុកសំរោងធ្វើការចាប់ខ្លួនតាមពាក្យបណ្តឹងពីអាណាព្យាបាលក្មេងស្រីរងគ្រោះពីបទចាប់រំលោភសេពសន្ថវៈ។
ហេតុការណ៍ចាប់ខ្លួនជនសង្ស័យក្នុងករណីចាប់រំលោភសេពសន្ថវៈនេះ គឺធ្វើឡើងនៅថ្ងៃទី០៧ ខែធ្នូ ឆ្នាំ២០១៨ វេលាម៉ោង១០និង៣០នាទី ដោយកម្លាំងជំនាញនៃអធិការនគរបាលស្រុកសំរោងនៅចំណុចភូមិពន្លឺ ឃុំជំរះពេន ស្រុកសំរោង ខេត្តតាកែវ។
តាមការបញ្ជាក់ពីសមត្ថកិច្ចស្រុកសំរោងប្រាប់ថា ជនសង្ស័យដែលជាប់ពាក់ព័ន្ធមានឈ្មោះ ខឹម ណុប ភេទប្រុស អាយុ៣២ឆ្នាំ បានផឹកស្រាស្រវឹងជោកជាំ រួចបានធ្វើសកម្មភាពឡើងទៅលើផ្ទះឈ្មោះ មាស ធា ភេទស្រី អាយុ៤៦ឆ្នាំ នៅវេលាម៉ោង១និង០០នាទីយប់ឈានចូលថ្ងៃទី០៧ ខែធ្នូ និងបានចាប់រំលោភក្មេងស្រីរងគ្រោះ ឈ្មោះ ថ.ស.ជ.ត អាយុ១៧ឆ្នាំ ខណៈដែលជនរងគ្រោះដេកនៅលើផ្ទះតែម្នាក់ឯង។ លុះព្រឹកឡើងអាណាព្យាបាលជនរងគ្រោះបានមកដាក់ពាក្យបណ្តឹងទើបសមត្ថកិច្ចឈានទៅដល់ការឃាត់ខ្លួនជនសង្ស័យតែម្តងទៅ។
បច្ចុប្បន្នជនសង្ស័យក្នុងករណីចាប់រំលោភសេពសន្ថវៈនេះត្រូវបានសមត្ថកិច្ចសួរនាំដើម្បីកសាងសំណុំរឿងបញ្ជូនទៅសាលាដំបូងខេត្តតាកែវចាត់ការតាមនីតិវិធី៕
Source: Kampuchea Thmey Daily
0 Comments