កែប ៖ រយៈពេលប៉ុន្មានឆ្នាំនេះ គេបានសង្កេតឃើញបរិវេណផ្សារដំណាក់ចង្អើរ ហាក់មានសភាពអាប់អួ ខណៈផ្សារខាងលើ ត្រូវបានរៀបចំសាងសង់ជាថ្មី ហើយផ្លូវ នៃបរិវេណផ្សារទាំងមូល ត្រូវ បានក្រុមអាជីវករយកធ្វើជាកន្លែងលក់ដូររាប់ឆ្នាំមកហើយដែរ។
គេបានដឹងថា ផ្សារដំណាក់ចង្អើរ ស្ថិតក្នុងសង្កាត់ព្រៃធំ ក្រុងកែប ខេត្តកែប ត្រូវបានសាងសង់ជាថ្មីនៅដើមឆ្នាំ២០១៦ ហើយត្រូវបានអនុញ្ញាតឲ្យក្រុមអាជីវករចូលលក់ដូរនៅតាម តូប ស្តង់ នៅដើមខែធ្នូ ឆ្នាំ២០១៨នេះ ហើយបរិវេណផ្សារដែលធ្លាប់តែបង្កការលំបាកដោយសារអាជីវករសង់តូបស្អេកស្កះដែលតែងតែរំខានដល់មហាជននោះ ក៏ត្រូវបានរុះរើចេញមានសោភ័ណភាពវិញហើយដែរ បន្ទាប់ពីផ្សារខាងលើ ត្រូវបងប្អូនអាជីវករចូលលក់ដូរនៅព្រឹកថ្ងៃទី១៣ ខែធ្នូ ឆ្នាំ២០១៨នេះ។
សូមជម្រាបថា បន្ទាប់ពីផ្សារដំណាក់ចង្អើរត្រូវបានសាងសង់ជាថ្មីដោយប្រើពេលវេលាប្រមាណបីឆ្នាំមកនោះ ផ្លូវជុំវិញផ្សារទាំងមូលត្រូវក្លាយជាកន្លែងលក់ដូរយ៉ាងអនាធិបតេយ្យបង្កផលលំបាកដល់អ្នកដំណើរ ពិសេសអ្នកមានទីលំនៅស្ថិតជុំវិញបរិវេណផ្សារតែម្ដង មានការលំបាកចេញចូល សូម្បីតែយានជំនិះក៏រកកន្លែងចតគ្មានផងដែរ។ ប៉ុន្តែក្រោយពីផ្សារដំណាក់ចង្អើរត្រូវបានបើកដំណើរការនៅព្រឹកថ្ងៃទី១៣ ខែធ្នូ ឆ្នាំ២០១៨នេះ បរិវេណផ្សារដំណាក់ចង្អើរមានភាពប្រក្រតីវិញហើយ។ចំណែកផ្លូវដែលធ្លាប់បិទជិតរាប់ឆ្នាំ ក៏អាចធ្វើចរាចរបានដូចមុនវិញ៕
Source: Kampuchea Thmey Daily
0 Comments